Sapienza 2

¹ Dixerunt enim cogitantes apud se non recte:
“ Exiguum et cum taedio est tempus vitae nostrae,
et non est refrigerium in fine hominis,
et non est agnitus, qui sit reversus ab inferis.

² Quia ex tempore nati sumus
et post hoc erimus, tamquam non fuerimus,
quoniam fumus flatus est in naribus nostris,
et sermo scintilla in motu cordis nostri;

³ qua exstincta, cinis fiet corpus nostrum,
et spiritus diffundetur tamquam mollis aer.

⁴ Et nomen nostrum oblivioni tradetur per tempus,
et nemo memoriam habebit operum nostrorum;
et transibit vita nostra tamquam vestigium nubis,
et sicut nebula dissolvetur,
quae fugata est a radiis solis
et a calore illius aggravata.

⁵ Umbrae enim transitus est tempus nostrum,
et non est reversio finis nostri,
quoniam consignata est, et nemo revertitur.

⁶ Venite ergo, et fruamur bonis, quae sunt,
et utamur creatura tamquam in iuventute sollicite.

⁷ Vino pretioso et unguentis nos impleamus,
et non praetereat nos flos temporis verni;

⁸ coronemus nos calycibus rosarum, antequam marcescant,

⁹ nullum pratum exsors sit luxuriae nostrae;
ubique relinquamus signa laetitiae,
quoniam haec est pars nostra, et haec est sors.

¹⁰ Opprimamus pauperem iustum
et non parcamus viduae
nec veterani revereamur canos multi temporis.

¹¹ Sit autem fortitudo nostra lex iustitiae;
quod enim infirmum est, inutile invenitur.

¹² Circumveniamus ergo iustum, quoniam inutilis est nobis
et contrarius est operibus nostris
et improperat nobis peccata legis
et diffamat in nos peccata disciplinae nostrae.

¹³ Promittit se scientiam Dei habere
et filium Dei se nominat.

¹⁴ Factus est nobis in accusationem cogitationum nostrarum;
gravis est nobis etiam ad videndum,

¹⁵ quoniam dissimilis est aliis vita illius,
et immutatae sunt viae eius.

¹⁶ Tamquam scoria aestimati sumus ab illo,
et abstinet se a viis nostris tamquam ab immunditiis;
beata dicit novissima iustorum
et gloriatur patrem se habere Deum.

¹⁷ Videamus ergo, si sermones illius veri sint,
et tentemus, quae in exitu eius erunt:

¹⁸ si enim est verus filius Dei, suscipiet illum
et liberabit eum de manibus contrariorum.

¹⁹ Contumelia et tormento interrogemus eum,
ut sciamus modestiam eius
et probemus patientiam illius;

²⁰ morte turpissima condemnemus eum:
erit enim ei visitatio ex sermonibus illius ”.

²¹ Haec cogitaverunt et erraverunt;
excaecavit enim illos malitia eorum,

²² et nescierunt sacramenta Dei
neque mercedem speraverunt sanctitatis
nec iudicaverunt honorem animarum immaculatarum.

²³ Quoniam Deus creavit hominem in incorruptibilitate
et imaginem similitudinis suae fecit illum;

²⁴ invidia autem Diaboli mors introivit in orbem terrarum;
experiuntur autem illam, qui sunt ex parte illius.