---

¹Ne aemuleris viros malos
nec desideres esse cum eis,
²quia rapinas meditatur mens eorum,
et perniciem labia eorum loquuntur.
³Sapientia aedificabitur domus,
et prudentia roborabitur.
⁴In doctrina replebuntur cellaria,
universa substantia pretiosa et pulcherrima.
⁵Vir sapiens fortis est,
et vir doctus firmat robur.
⁶Quia cum dispositione parabis tibi bellum,
et erit salus, ubi multa consilia sunt.
⁷Excelsa stulto sapientia,
in porta non aperiet os suum.
⁸Qui cogitat mala facere,
vir perniciosus vocabitur.
⁹Cogitatio stulti peccatum est,
et abominatio hominum detractor. ¹⁰Si fueris lassus in die angustiae,
coartabitur fortitudo tua.
¹¹Erue eos, qui ducuntur ad mortem;
et, qui trahuntur ad interitum, retine.
¹²Si dixeris: “ Nesciebamus hoc ”;
nonne qui ponderator est cordis, ipse intellegit,
et servatorem animae tuae nihil fallit
reddetque homini iuxta opera sua?
¹³Comede, fili mi, mel, quia bonum est
et favum dulcissimum gutturi tuo.
¹⁴Sic, scito, est sapientia animae tuae;
quam cum inveneris, erit tibi posteritas,
et spes tua non peribit.
¹⁵Ne insidieris, o nequam, domui iusti
neque vastes requiem eius.
¹⁶Septies enim cadet iustus et resurget;
impii autem corruent in malum.
¹⁷Cum ceciderit inimicus tuus, ne gaudeas,
et in ruina eius ne exsultet cor tuum,
¹⁸ne forte videat Dominus, et displiceat ei
et auferat ab eo iram suam.
¹⁹Ne succendas ira in pessimos
nec aemuleris impios,
²⁰quoniam non erit posteritas maligno,
et lucerna impiorum exstinguetur.
²¹Time Dominum, fili mi, et regem
et cum nova sectantibus non commiscearis,
²²quoniam repente consurget perditio eorum,
et ruinam utriusque quis novit?
²³Haec quoque sapientibus:
Dignoscere personam in iudicio non est bonum.
²⁴Qui dicit impio: “ Iustus es ”,
maledicent ei populi, et detestabuntur eum tribus.
²⁵Qui vero arguunt eum, laudabuntur,
et super ipsos veniet benedictio boni.
²⁶Labia deosculatur,
qui recta verba respondet.
²⁷Praepara foris opus tuum
et diligenter exerce illud in agro tuo,
ut postea aedifices domum tuam.
²⁸Ne sis testis frustra contra proximum tuum
nec decipias quemquam labiis tuis.
²⁹Ne dicas: “ Quomodo fecit mihi, sic faciam ei,
reddam viro secundum opus suum ”.
³⁰Per agrum hominis pigri transivi
et per vineam viri sensu carentis:
³¹et ecce totum repleverant urticae,
et operuerant superficiem eius spinae,
et maceria lapidum destructa erat; ³²quod cum vidissem, posui in corde meo,
vidi, didici disciplinam:
³³“ Parum dormies, modicum dormitabis,
pauxillum manus conseres, ut quiescas,
³⁴et veniet tibi quasi cursor egestas,
et mendicitas quasi vir armatus ”.

---

Gen Ex Lv Nm Deut Ios Iudc Ruth 1 Re 2 Re 3 Re 4 Re 1 Par 2 Par Esd Neh Tob Iudt Esth 1 Mach 2 Mach Iob Ps Prov Eccle Cant Sap Eccli Isa Ier Lam Bar Ez Dan Os Ioel Am Abd Ion Mi Nah Hab Soph Agg Zach Mal Mt Mc Lc Io Act Rom 1Cor 2Cor Gal Eph Phil Col 1 Thess 2 Thess 1 Tim 2 Tim Tit Philem Hebr Iac 1 Pt 2 Pt 1 Io 2 Io 3 Io Iud Apoc