Samuelis II 22

NOVA VULGATA	VULGATA
1 Locutus est autem David Domino verba carminis huius in die, qua liberavit eum Dominus de manu omnium inimicorum suorum et de manu Saul,	1 Locutus est autem David Domino verba carminis hujus in die qua liberavit eum Dominus de manu omnium inimicorum suorum, et de manu Saul.
2 et ait: “ Dominus petra mea et arx mea et salvator meus;	2 Et ait : Dominus petra mea, et robur meum, et salvator meus.
3 Deus meus, rupes mea, in quam confugiam, scutum meum et cornu salutis meae! Munimentum meum et refugium meum. Salvator meus, de violentia liberabis me.	3 Deus fortis meus : sperabo in eum ; scutum meum, et cornu salutis meæ : elevator meus, et refugium meum ; salvator meus : de iniquitate liberabis me.
4 Laudabilem invocabo Dominum et ab inimicis meis salvus ero.	4 Laudabilem invocabo Dominum, et ab inimicis meis salvus ero.
5 Quia circumdederunt me fluctus mortis, torrentes Belial terruerunt me;	5 Quia circumdederunt me contritiones mortis : torrentes Belial terruerunt me.
6 praeoccupaverunt me laquei mortis.	6 Funes inferni circumdederunt me : prævenerunt me laquei mortis.
7 In tribulatione mea invocavi Dominum et ad Deum meum clamavi; et exaudivit de templo suo vocem meam, et clamor meus venit ad aures eius.	7 In tribulatione mea invocabo Dominum, et ad Deum meum clamabo : et exaudiet de templo suo vocem meam, et clamor meus veniet ad aures ejus.
8 Commota est et contremuit terra; fundamenta caelorum concussa sunt et conquassata, quoniam iratus est.	8 Commota est et contremuit terra ; fundamenta montium concussa sunt, et conquassata : quoniam iratus est eis.
9 Ascendit fumus de naribus eius, et ignis de ore eius vorabat; carbones incensi sunt ab eo.	9 Ascendit fumus de naribus ejus, et ignis de ore ejus vorabit : carbones succensi sunt ab eo.
10 Et inclinavit caelos et descendit, et caligo sub pedibus eius.	10 Inclinavit cælos, et descendit : et caligo sub pedibus ejus.
11 Et ascendit super cherub et volavit et devolavit super pennas venti.	11 Et ascendit super cherubim, et volavit : et lapsus est super pennas venti.
12 Posuit tenebras in circuitu suo tabernaculum suum, tenebrosas aquas, nubes densissimas.	12 Posuit tenebras in circuitu suo latibulum, cribrans aquas de nubibus cælorum.
13 Prae fulgore in conspectu eius incensi sunt carbones ignis.	13 Præ fulgore in conspectu ejus, succensi sunt carbones ignis.
14 Intonuit de caelo Dominus, et Excelsus dedit vocem suam.	14 Tonabit de cælo Dominus, et excelsus dabit vocem suam.
15 Misit sagittas et dissipavit eos, fulguravit fulmina et conturbavit eos.	15 Misit sagittas et dissipavit eos ; fulgur, et consumpsit eos.
16 Et apparuerunt effusiones maris, et revelata sunt fundamenta orbis ab increpatione Domini, ab inspiratione spiritus furoris eius.	16 Et apparuerunt effusiones maris, et revelata sunt fundamenta orbis ab increpatione Domini, ab inspiratione spiritus furoris ejus.
17 Misit de excelso et assumpsit me, traxit me de aquis multis;	17 Misit de excelso, et assumpsit me, et extraxit me de aquis multis.
18 liberavit me ab inimico meo potentissimo, ab his, qui oderant me, qui robustiores me erant.	18 Liberavit me ab inimico meo potentissimo, et ab his qui oderant me : quoniam robustiores me erant.
19 Praevenerunt me in die afflictionis meae, et factus est Dominus firmamentum meum;	19 Prævenit me in die afflictionis meæ, et factus est Dominus firmamentum meum.
20 et eduxit me in latitudinem, liberavit me, quia complacui ei.	20 Et eduxit me in latitudinem : liberavit me, quia complacui ei.
21 Retribuit mihi Dominus secundum iustitiam meam et secundum munditiam manuum mearum reddit mihi,	21 Retribuet mihi Dominus secundum justitiam meam : et secundum munditiam manuum mearum reddet mihi.
22 quia custodivi vias Domini et non egi impie a Deo meo.	22 Quia custodivi vias Domini, et non egi impie a Deo meo.
23 Omnia enim iudicia eius in conspectu meo, et a praeceptis eius non recessi;	23 Omnia enim judicia ejus in conspectu meo, et præcepta ejus non amovi a me.
24 et fui immaculatus cum eo et custodivi me ab iniquitate mea.	24 Et ero perfectus cum eo, et custodiam me ab iniquitate mea.
