Proverbi 28

NOVA VULGATA	VULGATA
1 Fugit impius, nemine persequente; iustus autem quasi leo confidens.	1 Fugit impius nemine persequente ; justus autem, quasi leo confidens, absque terrore erit.
2 Propter peccata terrae multi principes eius; et propter hominem intellegentem et sapientem rectus ordo longior erit.	2 Propter peccata terræ multi principes ejus ; et propter hominis sapientiam, et horum scientiam quæ dicuntur, vita ducis longior erit.
3 Vir pauper et calumnians pauperes similis est imbri vehementi, in quo paratur fames.	3 Vir pauper calumnians pauperes similis est imbri vehementi in quo paratur fames.
4 Qui derelinquunt legem, laudant impium; qui custodiunt, succenduntur contra eum.	4 Qui derelinquunt legem laudant impium ; qui custodiunt, succenduntur contra eum.
5 Viri mali non intellegunt iudicium; qui autem requirunt Dominum, animadvertunt omnia.	5 Viri mali non cogitant judicium ; qui autem inquirunt Dominum animadvertunt omnia.
6 Melior est pauper ambulans in simplicitate sua quam perversus in viis suis, quamquam dives.	6 Melior est pauper ambulans in simplicitate sua quam dives in pravis itineribus.
7 Qui custodit legem, filius sapiens est; qui autem comissatores pascit, confundit patrem suum.	7 Qui custodit legem filius sapiens est ; qui autem comessatores pascit confundit patrem suum.
8 Qui coacervat divitias suas usuris et fenore, liberali in pauperes congregat eas.	8 Qui coacervat divitias usuris et fœnore, liberali in pauperes congregat eas.
9 Qui declinat aures suas, ne audiat legem, oratio quoque eius erit exsecrabilis.	9 Qui declinat aures suas ne audiat legem, oratio ejus erit execrabilis.
10 Qui decipit iustos in via mala, in interitu suo corruet, et simplices possidebunt bona eius.	10 Qui decipit justos in via mala, in interitu suo corruet, et simplices possidebunt bona ejus.
11 Sapiens sibi videtur vir dives, pauper autem prudens scrutabitur eum.	11 Sapiens sibi videtur vir dives ; pauper autem prudens scrutabitur eum.
12 In exsultatione iustorum multa gloria est, et, cum exaltantur impii, abscondit se homo.	12 In exsultatione justorum multa gloria est ; regnantibus impiis, ruinæ hominum.
13 Qui abscondit scelera sua, non prosperabit; qui autem confessus fuerit et reliquerit ea, misericordiam consequetur.	13 Qui abscondit scelera sua non dirigetur ; qui autem confessus fuerit et reliquerit ea, misericordiam consequetur.
14 Beatus homo, qui semper est pavidus; qui vero indurat cor suum, corruet in malum.	14 Beatus homo qui semper est pavidus ; qui vero mentis est duræ corruet in malum.
15 Leo rugiens et ursus esuriens princeps impius super populum pauperem.	15 Leo rugiens et ursus esuriens, princeps impius super populum pauperem.
16 Dux indigens prudentia multos opprimet; qui autem odit avaritiam, longi fient dies eius.	16 Dux indigens prudentia multos opprimet per calumniam ; qui autem odit avaritiam, longi fient dies ejus.
17 Hominem, animae cuiusdam sanguine gravatum, si usque ad lacum fugerit, nemo sustineat.	17 Hominem qui calumniatur animæ sanguinem, si usque ad lacum fugerit, nemo sustinet.
18 Qui ambulat simpliciter, salvus erit; qui perversis graditur viis, subito concidet.	18 Qui ambulat simpliciter salvus erit ; qui perversis graditur viis concidet semel.
19 Qui operatur terram suam, satiabitur panibus; qui autem sectatur otium, replebitur egestate.	19 Qui operatur terram suam satiabitur panibus ; qui autem sectatur otium replebitur egestate.
20 Vir fidelis multum laudabitur; qui autem festinat ditari, non erit innocens.	20 Vir fidelis multum laudabitur ; qui autem festinat ditari non erit innocens.
21 Qui dignoscit in iudicio faciem, non benefacit; et pro buccella panis praevaricatur homo.	21 Qui cognoscit in judicio faciem non bene facit ; iste et pro buccella panis deserit veritatem.
22 Festinat ditari vir invidus, ignorat quod egestas superveniet ei.	22 Vir qui festinat ditari, et aliis invidet, ignorat quod egestas superveniet ei.
23 Qui corripit hominem, gratiam postea inveniet magis quam ille, qui lingua blanditur.	23 Qui corripit hominem gratiam postea inveniet apud eum, magis quam ille qui per linguæ blandimenta decipit.
24 Qui abripit aliquid a patre suo et a matre et dicit: “ Hoc non est peccatum ”, particeps homicidae est.	24 Qui subtrahit aliquid a patre suo et a matre, et dicit hoc non esse peccatum, particeps homicidæ est.
25 Qui desiderium dilatat, iurgia concitat; qui vero sperat in Domino, impinguabitur.	25 Qui se jactat et dilatat, jurgia concitat ; qui vero sperat in Domino sanabitur.
26 Qui confidit in corde suo, stultus est; qui autem graditur sapienter, ipse salvabitur.	26 Qui confidit in corde suo stultus est ; qui autem graditur sapienter, ipse salvabitur.
27 Qui dat pauperi, non indigebit; qui autem occultat oculos, abundabit maledictis.	27 Qui dat pauperi non indigebit ; qui despicit deprecantem sustinebit penuriam.
28 Cum surrexerint impii, abscondentur homines; cum illi perierint, multiplicabuntur iusti.	28 Cum surrexerint impii, abscondentur homines ; cum illi perierint, multiplicabuntur justi.