Jó 12

¹ Respondens autem Iob dixit:

² “ Ergo vos estis soli homines,
et vobiscum morietur sapientia.

³ Et mihi est cor sicut et vobis,
nec inferior vestri sum;
quis enim haec, quae nostis, ignorat?

⁴ Qui deridetur ab amico suo sicut ego,
invocabit Deum, et exaudiet eum; deridetur enim iusti integritas.

⁵ Lampas contempta apud cogitationes eorum, qui securi sunt,
parata iis, qui vacillant pede.

⁶ Tranquilla sunt tabernacula praedonum
et secura iis, qui provocant Deum, iis, qui Deum tenent manu sua.

⁷ Nimirum interroga iumenta, et docebunt te,
et volatilia caeli, et indicabunt tibi.

⁸ Loquere terrae, et docebit te;
et narrabunt pisces maris.

⁹ Quis ignorat in omnibus his
quod manus Domini hoc fecerit?

¹⁰ In cuius manu anima omnis viventis
et spiritus universae carnis hominis.

¹¹ Nonne auris verba diiudicat,
et palatum cibum sibi gustat?

¹² In senibus est sapientia,
et in longaevis prudentia.

¹³ Apud ipsum est sapientia et fortitudo;
ipse habet consilium et intellegentiam.

¹⁴ Si destruxerit, nemo est, qui aedificet;
si incluserit hominem, nullus est, qui aperiat.

¹⁵ Si continuerit aquas, arescent;
et, si emiserit eas, subvertent terram.

¹⁶ Apud ipsum est fortitudo et sapientia;
ipse novit et decipientem et eum qui decipitur.

¹⁷ Inducit consiliarios spoliatos
et iudices in stuporem.

¹⁸ Balteum regum dissolvit
et praecingit fune renes eorum.

¹⁹ Inducit sacerdotes spoliatos
et optimates supplantat,

²⁰ commutans labium veracium
et doctrinam senum auferens.

²¹ Effundit despectionem super principes
et cingulum fortium relaxat.

²² Qui revelat profunda de tenebris
et producit in lucem umbram mortis.

²³ Qui multiplicat gentes et perdit eas
et subversas in integrum restituit.

²⁴ Qui immutat cor principum populi terrae et decipit eos
et errare eos faciet per invium desertum.

²⁵ Palpabunt quasi in tenebris et non in luce,
et errare eos faciet quasi ebrios.