---

¹et ab iteratione sermonis auditus
et a revelatione sermonis absconditi.
Et eris vere sine confusione
et invenies gratiam in conspectu omnium hominum.
Ne pro his omnibus confundaris,
ne accipias personam, ut delinquas:
²de lege Altissimi et testamento
et de iudicio, iustificans impium,
³de ratione sociorum et viatorum
et de datione hereditatis alienorum,
⁴de aequalitate staterae et ponderum,
de acquisitione multorum et paucorum,
⁵de pretio emptionis negotiatorum
et de multa disciplina filiorum
et servo pessimo latus sanguinare.
⁶Super mulierem nequam bonum est signum;
⁷ubi manus multae sunt, claude
et, quodcumque trades, numera et appende:
datum vero et acceptum omne describe.
⁸De disciplina insensati et fatui
et de seniore, qui iudicatur de fornicatione;
et eris eruditus in veritate
et probatus in conspectu omnium vivorum.
⁹Filia patri est abscondita vigilia,
et sollicitudo eius aufert somnum:
in adulescentia sua, ne forte adulta efficiatur,
viro nuptum locata, ne odibilis fiat;
¹⁰ne quando polluatur in virginitate sua
et in paternis suis gravida inveniatur;
ne forte viro desponsata transgrediatur
aut, cum eo commorata, ne sterilis inveniatur.
¹¹Super filiam immodestam confirma custodiam,
ne quando faciat te in opprobrium venire inimicis,
in detractionem in civitate et obiectionem plebis,
et confundat te in multitudine populi.
¹²Omni homini ne det speciem
et in medio mulierum non commoretur;
¹³de vestimentis enim procedit tinea,
et a muliere iniquitas mulieris.
¹⁴Melior est enim iniquitas viri quam mulier benefaciens,
et mulier confundens in opprobrium.
¹⁵Memor ero igitur operum Domini
et, quae vidi, annuntiabo:
in sermonibus Domini opera eius,
et factum est in voluntate sua iudicium.
¹⁶Sol illuminans per omnia respexit,
et gloria Domini plenum est opus eius.
¹⁷Non valent sancti Domini
enarrare omnia mirabilia eius.
Confirmavit Dominus exercitus suos
stabiliri coram gloria sua.
¹⁸Abyssum et cor hominum investigavit
et in astutia eorum excogitavit.
¹⁹Cognovit enim Dominus omnem scientiam
et inspexit in signum aevi
annuntians, quae praeterierunt et quae superventura sunt,
et revelans vestigia occultorum.
²⁰Non praeterit illum omnis cogitatus,
et non abscondit se ab eo ullus sermo.
²¹Magnalia sapientiae suae ordinavit,
unicus est ante saeculum et usque in saeculum;
neque augetur ²²neque minuitur
et non eget alicuius consilio.
²³Quam desiderabilia omnia opera eius,
et tamquam scintilla spectatu!
²⁴Omnia haec vivunt et manent in saeculum,
et in omni necessitate omnia obaudiunt ei;
²⁵omnia duplicia, unum contra unum,
et non fecit quidquam deficiens.
²⁶Alterum alterius confirmat bonum;
et quis satiabitur videns gloriam eius?

---

Gen Ex Lv Nm Deut Ios Iudc Ruth 1 Re 2 Re 3 Re 4 Re 1 Par 2 Par Esd Neh Tob Iudt Esth 1 Mach 2 Mach Iob Ps Prov Eccle Cant Sap Eccli Isa Ier Lam Bar Ez Dan Os Ioel Am Abd Ion Mi Nah Hab Soph Agg Zach Mal Mt Mc Lc Io Act Rom 1Cor 2Cor Gal Eph Phil Col 1 Thess 2 Thess 1 Tim 2 Tim Tit Philem Hebr Iac 1 Pt 2 Pt 1 Io 2 Io 3 Io Iud Apoc