Ecclesiasticus 14

¹ Beatus vir, qui non est lapsus verbo ex ore suo
et non est stimulatus in tristitia delicti.

² Felix, quem non condemnat anima sua,
et non excidit a spe sua.

³ Viro tenaci sine ratione est substantia;
et homini livido ad quid aurum?

⁴ Qui denegat animo suo iniuste, aliis congregat,
et in bonis illius alius luxuriabitur.

⁵ Qui sibi nequam est, cui alii bonus erit?
Et non iucundabitur in bonis suis.

⁶ Qui sibi invidet, nihil est illo nequius;
et haec redditio est malitiae illius.

⁷ Et, si bene fecerit, ignoranter et non volens facit
et in novissimo manifestat malitiam suam.

⁸ Nequam est oculus lividi
et avertens faciem suam et despiciens animas.

⁹ Insatiabilis oculus cupidi in parte non satiabitur,
donec consumat arefaciens animam suam.

¹⁰ Oculus malus lividus irruit in panem
et neglegens est mensae suae.

¹¹ Fili, si habes, benefac tecum
et Deo dignas oblationes offer.

¹² Memor esto quoniam mors non tardat,
et decretum inferorum quia non demonstratum est tibi;
decretum enim huius mundi: morte morietur.

¹³ Ante mortem benefac amico tuo
et secundum vires tuas exporrigens da ei.

¹⁴ Non defrauderis a bono diei,
et particula desiderii boni non te praetereat.

¹⁵ Nonne aliis relinques res dolore partas
et labores tuos in divisione sortis?

¹⁶ Da et accipe et oblecta animam tuam;

¹⁷ ante obitum tuum operare iustitiam,
quoniam non est apud inferos quaerere voluptates.

¹⁸ Omnis caro sicut vestimentum veterascet
et sicut folium fructificans in arbore viridi:
alia generantur, et alia deiciuntur;

¹⁹ sic generatio carnis et sanguinis:
alia finitur, et alia nascitur.

²⁰ Omne opus corruptibile in fine deficiet,
et, qui illud operatur, ibit cum illo;

²¹ et omne opus electum iustificabitur,
et, qui operatur illud, honorabitur in illo.

²² Beatus vir, qui in sapientia morabitur
et qui in iustitia sua meditabitur
et in sensu cogitabit circumspectionem Dei;

²³ qui excogitat vias illius in corde suo
et in absconditis suis intellegens,
vadens post illam quasi investigator
et in viis illius consistens;

²⁴ qui respicit per fenestras illius
et in ianuis illius audiens;

²⁵ qui requiescit iuxta domum illius
et in parietibus illius figens palum,
statuet casulam suam ad manus illius
et requiescet in deversorio bonorum per aevum.

²⁶ Statuet filios suos sub tegmine illius
et sub ramis eius morabitur;

²⁷ protegetur sub tegmine illius a fervore
et in gloria eius requiescet.