Isaia 22

¹ Oraculum vallis Visionis.
Quidnam tibi est,
quia ascendisti omnis in tecta,

² clamoris plena, urbs tumultuans,
civitas exsultans?
Interfecti tui non interfecti gladio
nec mortui in bello;

³ cuncti principes tui fugerunt
simul sine arcu capti;
omnes, qui inventi sunt, capti sunt simul,
procul fugerunt.

⁴ Propterea dixi: “ Recedite a me,
amare flebo;
nolite incumbere, ut consolemini me
super vastitate filiae populi mei ”.

⁵ Dies enim confusionis
et conculcationis et fletus
Domino, Deo exercituum, in valle Visionis,
eversio murorum et vociferatio ad montem.

⁶ Et Elam sumpsit pharetram,
in agmine hominum equitum,
et Cir nudavit clipeum.

⁷ Et electae valles tuae
plenae sunt quadrigarum,
et equites ponunt sedes suas in porta.

⁸ Et revelatum est operimentum Iudae,
et respexisti in die illa armamentarium domus Saltus;

⁹ et scissuras civitatis David vidistis,
quia multiplicatae sunt;
et congregastis aquas piscinae inferioris.

¹⁰ Et domos Ierusalem numerastis
et destruxistis domos
ad muniendum murum;

¹¹ et lacum fecistis inter duos muros
pro aqua piscinae veteris;
sed non suspexistis ad eum, qui fecit haec,
et eum, qui haec de longe formavit, non vidistis.

¹² Et vocavit Dominus, Deus exercituum, in die illa
ad fletum et ad planctum,
ad calvitium et ad cingendum saccum;

¹³ et ecce gaudium et laetitia,
occidere boves et iugulare pecus,
comedere carnes et bibere vinum:
“ Comedamus et bibamus,
cras enim moriemur ”.

¹⁴ Et revelatum est in auribus meis
a Domino exercituum:
“ Certe non dimittetur iniquitas haec vobis, donec moriamini! ”,
dicit Dominus, Deus exercituum.

¹⁵ Haec dicit Dominus, Deus exercituum:
“ Vade, ingredere ad procuratorem istum,
ad Sobnam praepositum palatii:

¹⁶ “Quid tibi hic? Aut quis tibi hic,
quia excidisti tibi hic sepulcrum?”.
Effodiens in excelso sepulcrum suum,
excavabat in petra tabernaculum sibi.

¹⁷ Ecce Dominus vehementer proiciet te, homo,
violenter te apprehendens.

¹⁸ In globum te convolvet glomerans;
quasi pilam mittet te
in terram latam et spatiosam:
ibi morieris,
et ibi erunt currus gloriae tuae,
ignominia domus domini tui.

¹⁹ Et expellam te de statione tua
et de ministerio tuo deponam te.

²⁰ Et erit in die illa:
vocabo servum meum Eliachim filium Helciae

²¹ et induam illum tunicam tuam
et cingulo tuo cingam eum
et potestatem tuam dabo in manu eius;
et erit in patrem habitantibus Ierusalem
et domui Iudae.

²² Et dabo clavem domus David
super umerum eius;
et aperiet, et non erit qui claudat;
et claudet, et non erit qui aperiat.

²³ Et figam illum paxillum in loco securo,
et erit in solium gloriae domui patris sui.

²⁴ Et suspendent super eum omnem gloriam domus patris sui, propagines etstirpes, omne vas parvulum, a pelvibus ad amphoras.

²⁵ In die illa, dicitDominus exercituum, auferetur paxillus, qui fixus fuerat in loco securo, etfrangetur et cadet; et peribit, quod pependerat in eo, quia Dominus locutus est”.