Sapienza 3

¹ Iustorum autem animae in manu Dei sunt,
et non tanget illos tormentum mortis.

² Visi sunt oculis insipientium mori,
et aestimata est afflictio exitus illorum,

³ et, quod a nobis est iter, exterminium;
illi autem sunt in pace.

⁴ Etenim, si coram hominibus tormenta passi sunt,
spes illorum immortalitate plena est;

⁵ et in paucis correpti, in multis bene disponentur,
quoniam Deus tentavit eos
et invenit illos dignos se.

⁶ Tamquam aurum in fornace probavit illos
et quasi holocausti hostiam accepit illos,

⁷ et in tempore visitationis illorum fulgebunt
et tamquam scintillae in arundineto discurrent;

⁸ iudicabunt nationes et dominabuntur populis,
et regnabit Dominus illorum in perpetuum.

⁹ Qui confidunt in illo, intellegent veritatem,
et fideles in dilectione acquiescent illi,
quoniam gratia et misericordia est sanctis eius,
et visitatio electis eius.

¹⁰ Impii autem, secundum quae cogitaverunt, correptionem habebunt;
qui neglexerunt iustum et a Domino recesserunt.

¹¹ Sapientiam enim et disciplinam qui despicit, infelix est,
et vacua est spes illorum, et labores sine fructu,
et inutilia opera eorum.

¹² Mulieres eorum insensatae sunt,
et nequissimi filii eorum,
maledicta generatio eorum.

¹³ Quoniam felix est sterilis et incoinquinata,
quae nescivit torum in delicto;
habebit fructum in respectione animarum.

¹⁴ Et spado, qui non operatus est per manus suas iniquitatem
nec cogitavit adversus Dominum nequissima,
dabitur enim illi fidei donum electum,
et sors in templo Domini acceptissima.

¹⁵ Bonorum enim laborum gloriosus est fructus;
et, quae non concidat, radix sapientiae.

¹⁶ Filii autem adulterorum in inconsummatione erunt,
et ab iniquo toro semen exterminabitur.

¹⁷ Et, si quidem longae vitae erunt, in nihilum computabuntur,
et sine honore erit in novissimo senectus illorum;

¹⁸ et, si celerius defuncti fuerint, non habebunt spem
nec in die agnitionis allocutionem:

¹⁹ generationis enim iniquae dirae sunt consummationes.