Sapientia 6

¹Audite ergo, reges, et intellegite;
discite, iudices finium terrae.
²Praebete aures, vos, qui continetis multitudines
et placetis vobis in turbis nationum.
³Quoniam data est a Domino potestas vobis
et dominatio ab Altissimo,
qui interrogabit opera vestra
et cogitationes scrutabitur,
⁴quoniam, cum essetis ministri regni illius,
non recte iudicastis
nec custodistis legem
neque secundum voluntatem Dei ambulastis.
⁵Horrende et cito instabit vobis,
quoniam iudicium durissimum his, qui praesunt, fiet;
⁶exiguo enim conceditur misericordia,
potentes autem potenter tormento interrogabuntur.
⁷Non enim subtrahet personam cuiusquam Deus
nec verebitur magnitudinem cuiusquam,
quoniam pusillum et magnum ipse fecit,
et aequaliter cura est illi de omnibus;
⁸potentibus autem durum instat scrutinium.
⁹Ad vos ergo, reges, sunt hi sermones mei,
ut discatis sapientiam et non excidatis.
¹⁰Qui enim custodierint iusta iuste, iustificabuntur;
et, qui didicerint ista, invenient defensionem.
¹¹Concupiscite ergo sermones meos,
diligite illos et habebitis disciplinam.
¹²Clara est et, quae numquam marcescit, sapientia;
et facile videtur ab his, qui diligunt eam,
et invenitur ab his, qui quaerunt illam.
¹³Praeoccupat, qui eam concupiscunt,
ut prior se ostendat illis.
¹⁴Qui de luce vigilaverit ad illam, non laborabit,
assidentem enim illam foribus suis inveniet.
¹⁵Cogitare ergo de illa sensus est consummatio;
et, qui vigilaverit propter illam, cito securus erit.
¹⁶Quoniam dignos se ipsa circuit quaerens
et in viis ostendit se illis hilariter
et in omni providentia occurrit illis.
¹⁷Initium enim illius verissima est disciplinae concupiscentia,
cura vero disciplinae dilectio est,
¹⁸et dilectio custodia legum illius est,
custoditio autem legum confirmatio incorruptionis est,
¹⁹incorruptio autem facit esse proximum Deo;
²⁰concupiscentia itaque sapientiae deducit ad regnum.
²¹Si ergo delectamini sedibus et sceptris, o reges populi,
colite sapientiam, ut in perpetuum regnetis.
²²Quid est autem sapientia et quemadmodum facta sit, referam
et non abscondam a vobis sacramenta Dei,
sed ab initio nativitatis investigabo
et ponam in lucem scientiam illius
et non praeteribo veritatem.
²³Neque cum invidia tabescente iter habebo,
quoniam ista non erit particeps sapientiae.
²⁴Multitudo autem sapientium sanitas est orbis terrarum,
et rex sapiens stabilimentum populi est.
²⁵Ergo accipite disciplinam per sermones meos,
et proderit vobis.

Vetus Testamentum

Novum Testamentum

Cambia Bibbia

Confronta con un'altra Bibbia

Versetti esaminati