---

¹Luxuriosa res vinum, et tumultuosa sicera;
quicumque his delectatur, non erit sapiens.
²Sicut rugitus leonis ita et terror regis:
qui provocat eum, peccat in animam suam.
³Honor est homini separari a contentionibus;
omnes autem stulti miscentur contumeliis.
⁴Propter frigus piger arare noluit;
mendicabit ergo aestate, et non dabitur illi.
⁵Sicut aqua profunda consilium in corde viri,
sed homo sapiens exhauriet illud.
⁶Multi homines misericordes vocantur;
virum autem fidelem quis inveniet?
⁷Iustus, qui ambulat in simplicitate sua,
beatos post se filios derelinquet.
⁸Rex, qui sedet in solio iudicii,
dissipat omne malum intuitu suo.
⁹Quis potest dicere: “ Mundavi cor meum,
purus sum a peccato ”?
¹⁰Pondus et pondus, mensura et mensura,
utrumque abominabile est apud Dominum.
¹¹Ex studiis suis intellegitur puer,
si munda et recta sint opera eius.
¹²Aurem audientem et oculum videntem,
Dominus fecit utrumque.
¹³Noli diligere somnum, ne te egestas opprimat;
aperi oculos tuos et saturare panibus.
¹⁴“ Malum est, malum est! ” dicit omnis emptor
et, cum recesserit, tunc gloriabitur.
¹⁵Est aurum et multitudo gemmarum
et vas pretiosum labia scientiae.
¹⁶Tolle vestimentum eius, quia fideiussor exstitit alieni,
et pro extraneis aufer pignus ab eo.
¹⁷Suavis est homini panis mendacii,
et postea implebitur os eius calculo. ¹⁸Cogitationes consiliis firmantur,
et dispensationibus tractanda sunt bella.
¹⁹Ei, qui revelat mysteria et calumniatur
et dilatat labia sua, ne commiscearis.
²⁰Qui maledicit patri suo et matri,
exstinguetur lucerna eius in mediis tenebris.
²¹Hereditas, ad quam festinatur in principio,
in novissimo benedictione carebit.
²²Ne dicas: “ Reddam malum ”;
exspecta Dominum, et liberabit te. ²³Abominatio est apud Dominum pondus etpondus;
statera dolosa non est bona in oculis eius.
²⁴A Domino diriguntur gressus viri;
quis autem hominum intellegere potest viam suam?
²⁵Laqueus est homini inconsulte dicere: “ Sanctum! ”
et post vota retractare.
²⁶Ventilat impios rex sapiens
et incurvat super eos rotam.
²⁷Lucerna Domini spiraculum hominis,
quae investigat omnia secreta ventris.
²⁸Misericordia et veritas custodiunt regem,
et roboratur clementia thronus eius.
²⁹Ornamentum iuvenum fortitudo eorum,
et honor senum canities.
³⁰Livor vulneris absterget mala,
et plagae in secretioribus ventris.

---

Gen Ex Lv Nm Deut Ios Iudc Ruth 1 Re 2 Re 3 Re 4 Re 1 Par 2 Par Esd Neh Tob Iudt Esth 1 Mach 2 Mach Iob Ps Prov Eccle Cant Sap Eccli Isa Ier Lam Bar Ez Dan Os Ioel Am Abd Ion Mi Nah Hab Soph Agg Zach Mal Mt Mc Lc Io Act Rom 1Cor 2Cor Gal Eph Phil Col 1 Thess 2 Thess 1 Tim 2 Tim Tit Philem Hebr Iac 1 Pt 2 Pt 1 Io 2 Io 3 Io Iud Apoc