Scrutatio

Lunedi, 29 aprile 2024 - Santa Caterina da Siena ( Letture di oggi)

Proverbi 16

font
NOVA VULGATAVULGATA
1 Hominis est animum praeparare,
et Domini est responsio linguae.
1 Hominis est animam præparare,
et Domini gubernare linguam.
2 Omnes viae hominis purae sunt oculis eius,
spirituum ponderator est Dominus.
2 Omnes viæ hominis patent oculis ejus ;
spirituum ponderator est Dominus.
3 Revela Domino opera tua,
et dirigentur cogitationes tuae.
3 Revela Domino opera tua,
et dirigentur cogitationes tuæ.
4 Universa secundum proprium finem operatus est Dominus;
impium quoque ad diem malum.
4 Universa propter semetipsum operatus est Dominus ;
impium quoque ad diem malum.
5 Abominatio Domini est omnis arrogans;
manus in manu, non erit innocens.
5 Abominatio Domini est omnis arrogans ;
etiamsi manus ad manum fuerit, non est innocens.
Initium viæ bonæ facere justitiam ;
accepta est autem apud Deum magis quam immolare hostias.
6 Misericordia et veritate redimitur iniquitas,
et in timore Domini declinatur a malo.
6 Misericordia et veritate redimitur iniquitas,
et in timore Domini declinatur a malo.
7 Cum placuerint Domino viae hominis,
inimicos quoque eius convertet ad pacem.
7 Cum placuerint Domino viæ hominis,
inimicos quoque ejus convertet ad pacem.
8 Melius est parum cum iustitia
quam multi fructus sine aequitate.
8 Melius est parum cum justitia
quam multi fructus cum iniquitate.
9 Cor hominis disponit viam suam,
sed Domini est dirigere gressus eius.
9 Cor hominis disponit viam suam,
sed Domini est dirigere gressus ejus.
10 Divinatio in labiis regis,
in iudicio non errabit os eius.
10 Divinatio in labiis regis ;
in judicio non errabit os ejus.
11 Pondus et statera iusta Domini sunt,
et opera eius omnes lapides sacculi.
11 Pondus et statera judicia Domini sunt,
et opera ejus omnes lapides sacculi.
12 Abominantur reges agere impie,
quoniam iustitia firmatur solium.
12 Abominabiles regi qui agunt impie,
quoniam justitia firmatur solium.
13 Voluntas regum labia iusta;
qui recta loquitur, diligetur.
13 Voluntas regum labia justa ;
qui recta loquitur diligetur.
14 Indignatio regis nuntii mortis,
et vir sapiens placabit eam.
14 Indignatio regis nuntii mortis,
et vir sapiens placabit eam.
15 In lumine vultus regis vita,
et voluntas eius quasi imber serotinus.
15 In hilaritate vultus regis vita,
et clementia ejus quasi imber serotinus.
16 Possidere sapientiam quanto melius est auro;
et acquirere prudentiam pretiosius est argento.
16 Posside sapientiam, quia auro melior est,
et acquire prudentiam, quia pretiosior est argento.
17 Semita iustorum declinare a malo;
custos animae suae, qui servat viam suam.
17 Semita justorum declinat mala ;
custos animæ suæ servat viam suam.
18 Contritionem praecedit superbia,
et ante ruinam exaltatio spiritus.
18 Contritionem præcedit superbia,
et ante ruinam exaltatur spiritus.
19 Melius est humiliari cum mitibus
quam dividere spolia cum superbis.
19 Melius est humiliari cum mitibus
quam dividere spolia cum superbis.
20 Eruditus in verbo reperiet bona;
et, qui sperat in Domino, beatus est.
20 Eruditus in verbo reperiet bona,
et qui sperat in Domino beatus est.
21 Qui sapiens est corde, appellabitur prudens;
et dulcedo labiorum addet doctrinam.
21 Qui sapiens est corde appellabitur prudens,
et qui dulcis eloquio majora percipiet.
22 Fons vitae eruditio possidentis;
poena stultorum stultitia.
22 Fons vitæ eruditio possidentis ;
doctrina stultorum fatuitas.
23 Cor sapientis erudiet os eius
et labiis eius addet doctrinam.
23 Cor sapientis erudiet os ejus,
et labiis ejus addet gratiam.
24 Favus mellis composita verba,
dulcedo animae et sanitas ossium.
24 Favus mellis composita verba ;
dulcedo animæ sanitas ossium.
25 Est via, quae videtur homini recta,
et novissima eius ducunt ad mortem.
25 Est via quæ videtur homini recta,
et novissima ejus ducunt ad mortem.
26 Anima laborantis laborat sibi,
quia compulit eum os suum.
26 Anima laborantis laborat sibi,
quia compulit eum os suum.
27 Vir impius fodit malum,
et in labiis eius quasi ignis ardens.
27 Vir impius fodit malum,
et in labiis ejus ignis ardescit.
28 Homo perversus suscitat lites,
et mussitator separat familiares.
28 Homo perversus suscitat lites,
et verbosus separat principes.
29 Vir iniquus lactat amicum suum
et ducit eum per viam non bonam.
29 Vir iniquus lactat amicum suum,
et ducit eum per viam non bonam.
30 Qui attonitis oculis cogitat prava,
comprimens labia sua perficit malum.
30 Qui attonitis oculis cogitat prava,
mordens labia sua perficit malum.
31 Corona dignitatis canities,
quae in viis iustitiae reperietur.
31 Corona dignitatis senectus,
quæ in viis justitiæ reperietur.
32 Melior est patiens viro forti,
et, qui dominatur animo suo, expugnatore urbium.
32 Melior est patiens viro forti,
et qui dominatur animo suo expugnatore urbium.
33 Sortes mittuntur in sinum,
sed a Domino temperantur.
33 Sortes mittuntur in sinum,
sed a Domino temperantur.