25 Et retribuet mihi Dominus secundum iustitiam meam et secundum munditiam meam in conspectu oculorum suorum.	25 Et restituet mihi Dominus secundum justitiam meam, et secundum munditiam manuum mearum in conspectu oculorum suorum.
26 Cum sancto sanctus eris et cum viro innocente innocens eris;	26 Cum sancto sanctus eris, et cum robusto perfectus.
27 cum electo electus eris et cum perverso callidus eris.	27 Cum electo electus eris, et cum perverso perverteris.
28 Et populum pauperem salvum facies et oculos superborum humiliabis,	28 Et populum pauperem salvum facies : oculisque tuis excelsos humiliabis.
29 quia tu lucerna mea, Domine, et Deus meus illuminat tenebras meas.	29 Quia tu lucerna mea, Domine, et tu, Domine, illuminabis tenebras meas.
30 In te enim aggrediar hostium turmas, in Deo meo transiliam murum.	30 In te enim curram accinctus : in Deo meo transiliam murum.
31 Deus, immaculata via eius, eloquium Domini igne examinatum; scutum est omnium sperantium in se.	31 Deus, immaculata via ejus ; eloquium Domini igne examinatum : scutum est omnium sperantium in se.
32 Quoniam quis est Deus praeter Dominum? Et quae rupes praeter Deum nostrum?	32 Quis est Deus præter Dominum, et quis fortis præter Deum nostrum ?
33 Deus, qui accinxit me fortitudine et complanavit perfectam viam meam,	33 Deus qui accinxit me fortitudine, et complanavit perfectam viam meam.
34 coaequans pedes meos cervis et super excelsa statuens me;	34 Coæquans pedes meos cervis, et super excelsa mea statuens me ;
35 docens manus meas ad proelium, et tendunt arcum aereum brachia mea.	35 docens manus meas ad prælium, et componens quasi arcum æreum brachia mea.
36 Dedisti mihi clipeum salutis tuae, et exauditio tua magnificavit me.	36 Dedisti mihi clypeum salutis tuæ, et mansuetudo tua multiplicavit me.
37 Dilatasti gressus meos subtus me, et non sunt infirmati tali mei.	37 Dilatabis gressus meos subtus me, et non deficient tali mei.
38 Persequebar inimicos meos et conterebam et non convertebar, donec consumerem eos.	38 Persequar inimicos meos, et conteram, et non convertar donec consumam eos.
39 Consumpsi eos et confregi, ut non consurgerent: ceciderunt sub pedibus meis.	39 Consumam eos et confringam, ut non consurgant : cadent sub pedibus meis.
40 Accinxisti me fortitudine ad proelium, incurvasti insurgentes in me subtus me.	40 Accinxisti me fortitudine ad prælium : incurvasti resistentes mihi subtus me.
41 Inimicos meos dedisti mihi dorsum, odientes me, et disperdidi eos.	41 Inimicos meos dedisti mihi dorsum ; odientes me, et disperdam eos.
42 Clamaverunt, et non erat qui salvaret, ad Dominum, et non exaudivit eos.	42 Clamabunt, et non erit qui salvet ; ad Dominum, et non exaudiet eos.
43 Contrivi eos ut pulverem terrae, quasi lutum platearum comminui eos.	43 Delebo eos ut pulverem terræ ; quasi lutum platearum comminuam eos atque confringam.
44 Salvasti me a contradictionibus populi mei, constituisti me in caput gentium. Populus, quem ignorabam, servit mihi,	44 Salvabis me a contradictionibus populi mei ; custodies me in caput gentium : populus quem ignoro serviet mihi.
45 filii alieni blandiuntur mihi, auditu auris oboediunt mihi.	45 Filii alieni resistent mihi ; auditu auris obedient mihi.
46 Filii alieni defluunt et contremiscunt ex arcibus suis.	46 Filii alieni defluxerunt, et contrahentur in angustiis suis.
47 Vivit Dominus, et benedicta petra mea, et exaltetur Deus, petra salutis meae.	47 Vivit Dominus, et benedictus Deus meus, et exaltabitur Deus fortis salutis meæ.
48 Deus, qui das vindictas mihi et deicis populos sub me.	48 Deus qui das vindictas mihi, et dejicis populos sub me.
49 Qui educis me ab inimicis meis et ab insurgentibus in me elevas me; a viro iniquo liberas me.	49 Qui educis me ab inimicis meis, et a resistentibus mihi elevas me : a viro iniquo liberabis me.
50 Propterea confitebor tibi, Domine, in gentibus, et nomini tuo cantabo:	50 Propterea confitebor tibi, Domine, in gentibus, et nomini tuo cantabo :
51 Magnificat salutes regis sui et facit misericordiam christo suo David et semini eius in sempiternum ”.	51 magnificans salutes regis sui, et faciens misericordiam christo suo David, et semini ejus in sempiternum.