Proverbi ܡܬ̈ܠܐ 1

¹ܡܬ̈ܠܘܗܝ ܕܫܠܝܡܘܢ ܒܪ ܕܘܝܕ ܡܠܟܐ ܕܐܝܣܪܝܠ²ܠܡܕܥ ܚܟܡܬܐ ܘܡܪܕܘܬܐ ܘܠܡܬܒܝܢܘ ܒܡ̈ܠܐ ܕܣܘܟܠܐ³ܘܠܡܩܒܠܘ ܡܪܕܘܬܐ ܘܕܚܠܬܐ ܘܙܕܝܩܘܬܐ ܘܕܝܢܐ ܘܬܪܝܨܘܬܐ⁴ܠܡܬܠ ܠܫܒܪ̈ܐ ܥܪܝܡܘܬܐ ܘ̈ܠܛܠܝܐ ܝܕܥܬܐ ܘܬܪܥܝܬܐ⁵ܢܫܡܥ ܚܟܝܡܐ ܘܢܘܣܦ ܥܠ ܚܟܡܬܗ ܘܣܟܘܠܬܢܐ ܡܕܒܪܢܘܬܐ ܢܩܢܐ⁶ܕܢܫܬܘܕܥ ܡܬ̈ܠܐ ܘܦܠܐ̈ܬܐ ܘܡ̈ܠܐ ܕܚ̈ܟܝܡܐ ܘܐܘܚ̈ܕܬܗܘܢ⁷ܪܝܫ ܚܟܡܬܐ ܕܚܠܬܗ ܕܡܪܝܐ ܝܕܥܬܐ ܕܝܢ ܘܡܪܕܘܬܐ ܫܝܛܝܢ ܥܘ̈ܠܐ⁸ܫܡܥ ܒܪܝ ܢܡܘܣܐ ܕܐܒܘܟ ܘܠܐ ܬܛܥܐ ܢܡܘܣܐ ܕܐܡܟ⁹ܝܐܝܘܬܐ ܐܢܘܢ ܓܝܪ ܠܪܝܫܟ ܘܗܡܢܝܟܐ ܠܨܘܪܟ¹⁰ܒܪܝ ܐܢ ܢܫܕܠܘܢܟ ܚ̈ܛܝܐ ܠܐ ܬܛܦܝܣ¹¹ܘܐܢ ܢܐܡܪܘܢ ܠܟ ܬܐ ܥܡܢ ܢܟܡܢ ܠܕܡܐ ܘܢܛܫܐ ܠܙܟܝܐ ܒܥܬܐ¹²ܘܢܒܠܥܝܘܗܝ ܐܝܟ ܫܝܘܠ ܠܚܝܐ ܘܠܕܠܐ ܡܘܡ ܐܝܟ ܢܚ̈ܬܝ ܓܘܒܐ¹³ܟܠܗ ܥܘܬܪܗ ܘܐܝܩܪܗ ܢܫܟܚ ܘܢܡܠܐ ܒܬ̈ܝܢ ܒܙܬܐ¹⁴ܦܨܬܟ ܐܪܡܐ ܒܝܢܬܢ ܘܟܝܣܐ ܚܕ ܢܗܘܐ ܠܟܠܢ¹⁵ܒܪܝ ܠܐ ܬܐܙܠ ܥܡܗܘܢ ܒܐܘܪܚܐ ܐܠܐ ܟܠܝ ܪܓܠܟ ܡܢ ܫܒܝ̈ܠܝܗܘܢ¹⁶ܡܛܠ ܕܪ̈ܓܠܝܗܘܢ ܠܒܝܫܬܐ ܗܘ ܪ̈ܗܛܢ ܘܡܣܬܪ̈ܗܒܝܢ ܠܡܐܫܕ ܕܡܐ ܙܟܝܐ¹⁷ܘܒܥܬܐ ܗܘ ܦܪ̈ܣܝܢ ܡܨܝ̈ܕܬܐ ܥܠ ܦܪܚܬܐ¹⁸ܘܟܡܢܝܢ ܠܕܡܐ ܘܡܛܫܝܢ ܢܦܫ̈ܬܗܘܢ¹⁹ܗܟܢܐ ܐ̈ܢܝܢ ܐܘܪ̈ܚܬܐ ܕܟܠ ܕܥܒܕܝܢ ܥܘ̣ܠܐ ܘܢܣܒܝܢ ܢܦܫ̈ܬܐ ܕܡܪ̈ܝܗܝܢ²⁰ܚܟܡܬܐ ܒܫ̈ܘܩܐ ܡܫܬܒܚܐ ܘܒܫ̈ܘܩܐ ܡܪܝܡܐ ܩܠܗ̇²¹ܘܒܪܝܫ ܒܪ̈ܝܬܐ ܡܟܪܙܐ ܘܒܡ̈ܥܠܢܐ ܕܬܪ̈ܥܐ ܕܟܪ̈ܟܐ ܡ̈ܠܝܗ̇ ܐܡܪܐ²²ܥܕܡܐ ܠܐܡܬܝ ܫܒܪ̈ܐ ܪ̈ܚܡܝܢ ܐܢܬܘܢ ܫܒܪܘܬܐ ܘܡܡ̈ܝܩܢܐ ܪ̈ܓܝܢ ܐܢܬܘܢ ܡܡܝܩܢܘܬܐ ܘܣܟ̈ܠܐ ܣܢܝܢ ܐܢܬܘܢ ܝܕܥܬܐ²³ܐܢ ܬܬܦܢܘܢ ܠܡܟܣܢܘܬܝ ܐܒܥ ܠܟܘܢ ܪܘܚܝ ܘܐܘܕܥܟܘܢ ܡܠܬܝ²⁴ܥܠ ܕܩܪܝܬ ܘܠܐ ܗܝܡܢܬܘܢ ܘܐܪܝܡܬ ܩܠܝ ܘܠܐ ܫܡܥܬܘܢ²⁵ܘܫܛܬܘܢ ܟܠܗܝܢ ܬܪ̈ܥܝܬܝ ܘܒܡܟܣܢܘܬܝ ܠܐ ܨܒܝܬܘܢ²⁶ܐܦ ܐܢܐ ܐܓܚܟ ܥܠ ܬܒܪܟܘܢ ܘܐܚܕܐ ܡܐ ܕܐܬ̇ܐ ܥܠܝܟܘܢ ܕܠܘܚܝܐ ܘܐܒܕܢܐ ܡܢ ܫܠܝܐ²⁷ܘܬܒܪܟܘܢ ܐܝܟ ܥܠܥܠܐ ܢܐܬܐ ܘܡܐ ܕܐܬ̣ܐ ܥܠܝܗܘܢ ܐܘܠܨܢܐ ܘܥܩܬܐ²⁸ܗܝܕܝܢ ܢܩܪܘܢܢܝ ܘܠܐ ܐܥܢܐ ܐܢܘܢ ܘܢܩܕܡܘܢ ܠܘܬܝ ܘܠܐ ܢܫܟܚܘܢܢܝ²⁹ܥܠ ܕܣܢܘ ܝܕܥܬܐ ܘܕܚܠܬܗ ܕܡܪܝܐ ܠܐ ܓܒܘ³⁰ܘܠܐ ܨܒܘ ܒܬܪ̈ܥܝܬܝ ܘܐܣܠܝܘ ܟܠܗ̇ ܡܟܣܢܘܬܝ³¹ܘܐܟܠܘ ܡܢ ܦܐܪ̈ܐ ܕܐܘܪ̈ܚܬܗܘܢ ܘܡܢ ܬܪ̈ܥܝܬܗܘܢ ܣܒܥܘ³²ܡܛܠ ܗܢܐ ܡܗܦܟܢܘܬܐ ܕܫܒܪ̈ܐ ܬܩܛܘܠ ܐܢܘܢ ܘܛܘܥܝܝ ܕܚܣܝܪ̈ܝ ܪܥܝܢܐ ܬܘܒܕ ܐܢܘܢ³³ܘܡ̇ܢ ܕܫܡܥ ܠܝ ܢܫܪܐ ܒܣܒܪܐ ܘܢܫܠܐ ܡܢ ܣܘܓܐܐ ܕܒܝܫܬ̈ܐ

Cambia Bibbia

Confronta con un'altra Bibbia

Versetti esaminati