Proverbi 13

NOVA VULGATA	VULGATA
1 Filius sapiens disciplina patris; qui autem illusor est, non audit, cum arguitur.	1 Filius sapiens doctrina patris ; qui autem illusor est non audit cum arguitur.
2 De fructu oris sui homo satiabitur bonis, anima autem praevaricatorum violentia.	2 De fructu oris sui homo satiabitur bonis : anima autem prævaricatorum iniqua.
3 Qui custodit os suum, custodit animam suam; qui autem incautus est eloquio, ruina est ei.	3 Qui custodit os suum custodit animam suam ; qui autem inconsideratus est ad loquendum, sentiet mala.
4 Vult et non habet piger, anima autem operantium impinguabitur.	4 Vult et non vult piger ; anima autem operantium impinguabitur.
5 Verbum mendax iustus detestabitur, impius autem confundit et dehonestat.	5 Verbum mendax justus detestabitur ; impius autem confundit, et confundetur.
6 Iustitia custodit innocentem in via, impietas autem peccatorem supplantat.	6 Justitia custodit innocentis viam, impietas autem peccatorem supplantat.
7 Est qui quasi dives habetur, cum nihil habeat; et est qui quasi pauper, cum in multis divitiis sit.	7 Est quasi dives, cum nihil habeat, et est quasi pauper, cum in multis divitiis sit.
8 Redemptio animae viri divitiae suae; qui autem pauper est, increpationem non sustinet.	8 Redemptio animæ viri divitiæ suæ ; qui autem pauper est, increpationem non sustinet.
9 Lux iustorum laetificat, lucerna autem impiorum exstinguetur.	9 Lux justorum lætificat : lucerna autem impiorum extinguetur.
10 Inter superbos tantum iurgia sunt, et apud humiles sapientia.	10 Inter superbos semper jurgia sunt ; qui autem agunt omnia cum consilio, reguntur sapientia.
11 Substantia festinata minuetur; qui autem colligit manu, multiplicat.	11 Substantia festinata minuetur ; quæ autem paulatim colligitur manu, multiplicabitur.
12 Spes, quae differtur, affligit animam, lignum vitae desiderium veniens.	12 Spes quæ differtur affligit animam ; lignum vitæ desiderium veniens.
13 Qui contemnit verbum, ipse se obligat; qui autem timet praeceptum, retribuetur ei.	13 Qui detrahit alicui rei, ipse se in futurum obligat ; qui autem timet præceptum, in pace versabitur. Animæ dolosæ errant in peccatis : justi autem misericordes sunt, et miserantur.
14 Lex sapientis fons vitae, ut declinet a laqueis mortis.	14 Lex sapientis fons vitæ, ut declinet a ruina mortis.
15 Intellegentia bona dabit gratiam, in itinere infidelium vorago.	15 Doctrina bona dabit gratiam ; in itinere contemptorum vorago.
16 Omnis astutus agit cum consilio; qui autem fatuus est, aperit stultitiam.	16 Astutus omnia agit cum consilio ; qui autem fatuus est aperit stultitiam.
17 Nuntius impius cadet in malum, legatus autem fidelis sanitas.	17 Nuntius impii cadet in malum ; legatus autem fidelis, sanitas.
18 Egestas et ignominia ei, qui deserit disciplinam; qui autem acquiescit arguenti, glorificabitur.	18 Egestas et ignominia ei qui deserit disciplinam ; qui autem acquiescit arguenti glorificabitur.
19 Desiderium, si compleatur, delectat animam; detestantur stulti fugere mala.	19 Desiderium si compleatur delectat animam ; detestantur stulti eos qui fugiunt mala.
20 Qui cum sapientibus graditur, sapiens erit; amicus stultorum malus efficietur.	20 Qui cum sapientibus graditur sapiens erit ; amicus stultorum similis efficietur.
21 Peccatores persequitur malum, et iustis retribuentur bona.	21 Peccatores persequitur malum, et justis retribuentur bona.
22 Bonus relinquit heredes filios et nepotes; et custoditur iusto substantia peccatoris.	22 Bonus reliquit hæredes filios et nepotes, et custoditur justo substantia peccatoris.
23 Multi cibi in novalibus pauperum, et est qui perit, deficiente iudicio.	23 Multi cibi in novalibus patrum, et aliis congregantur absque judicio.
24 Qui parcit virgae, odit filium suum; qui autem diligit illum, instanter erudit.	24 Qui parcit virgæ odit filium suum ; qui autem diligit illum instanter erudit.
25 Iustus comedit et replet animam suam, venter autem impiorum insaturabilis.	25 Justus comedit et replet animam suam ; venter autem impiorum insaturabilis.