Isaia 3
Confronta con un'altra Bibbia
Cambia Bibbia
NOVA VULGATA | VULGATA |
---|---|
1 Ecce enim Dominator, Dominus exercituum, aufert a Ierusalem et a Iuda robur et praesidium, omne robur panis et omne robur aquae, | 1 Ecce enim Dominator, Dominus exercituum, auferet a Jerusalem et a Juda validum et fortem, omne robur panis, et omne robor aquæ ; |
2 fortem et virum bellatorem, iudicem et prophetam et hariolum et senem, | 2 fortem, et virum bellatorem, judicem, et prophetam, et ariolum, et senem ; |
3 principem super quinquaginta et honorabilem vultu et consiliarium et sapientem magum et prudentem incantatorem. | 3 principem super quinquaginta, et honorabilem vultu et consiliarium, et sapientem de architectis, et prudentem eloquii mystici. |
4 Et dabo pueros principes eorum; et infantes dominabuntur eis. | 4 Et dabo pueros principes eorum, et effeminati dominabuntur eis ; |
5 Et irruet populus, vir ad virum, unusquisque ad proximum suum: tumultuabitur puer contra senem, et ignobilis contra nobilem. | 5 et irruet populus, vir ad virum, et unusquisque ad proximum suum ; tumultuabitur puer contra senem, et ignobilis contra nobilem. |
6 Apprehendet enim vir fratrem suum in domo patris sui: “ Vestimentum tibi est, princeps esto noster, ruina autem haec sub manu tua ”. | 6 Apprehendet enim vir fratrem suum, domesticum patris sui : Vestimentum tibi est, princeps esto noster, ruina autem hæc sub manu tua. |
7 Clamabit in die illa dicens: “ Non sum medicus, et in domo mea non est panis neque vestimentum; nolite constituere me principem populi ”. | 7 Respondebit in die illa, dicens : Non sum medicus, et in domo mea non est panis neque vestimentum : nolite constituere me principem populi. |
8 Ruit enim Ierusalem, et Iudas concidit, quia lingua eorum et adinventiones eorum contra Dominum, ut provocarent oculos maiestatis eius. | 8 Ruit enim Jerusalem, et Judas concidit, quia lingua eorum et adinventiones eorum contra Dominum, ut provocarent oculos majestatis ejus. |
9 Procacitas vultus eorum accusat eos, et peccatum suum quasi Sodoma praedicaverunt nec absconderunt; vae animae eorum, quoniam reddita sunt eis mala! | 9 Agnitio vultus eorum respondit eis ; et peccatum suum quasi Sodoma prædicaverunt, nec absconderunt. Væ animæ eorum, quoniam reddita sunt eis mala ! |
10 Dicite iusto: “ Bene! ”, quoniam fructum adinventionum suarum comedet. | 10 Dicite justo quoniam bene, quoniam fructum adinventionum suarum comedet. |
11 Vae impio in malum: retributio enim manuum eius fiet ei! | 11 Væ impio in malum ! retributio enim manuum ejus fiet ei. |
12 Populum meum opprimit infans, et mulieres dominantur ei. Popule meus, qui te beatum dicunt, ipsi te decipiunt et viam gressuum tuorum dissipant. | 12 Populum meum exactores sui spoliaverunt, et mulieres dominatæ sunt eis. Popule meus, qui te beatum dicunt, ipsi te decipiunt, et viam gressuum tuorum dissipant. |
13 Surgit ad arguendum Dominus et stat ad iudicandos populos. | 13 Stat ad judicandum Dominus, et stat ad judicandos populos. |
14 Dominus ad iudicium veniet cum senibus populi sui et principibus eius: “ Vos enim depasti estis vineam, et rapina pauperis in domibus vestris. | 14 Dominus ad judicium veniet cum senibus populi sui, et principibus ejus ; vos enim depasti estis vineam, et rapina pauperis in domo vestra. |
15 Quare atteritis populum meum et facies pauperum commolitis? ”, dicit Dominus, Deus exercituum. | 15 Quare atteritis populum meum, et facies pauperum commolitis ? dicit Dominus Deus exercituum. |
16 Et dixit Dominus: “ Pro eo quod elevatae sunt filiae Sion et ambulaverunt extento collo et nutibus oculorum, parvis passibus incedebant et catenulis pedum tinniebant, | 16 Et dixit Dominus : Pro eo quod elevatæ sunt filiæ Sion, et ambulaverunt extento collo, et nutibus oculorum ibant, et plaudebant, ambulabant pedibus suis, et composito gradu incedebant ; |
17 decalvabit Dominus verticem filiarum Sion et Dominus crinem earum nudabit ”. | 17 decalvabit Dominus verticem filiarum Sion, et Dominus crinem earum nudabit. |
18 In die illa auferet Dominus ornamentum calceamentorum et torques | 18 In die illa auferet Dominus ornamentum calceamentum, |
19 et lunulas et inaures et armillas et mitras, | 19 et lunulas, et torques, et monilia, et armillas, et mitras, |
20 discriminalia et periscelidas et fascias et olfactoriola | 20 et discriminalia, et periscelidas, et murenulas, et olfactoriola, et inaures, |
21 et anulos et ornamenta narium, | 21 et annulos, et gemmas in fronte pendentes, |
22 mutatoria et palliola et linteamina et marsupia, | 22 et mutatoria, et palliola, et linteamina, et acus, |
23 specula et sindones et vittas et pallia. | 23 et specula, et sindones, et vittas, et theristra. |
24 Et erit pro suavi odore foetor, et pro zona funiculus, et pro crispante crine calvitium, et pro fascia pectorali cilicium, stigma pro pulchritudine. | 24 Et erit pro suavi odore fœtor, et pro zona funiculus, et pro crispanti crine calvitium, et pro fascia pectorali cilicium. |
25 Viri tui gladio cadent, et fortes tui in proelio, | 25 Pulcherrimi quoque viri tui gladio cadent, et fortes tui in prælio. |
26 et maerebunt atque lugebunt portae eius, et desolata in terra sedebit. | 26 Et mœrebunt atque lugebunt portæ ejus, et desolata in terra sedebit. |