---

¹Laus sapientiae.
Sapientia laudabit animam suam et in Deo honorabitur
et in medio populi sui gloriabitur
²et in ecclesia Altissimi aperiet os suum
et in conspectu virtutis illius gloriabitur
³et in medio populi sui exaltabitur
et in plenitudine sancta admirabitur
⁴et in multitudine electorum habebit laudem
et inter benedictos benedicetur dicens:
⁵“ Ego ex ore Altissimi prodivi,
primogenita ante omnem creaturam.
⁶Ego feci in caelis, ut oriretur lumen indeficiens,
et sicut nebula texi omnem terram.
⁷Ego in altissimis habitavi,
et thronus meus in columna nubis.
⁸Gyrum caeli circuivi sola
et in profundum abyssi ambulavi,
⁹in fluctibus maris et in omni terra steti
¹⁰et in omni populo et in omni gente primatum habui
¹¹et omnium excellentium et humilium corda virtute calcavi.
In his omnibus requiem quaesivi:
cuius in hereditate morabor?
¹²Tunc praecepit et dixit mihi Creator omnium,
et, qui creavit me, quietem dedit tabernaculo meo
¹³et dixit mihi: “In Iacob inhabita et in Israel hereditare
et in electis meis mitte radices”.
¹⁴Ab initio ante saecula creata sum
et usque ad futurum saeculum non desinam.
¹⁵Et in tabernaculo sancto coram ipso ministravi,
et sic in Sion firmata sum
et in civitate similiter dilecta requievi,
et in Ierusalem potestas mea.
¹⁶Et radicavi in populo honorificato
et in parte Domini, in hereditate illius,
et in plenitudine sanctorum detentio mea.
¹⁷Quasi cedrus exaltata sum in Libano,
et quasi cupressus in montibus Hermon.
¹⁸Quasi palma exaltata sum in Engaddi,
et quasi plantatio rosae in Iericho.
¹⁹Quasi oliva speciosa in campis,
et quasi platanus exaltata sum iuxta aquam in plateis.
²⁰Sicut cinnamomum et balsamum aromatizans odorem dedi;
quasi myrrha electa dedi suavitatem odoris.
²¹Et quasi storax et galbanus et ungula et gutta,
et quasi libani vapor in tabernaculo.
²²Ego quasi terebinthus extendi ramos meos,
et rami mei rami honoris et gratiae.
²³Ego quasi vitis germinavi gratiam,
et flores mei fructus honoris et honestatis.
²⁴Ego mater pulchrae dilectionis et timoris
et agnitionis et sanctae spei.
²⁵In me gratia omnis viae et veritatis,
in me omnis spes vitae et virtutis.
²⁶Transite ad me, omnes, qui concupiscitis me,
et a generationibus meis implemini.
²⁷Doctrina enim mea super mel dulcis, et hereditas mea super mel et favum;
²⁸memoria mea in generationes saeculorum.
²⁹Qui edunt me, adhuc esurient;
et, qui bibunt me, adhuc sitient.
³⁰Qui audit me, non confundetur;
et, qui operantur in me, non peccabunt:
³¹qui elucidant me, vitam aeternam habebunt ”.
³²Haec omnia liber testamenti Altissimi,
³³lex, quam mandavit nobis Moyses,
hereditas domui Iacob.
³⁴Posuit David puero suo excitare regem ex ipso fortissimum,
et in throno honoris sedentem in sempiternum.
³⁵Lex, quae implet quasi Phison sapientiam
et sicut Tigris in diebus novorum,
³⁶quae adimplet quasi Euphrates sensum
et quasi Iordanis in tempore messis,
³⁷quae redundavit disciplina sicut Nilus
et assistens quasi Geon in die vindemiae.
³⁸Non perfecit primus scire ipsam,
sic nec ultimus investigavit eam.
³⁹Super mare enim abundavit cogitatio eius,
et consilium illius super abyssum magnam.
⁴⁰Ego sapientia effudi flumina,
⁴¹ego quasi trames aquae immensae de fluvio
et sicut aquaeductus exivi in paradisum.
⁴²Dixi: “ Rigabo hortum meum plantationum
et inebriabo prati mei fructum ”.
⁴³Et ecce factus est mihi trames in fluvium,
et fluvius meus appropinquavit ad mare.
⁴⁴Quoniam doctrinam quasi antelucanum illuminabo
et enarrabo illam usque ad longinquum.
⁴⁵Penetrabo omnes inferiores partes terrae
et inspiciam omnes dormientes
et illuminabo omnes sperantes in Domino;
⁴⁶adhuc doctrinam quasi prophetiam effundam
et relinquam illam in generationes saeculorum
et non desinam in progenies illorum usque in aevum sanctum.
⁴⁷Videte quoniam non soli mihi laboravi,
sed omnibus exquirentibus illam.

---

Gen Ex Lv Nm Deut Ios Iudc Ruth 1 Re 2 Re 3 Re 4 Re 1 Par 2 Par Esd Neh Tob Iudt Esth 1 Mach 2 Mach Iob Ps Prov Eccle Cant Sap Eccli Isa Ier Lam Bar Ez Dan Os Ioel Am Abd Ion Mi Nah Hab Soph Agg Zach Mal Mt Mc Lc Io Act Rom 1Cor 2Cor Gal Eph Phil Col 1 Thess 2 Thess 1 Tim 2 Tim Tit Philem Hebr Iac 1 Pt 2 Pt 1 Io 2 Io 3 Io Iud Apoc