Scrutatio

Domenica, 28 aprile 2024 - San Luigi Maria Grignion da Montfort ( Letture di oggi)

Proverbi 14

font
NOVA VULGATAVULGATA
1 Sapientia mulierum aedificat domum suam,
insipientia eam manibus destruet.
1 Sapiens mulier ædificat domum suam ;
insipiens exstructam quoque manibus destruet.
2 Ambulans recto itinere timet Deum;
despicit illum, qui infami graditur via.
2 Ambulans recto itinere, et timens Deum,
despicitur ab eo qui infami graditur via.
3 In ore stulti virga superbiae,
labia autem sapientium custodiunt eos.
3 In ore stulti virga superbiæ ;
labia autem sapientium custodiunt eos.
4 Ubi non sunt boves, praesepe vacuum est;
plurimae autem segetes in fortitudine bovis.
4 Ubi non sunt boves, præsepe vacuum est ;
ubi autem plurimæ segetes, ibi manifesta est fortitudo bovis.
5 Testis fidelis non mentitur,
profert autem mendacium dolosus testis.
5 Testis fidelis non mentitur ;
profert autem mendacium dolosus testis.
6 Quaerit derisor sapientiam et non invenit;
doctrina prudentibus facilis.
6 Quærit derisor sapientiam, et non invenit ;
doctrina prudentium facilis.
7 Cede coram viro stulto,
quia nescies labia prudentiae.
7 Vade contra virum stultum,
et nescit labia prudentiæ.
8 Sapientia callidi est intellegere viam suam,
et imprudentia stultorum errans.
8 Sapientia callidi est intelligere viam suam,
et imprudentia stultorum errans.
9 Stulti parvipendent peccatum,
et inter iustos morabitur gratia.
9 Stultus illudet peccatum,
et inter justos morabitur gratia.
10 Cor novit amaritudinem animae suae,
in gaudio eius non miscebitur extraneus.
10 Cor quod novit amaritudinem animæ suæ,
in gaudio ejus non miscebitur extraneus.
11 Domus impiorum delebitur,
tabernacula vero iustorum germinabunt.
11 Domus impiorum delebitur :
tabernacula vero justorum germinabunt.
12 Est via, quae videtur homini recta,
novissima autem eius deducunt ad mortem.
12 Est via quæ videtur homini justa,
novissima autem ejus deducunt ad mortem.
13 Etiam in risu cor dolore miscebitur,
et extrema gaudii luctus occupat.
13 Risus dolore miscebitur,
et extrema gaudii luctus occupat.
14 Viis suis replebitur stultus,
et super eum erit vir bonus.
14 Viis suis replebitur stultus,
et super eum erit vir bonus.
15 Simplex credit omni verbo,
astutus considerat gressus suos.
15 Innocens credit omni verbo ;
astutus considerat gressus suos.
Filio doloso nihil erit boni ;
servo autem sapienti prosperi erunt actus,
et dirigetur via ejus.
16 Sapiens timet et declinat a malo,
stultus transilit et confidit.
16 Sapiens timet, et declinat a malo ;
stultus transilit, et confidit.
17 Impatiens operabitur stultitiam,
et vir versutus odiosus est.
17 Impatiens operabitur stultitiam,
et vir versutus odiosus est.
18 Possidebunt simplices stultitiam,
et astuti coronabuntur scientia.
18 Possidebunt parvuli stultitiam,
et exspectabunt astuti scientiam.
19 Procumbunt mali ante bonos,
et impii ante portas iustorum.
19 Jacebunt mali ante bonos,
et impii ante portas justorum.
20 Etiam proximo suo pauper odiosus erit,
amici vero divitum multi.
20 Etiam proximo suo pauper odiosus erit :
amici vero divitum multi.
21 Qui despicit proximum suum, peccat;
qui autem miseretur pauperis, beatus erit.
21 Qui despicit proximum suum peccat ;
qui autem miseretur pauperis beatus erit.
Qui credit in Domino misericordiam diligit.
22 Nonne errant, qui operantur malum?
Misericordia et veritas iis, qui praeparant bona.
22 Errant qui operantur malum ;
misericordia et veritas præparant bona.
23 In omni labore erit abundantia;
verbum autem labiorum tendit tantummodo ad egestatem.
23 In omni opere erit abundantia ;
ubi autem verba sunt plurima, ibi frequenter egestas.
24 Corona sapientium divitiae eorum,
fatuitas stultorum fatuitas est.
24 Corona sapientium divitiæ eorum ;
fatuitas stultorum imprudentia.
25 Liberat animas testis fidelis,
et profert mendacia versipellis.
25 Liberat animas testis fidelis,
et profert mendacia versipellis.
26 In timore Domini fiducia fortis,
et filiis eius erit spes.
26 In timore Domini fiducia fortitudinis,
et filiis ejus erit spes.
27 Timor Domini fons vitae,
declinans a laqueis mortis.
27 Timor Domini fons vitæ,
ut declinent a ruina mortis.
28 In multitudine populi dignitas regis,
et in paucitate plebis ruina principis.
28 In multitudine populi dignitas regis,
et in paucitate plebis ignominia principis.
29 Qui patiens est, multa gubernatur prudentia;
qui autem impatiens est, exaltat stultitiam.
29 Qui patiens est multa gubernatur prudentia ;
qui autem impatiens est exaltat stultitiam suam.
30 Vita carnium sanitas cordis,
putredo ossium invidia.
30 Vita carnium sanitas cordis ;
putredo ossium invidia.
31 Qui calumniatur egentem, exprobrat Factori eius;
honorat autem eum, qui miseretur pauperis.
31 Qui calumniatur egentem exprobrat factori ejus ;
honorat autem eum qui miseretur pauperis.
32 In malitia sua impelletur impius,
sperat autem iustus in integritate sua.
32 In malitia sua expelletur impius :
sperat autem justus in morte sua.
33 In corde prudentis requiescit sapientia,
at in medio stultorum agnoscetur?
33 In corde prudentis requiescit sapientia,
et indoctos quosque erudiet.
34 Iustitia elevat gentem,
vituperium autem populorum est peccatum.
34 Justitia elevat gentem ;
miseros autem facit populos peccatum.
35 Acceptus est regi minister intellegens,
et iracundia ei, qui turpiter agit.
35 Acceptus est regi minister intelligens ;
iracundiam ejus inutilis sustinebit.