Sapienza 4

¹ Melius est absque liberis esse cum virtute;
immortalitas est enim in memoria illius,
quoniam et apud Deum nota est et apud homines.

² Cum praesens est, imitantur illam;
et desiderant eam, cum se eduxerit;
et in perpetuum coronata triumphat,
incoinquinatorum certaminum praemium vincens.

³ Multigena autem impiorum multitudo non erit utilis
et spuriis vitulaminibus non dabit radicem in profundum altam
nec stabile firmamentum collocabit.

⁴ Etenim, si in ramis ad tempus germinaverit,
infirmiter posita a vento commovebitur
et a nimietate ventorum eradicabitur.

⁵ Confringentur rami inconsummati,
et fructus illorum inutilis et acerbus ad manducandum
et ad nihilum aptus.

⁶ Ex iniquis enim somnis filii, qui nascuntur,
testes sunt nequitiae adversus parentes
in interrogatione sua.

⁷ Iustus autem, si morte praeoccupatus fuerit,
in refrigerio erit.

⁸ Senectus enim venerabilis, non quae est diuturna,
neque annorum numero computatur;

⁹ cani autem sunt sensus hominis,
et aetas senectutis vita immaculata.

¹⁰ Placens Deo factus est dilectus
et vivens inter peccatores translatus est;

¹¹ raptus est, ne malitia mutaret intellectum eius,
aut ne fictio deciperet animam illius.

¹² Fascinatio enim nugacitatis obscurat bona,
et inconstantia concupiscentiae transvertit sensum sine malitia.

¹³ Consummatus in brevi
explevit tempora multa;

¹⁴ placita enim erat Deo anima illius,
propter hoc properavit educere illum de medio iniquitatis.
Populi autem videntes et non intellegentes
nec ponentes in praecordiis talia,

¹⁵ quoniam gratia et misericordia est in electis eius,
et visitatio in sanctis illius.

¹⁶ Condemnat autem iustus mortuus vivos impios,
et iuventus celerius consummata longaevam senectutem iniusti.

¹⁷ Videbunt enim finem sapientis
et non intellegent quid cogitaverit de illo Deus,
et quare munierit illum Dominus.

¹⁸ Videbunt et contemnent;
illos autem Dominus irridebit.

¹⁹ Et erunt post haec tamquam corpus sine honore
et in contumeliam inter mortuos in perpetuum,
quoniam disrumpet illos praecipites sine voce
et commovebit illos a fundamentis, et usque ad supremum desolabuntur
et erunt in dolore,
et memoria illorum peribit.

²⁰ Venient in computatione peccatorum suorum timidi,
et traducent illos ex adverso iniquitates ipsorum.