Proverbi 11
Confronta con un'altra Bibbia
Cambia Bibbia
NOVA VULGATA | VULGATA |
---|---|
1 Statera dolosa abominatio est apud Dominum, et pondus aequum voluntas eius. | 1 Statera dolosa abominatio est apud Dominum, et pondus æquum voluntas ejus. |
2 Venit superbia, veniet et contumelia; apud humiles autem sapientia. | 2 Ubi fuerit superbia, ibi erit et contumelia ; ubi autem est humilitas, ibi et sapientia. |
3 Simplicitas iustorum diriget eos, et supplantatio perversorum vastabit illos. | 3 Simplicitas justorum diriget eos, et supplantatio perversorum vastabit illos. |
4 Non proderunt divitiae in die ultionis, iustitia autem liberabit a morte. | 4 Non proderunt divitiæ in die ultionis ; justitia autem liberabit a morte. |
5 Iustitia simplicis diriget viam eius, et in impietate sua corruet impius. | 5 Justitia simplicis diriget viam ejus, et in impietate sua corruet impius. |
6 Iustitia rectorum liberabit eos, et in insidiis suis capientur iniqui. | 6 Justitia rectorum liberabit eos, et in insidiis suis capientur iniqui. |
7 Mortuo homine impio, nulla erit ultra spes; et exspectatio divitiarum peribit. | 7 Mortuo homine impio, nulla erit ultra spes, et exspectatio sollicitorum peribit. |
8 Iustus de angustia liberatus est, et tradetur impius pro eo. | 8 Justus de angustia liberatus est, et tradetur impius pro eo. |
9 Simulator ore decipit amicum suum, iusti autem liberabuntur scientia. | 9 Simulator ore decipit amicum suum ; justi autem liberabuntur scientia. |
10 In bonis iustorum exsultabit civitas, et in perditione impiorum erit laudatio. | 10 In bonis justorum exsultabit civitas, et in perditione impiorum erit laudatio. |
11 Benedictione iustorum exaltabitur civitas et ore impiorum subvertetur. | 11 Benedictione justorum exaltabitur civitas, et ore impiorum subvertetur. |
12 Qui despicit amicum suum, indigens corde est, vir autem prudens tacebit. | 12 Qui despicit amicum suum indigens corde est ; vir autem prudens tacebit. |
13 Qui ambulat susurrans, revelat arcana; qui autem fidelis est animi, celat commissum. | 13 Qui ambulat fraudulenter, revelat arcana ; qui autem fidelis est animi, celat amici commissum. |
14 Ubi non adsunt dispositiones, populus corruet; salus autem, ubi multa consilia. | 14 Ubi non est gubernator, populus corruet ; salus autem, ubi multa consilia. |
15 Affligetur malo, qui fidem facit pro extraneo; qui autem odit sponsores, securus erit. | 15 Affligetur malo qui fidem facit pro extraneo ; qui autem cavet laqueos securus erit. |
16 Mulier gratiosa inveniet gloriam, et robusti habebunt divitias. | 16 Mulier gratiosa inveniet gloriam, et robusti habebunt divitias. |
17 Benefacit animae suae vir misericors; qui autem crudelis est, carnem suam affligit. | 17 Benefacit animæ suæ vir misericors ; qui autem crudelis est, etiam propinquos abjicit. |
18 Impius facit opus fallax, seminanti autem iustitiam merces fidelis. | 18 Impius facit opus instabile, seminanti autem justitiam merces fidelis. |
19 Firmus in iustitia praeparat vitam, et sectator malorum mortem. | 19 Clementia præparat vitam, et sectatio malorum mortem. |
20 Abominabile Domino cor pravum, et voluntas eius in iis, qui simpliciter ambulant. | 20 Abominabile Domino cor pravum, et voluntas ejus in iis qui simpliciter ambulant. |
21 Manus in manu, non erit impunitus malus, semen autem iustorum salvabitur. | 21 Manus in manu non erit innocens malus ; semen autem justorum salvabitur. |
22 Circulus aureus in naribus suis mulier pulchra et fatua. | 22 Circulus aureus in naribus suis, mulier pulchra et fatua. |
23 Desiderium iustorum omne bonum est, praestolatio impiorum furor. | 23 Desiderium justorum omne bonum est ; præstolatio impiorum furor. |
24 Alii dividunt propria et ditiores fiunt, alii parciores iusto semper in egestate sunt. | 24 Alii dividunt propria, et ditiores fiunt ; alii rapiunt non sua, et semper in egestate sunt. |
25 Anima, quae benedicit, impinguabitur; et, qui inebriat, ipse quoque inebriatur. | 25 Anima quæ benedicit impinguabitur, et qui inebriat, ipse quoque inebriabitur. |
26 Qui abscondit frumenta, maledicetur in populis, benedictio autem super caput vendentium. | 26 Qui abscondit frumenta maledicetur in populis ; benedictio autem super caput vendentium. |
27 Qui instanter quaerit bonum, quaerit beneplacitum; qui autem investigator malorum est, haec advenient ei. | 27 Bene consurgit diluculo qui quærit bona ; qui autem investigator malorum est, opprimetur ab eis. |
28 Qui confidit in divitiis suis, corruet, iusti autem quasi virens folium germinabunt. | 28 Qui confidit in divitiis suis corruet : justi autem quasi virens folium germinabunt. |
29 Qui conturbat domum suam, possidebit ventos; et, qui stultus est, serviet sapienti. | 29 Qui conturbat domum suam possidebit ventos, et qui stultus est serviet sapienti. |
30 Fructus iusti lignum vitae; et suscipit animas, qui sapiens est. | 30 Fructus justi lignum vitæ, et qui suscipit animas sapiens est. |
31 Si iustus in terra rependitur, quanto magis impius et peccator. | 31 Si justus in terra recipit, quanto magis impius et peccator ! |