Proverbia 31

¹ Verba Lamuelis regis Massa, quae erudivit eum mater eius.

² Quid, fili mi? Quid, fili uteri mei?
Quid, fili votorum meorum?

³ Ne dederis mulieribus substantiam tuam
et vias tuas illis, quae delent reges.

⁴ Non decet reges, o Lamuel, non decet reges bibere vinum,
nec magistratus desiderare siceram,

⁵ ne forte bibant et obliviscantur iudiciorum
et mutent causam omnium filiorum pauperis.

⁶ Date siceram pereunti
et vinum his, qui amaro sunt animo:

⁷ bibat et obliviscatur egestatis suae
et doloris sui non recordetur amplius.

⁸ Aperi os tuum pro muto
et causis omnium filiorum, qui pereunt;

⁹ aperi os tuum, decerne, quod iustum est,
et iudica inopem et pauperem.

¹⁰ ALEPH. Mulierem fortem quis inveniet?
Longe super gemmas pretium eius.

¹¹ BETH. Confidit in ea cor viri sui et spoliis non indigebit.

¹² GHIMEL. Reddet ei bonum et non malum omnibus diebus vitae suae.

¹³ DALETH. Quaesivit lanam et linum
et operata est delectatione manuum suarum.

¹⁴ HE. Facta est quasi navis institoris
de longe portans panem suum.

¹⁵ VAU. Et de nocte surrexit
deditque praedam domesticis suis
et cibaria ancillis suis.

¹⁶ ZAIN. Consideravit agrum et emit eum;
de fructu manuum suarum plantavit vineam.

¹⁷ HETH. Accinxit fortitudine lumbos suos
et roboravit brachium suum.

¹⁸ TETH. Gustavit et vidit quia bona est negotiatio eius;
non exstinguetur in nocte lucerna eius.

¹⁹ IOD. Manum suam misit ad colos,
et digiti eius apprehenderunt fusum.

²⁰ CAPH. Palmas suas aperuit inopi
et manum suam extendit ad pauperem.

²¹ LAMED. Non timebit domui suae a frigoribus nivis:
omnes enim domestici eius vestiti sunt duplicibus.

²² MEM. Stragulatam vestem fecit sibi;
byssus et purpura indumentum eius.

²³ NUN. Nobilis in portis vir eius,
quando sederit cum senatoribus terrae.

²⁴ SAMECH. Sindonem fecit et vendidit
et cingulum tradidit Chananaeo.

²⁵ Ain. Fortitudo et decor indumentum eius,
et ridebit in die novissimo.

²⁶ PHE. Os suum aperuit sapientiae,
et lex clementiae in lingua eius.

²⁷ SADE. Consideravit semitas domus suae
et panem otiosa non comedit.

²⁸ COPH. Surrexerunt filii eius et beatissimam praedicaverunt,
vir eius et laudavit eam:

²⁹ RES. “ Multae filiae fortiter operatae sunt,
tu supergressa es universas ”.

³⁰ SIN. Fallax gratia et vana est pulchritudo;
mulier timens Dominum ipsa laudabitur.

³¹ TAU. Date ei de fructu manuum suarum,
et laudent eam in portis opera eius.