Proverbi 15

NOVA VULGATA	VULGATA
1 Responsio mollis frangit iram, sermo durus suscitat furorem.	1 Responsio mollis frangit iram ; sermo durus suscitat furorem.
2 Lingua sapientium stillat scientiam, os fatuorum ebullit stultitiam.	2 Lingua sapientium ornat scientiam ; os fatuorum ebullit stultitiam.
3 In omni loco oculi Domini contemplantur malos et bonos.	3 In omni loco, oculi Domini contemplantur bonos et malos.
4 Lingua placabilis lignum vitae, sed obliquitas in ea conteret spiritum.	4 Lingua placabilis lignum vitæ ; quæ autem immoderata est conteret spiritum.
5 Stultus irridet disciplinam patris sui; qui autem custodit increpationes, astutior fiet.	5 Stultus irridet disciplinam patris sui ; qui autem custodit increpationes astutior fiet. In abundanti justitia virtus maxima est : cogitationes autem impiorum eradicabuntur.
6 In domo iusti divitiae plurimae, et in fructibus impii conturbatio.	6 Domus justi plurima fortitudo, et in fructibus impii conturbatio.
7 Labia sapientium disseminabunt scientiam; cor stultorum non rectum erit.	7 Labia sapientium disseminabunt scientiam ; cor stultorum dissimile erit.
8 Victimae impiorum abominabiles Domino; vota iustorum grata sunt ei.	8 Victimæ impiorum abominabiles Domino ; vota justorum placabilia.
9 Abominatio est Domino via impii; qui sequitur iustitiam, diligetur.	9 Abominatio est Domino via impii ; qui sequitur justitiam diligitur ab eo.
10 Admonitio mala deserenti viam; qui increpationes odit, morietur.	10 Doctrina mala deserenti viam vitæ ; qui increpationes odit, morietur.
11 Infernus et Perditio coram Domino, quanto magis corda filiorum hominum!	11 Infernus et perditio coram Domino ; quanto magis corda filiorum hominum !
12 Non amat derisor eum, qui se corripit, nec ad sapientes graditur.	12 Non amat pestilens eum qui se corripit, nec ad sapientes graditur.
13 Cor gaudens exhilarat faciem, in maerore animi deicitur spiritus.	13 Cor gaudens exhilarat faciem ; in mœrore animi dejicitur spiritus.
14 Cor sapientis quaerit doctrinam, et os stultorum pascitur stultitia.	14 Cor sapientis quærit doctrinam, et os stultorum pascitur imperitia.
15 Omnes dies pauperis mali; hilaris autem corde quasi iuge convivium.	15 Omnes dies pauperis, mali ; secura mens quasi juge convivium.
16 Melius est parum cum timore Domini quam thesauri magni cum sollicitudine.	16 Melius est parum cum timore Domini, quam thesauri magni et insatiabiles.
17 Melius est demensum holerum cum caritate quam vitulus saginatus cum odio.	17 Melius est vocari ad olera cum caritate, quam ad vitulum saginatum cum odio.
18 Vir iracundus provocat rixas; qui patiens est, mitigat lites.	18 Vir iracundus provocat rixas ; qui patiens est mitigat suscitatas.
19 Iter pigrorum quasi saepes spinarum, via sollertium complanata.	19 Iter pigrorum quasi sepes spinarum ; via justorum absque offendiculo.
20 Filius sapiens laetificat patrem, et stultus homo despicit matrem suam.	20 Filius sapiens lætificat patrem, et stultus homo despicit matrem suam.
21 Stultitia gaudium sensu carenti; et vir prudens dirigit gressus suos.	21 Stultitia gaudium stulto, et vir prudens dirigit gressus suos.
22 Dissipantur cogitationes, ubi non est consilium; ubi vero sunt plures consiliarii, confirmantur.	22 Dissipantur cogitationes ubi non est consilium ; ubi vero sunt plures consiliarii, confirmantur.
23 Laetatur homo in responsione oris sui, et sermo opportunus est optimus.	23 Lætatur homo in sententia oris sui, et sermo opportunus est optimus.
24 Semita vitae sursum est viro erudito, ut declinet de inferno deorsum.	24 Semita vitæ super eruditum, ut declinet de inferno novissimo.
25 Domum superborum demolietur Dominus et firmos faciet terminos viduae.	25 Domum superborum demolietur Dominus, et firmos faciet terminos viduæ.
26 Abominatio Domini cogitationes malae, et purus sermo pulcherrimus.	26 Abominatio Domini cogitationes malæ, et purus sermo pulcherrimus firmabitur ab eo.
27 Conturbat domum suam, qui sectatur avaritiam; qui autem odit munera, vivet.	27 Conturbat domum suam qui sectatur avaritiam ; qui autem odit munera, vivet. Per misericordiam et fidem purgantur peccata : per timorem autem Domini declinat omnis a malo.
28 Mens iusti meditatur, ut respondeat; os impiorum redundat malis.	28 Mens justi meditatur obedientiam ; os impiorum redundat malis.
29 Longe est Dominus ab impiis et orationes iustorum exaudiet.	29 Longe est Dominus ab impiis, et orationes justorum exaudiet.
30 Lux oculorum laetificat animam, fama bona impinguat ossa.	30 Lux oculorum lætificat animam ; fama bona impinguat ossa.
31 Auris, quae audit increpationes vitae, in medio sapientium commorabitur.	31 Auris quæ audit increpationes vitæ in medio sapientium commorabitur.
32 Qui abicit disciplinam, despicit animam suam; qui autem acquiescit increpationibus, possessor est cordis.	32 Qui abjicit disciplinam despicit animam suam ; qui autem acquiescit increpationibus possessor est cordis.
33 Timor Domini disciplina sapientiae, et gloriam praecedit humilitas.	33 Timor Domini disciplina sapientiæ, et gloriam præcedit humilitas.