2 Samuele ܫܡܘܐܝܠ 22

¹ܬܫܒܘܚܬܐ ܕܕܘܝܕ ܘܐܡܪ ܕܘܝܕ ܠܡܪܝܐ ܡ̈ܠܐ ܕܬܫܒܘܚܬܐ ܗܕܐ ܒܝܘܡܐ ܕܦܨܝܗ ܡܪܝܐ ܡܢ ܐܝܕܐ ܕܒ̈ܥܠܕܒܒܘܗܝ ܘܡܢ ܐܝܕܗ ܕܫܐܘܠ²ܘܐܡܪ ܐܪܚܡܟ ܡܪܝܐ ܚܝܠܝ ܘܬܘܟܠܢܝ ܡܪܝܐ ܥܘܫܢܝ ܘܒܝܬ ܓܘܣܝ ܘܡܦܨܝܢܝ³ܐܠܗܐ ܬܩܝܦܐ ܕܣܒܪܝ ܒܗ ܡܣܝܥܢܝ ܘܩܪܢܐ ܕܦܘܪܩܢܝ ܘܒܝܬ ܓܘܣܝ ܘܡܦܨܝܢܝ ܡܢ ܥܘ̈ܠܐ ܘܦܪܘܩܝ⁴ܡܫܒܚܐ ܐܩܪܐ ܠܡܪܝܐ ܘܡܢ ܒ̈ܥܠܕܒܒܝ ܐܬܦܪܩ⁵ܡܛܠ ܕܚܕܪ̈ܘܢܝ ܚܒ̈ܠܐ ܕܡܘܬܐ ܘܕ̈ܓܠܬܐ ܕܥܘ̈ܠܐ ܕܠܚܢܝ⁶ܚ̈ܒܠܐ ܕܫܝܘܠ ܟܪܟܘܢܝ ܘܩܕܡܘܢܝ ܦܚ̈ܐ ܕܡܘܬܐ⁷ܒܐܘܠܨܢܝ ܩܪܝܬ ܠܡܪܝܐ ܘܠܘܬ ܐܠܗܝ ܓܥܝܬ ܘܫܡܥ ܩܠܝ ܡܢ ܗܝܟܠܗ ܘܓܥܬܝ ܩܕܡܘܗܝ ܥܠܬ ܒܐ̈ܕܢܘܗܝ⁸ܐܬܕܠܚܬ ܘܙܥܬ ܐܪܥܐ ܘܫܬ̈ܐܣܐ ܕܛܘܪ̈ܐ ܙܥ ܘܐܬܬܠܚ ܡܛܠ ܕܐܬܚܡܬ ܥܠܝܗܘܢ⁹ܠܩ ܬܢܢܐ ܒܪܘܓܙܗ ܘܢܘܪܐ ܡܢ ܦܪܨܘܦܗ ܐܬܓܘܙܠܬ ܘܓܘܡܪ̈ܐ ܚ̈ܒܢ ܡܢܗ¹⁰ܘܨܠܐ ܫܡܝܐ ܘܢܚܬ ܘܥܪܦܠܐ ܬܚܝܬ ܪ̈ܓܠܘܗܝ¹¹ܪܟܒ ܥܠ ܟܪ̈ܘܒܐ ܘܦܪܚ ܘܛܣ ܥܠ ܟܢ̈ܦܐ ܕܪܘܚܐ¹²ܘܥܒܕ ܚܫܘܟܐ ܠܓܢܝܗ ܘܟܪܟܗ ܡܛܠܠܗ ܚܫܘܟܐ ܕܡ̈ܝܐ ܒܥܢ̈ܢܐ ܕܐܐܪ¹³ܡܢ ܙܗܪܐ ܕܡܛܠܠܗ ܥܒܕ ܥܢ̈ܢܘܗܝ ܒܪܕܐ ܘܓܘܡܪ̈ܐ ܕܢܘܪܐ¹⁴ܘܪܥܡ ܒܫܡܝܐ ܡܪܝܐ ܘܥܠܝܐ ܝܗܒ ܩܠܗ ܒܪܕܐ ܘܓܘܡܪ̈ܐ ܕܢܘܪܐ¹⁵ܫܕܪ ܓܐܪ̈ܘܗܝ ܘܒܕܪ ܐܢܘܢ ܘܒܪ̈ܩܐ ܐܣܓܝ ܘܕܠܚ ܐܢܘܢ¹⁶ܘܐܬܚܙܝܘ ܡܒ̈ܘܥܐ ܕܡ̈ܝܐ ܘܐܬܓܠܝ ܫܬܐ̈ܣܝܗ̇ ܕܬܒܝܠ ܡܢ ܟܐܬܟ ܡܪܝܐ ܘܡܢ ܢܫܡܬܐ ܕܪܘܚܐ ܕܪܘܓܙܟ¹⁷ܫܕܪ ܡܢ ܡܪܘܡܐ ܘܕܒܪܢܝ ܘܫܠܢܝ ܡܢ ܡ̈ܝܐ ܣܓ̈ܝܐܐ¹⁸ܘܦܨܝܢܝ ܡܢ ܒ̈ܥܠܕܒܒܝ ܥܫ̈ܝܢܐ ܘܡܢ ܣ̈ܢܐܝ ܕܥܫܢܘ ܡܢܝ¹⁹ܘܩܕܡܘܢܝ ܒܝܘܡܐ ܕܐܘܠܨܢܝ ܘܗܘܐ ܠܝ ܡܪܝܐ ܡܣܝܥܢܐ²⁰ܘܐܦܩܢܝ ܠܐܪܘܚܬܐ ܘܦܨܝܢܝ ܡܛܠ ܕܨܒܐ ܒܝ²¹ܘܦܪܥܢܝ ܡܪܝܐ ܐܝܟ ܙܕܝܩܘܬܝ ܘܐܝܟ ܕܟܝܘܬܐ ܕܐܝܕܝ ܦܢܝ ܠܝ²²ܡܛܠ ܕܢܛܪܬ ܐܘܪ̈ܚܬܗ ܕܡܪܝܐ ܘܠܐ ܐܬܡܪܕܬ ܡܢ ܐܠܗܝ²³ܡܛܠ ܕܟܠܗܘܢ ܕܝܢ̈ܘܗܝ ܠܘܩܒܠܝ ܘܢܡܘܣ̈ܘܗܝ ܠܐ ܐܥܒܪܬ ܡܢܝ²⁴ܘܗܘܝܬ ܥܡܗ ܕܠܐ ܡܘܡ ܘܐܙܕܗܪܬ ܡܢ ܚ̈ܛܗܐ²⁵ܘܦܪܥܢܝ ܡܪܝܐ ܐܝܟ ܙܕܝܩܘܬܝ ܘܐܝܟ ܕܟܝܘܬܐ ܕܐ̈ܝܕܝ ܠܘܩܒܠ ܥܝܢ̈ܘܗܝ²⁶ܥܡ ܛܒܐ ܬܗܘܐ ܛܒܐ ܘܥܡ ܓܒܪܐ ܬܡܝܡܐ ܬܗܘܐ ܬܡܝܡ²⁷ܘܥܡ ܓܒܝܐ ܬܗܘܐ ܓܒܐ ܘܥܡ ܥܩܝܡܐ ܬܬܥܩܡ²⁸ܡܛܠ ܕܐܢܬ ܥܡܐ ܡܣܟܢܐ ܬܦܪܘܩ ܘܥܝ̈ܢܐ ܪ̈ܡܬܐ ܬܡܟܟ²⁹ܐܢܬ ܬܢܗܪ ܫܪܓܝ ܡܪܝܐ ܐܠܗܝ ܢܢܗܪ ܚܫܘܟܝ³⁰ܡܛܠ ܕܒܟ ܐܪܗܛ ܥܠ ܓܝܣܐ ܘܒܐܠܗܝ ܐܩܘܙ ܫܘܪܐ³¹ܐܠܗܐ ܕܕܠܐ ܡܘܡ ܐܘܪܚܗ ܡܐܡܪܗ ܕܡܪܝܐ ܒܩܐ ܘܡܥܕܪ ܠܟܘܠ ܕܬܟܝܠܝܢ ܥܠܘܗܝ³²ܡܛܠ ܕܠܝܬ ܐܠܗܐ ܠܒܪ ܡܢ ܡܪܝܐ ܘܠܝܬ ܕܬܩܝܦ ܐܠܐ ܐܢ ܐܠܗܢ³³ܐܠܗܐ ܕܚܙܩܢܝ ܚܝܠܐ ܘܝܗܒ ܕܠܐ ܡܘܡ ܐܘܪܚܝ³⁴ܥܒܕ ܪ̈ܓܠܝ ܐܝܟ ܕܐܝܠܐ ܘܥܠ ܪܘܡܝ ܐܩܝܡܢܝ³⁵ܐܠܦ ܐ̈ܝܕܝ ܠܩܪܒܐ ܘܫܪܪ ܐܝܟ ܩܫܬܐ ܕܢܚܫܐ ܕܪ̈ܥܝ³⁶ܘܝܗܒܬ ܠܝ ܣܟܪܐ ܕܦܘܪܩܢܐ ܝܡܝܢܟ ܬܣܝܥܢܝ ܘܡܘܟܟܟ ܢܪܒܝܢܝ³⁷ܐܪܘܚܬ ܦܣܥ̈ܬܝ ܬܚ̈ܘܬܝ ܕܠܐ ܢܙܘܥܘܢ ܩܘܪ̈ܨܠܝ³⁸ܐܪܕܘܦ ܒ̈ܥܠܕܒܒܝ ܘܐܕܪܟ ܐܢܘܢ ܘܠܐ ܐܗܦܘܟ ܥܕܡܐ ܕܐܓܡܪ ܐܢܘܢ³⁹ܐܡܚܐ ܐܢܘܢ ܘܠܐ ܢܫܟܚܘܢ ܠܡܩܡ ܘܢܦܠܘܢ ܬܚܝܬ ܪ̈ܓܠܝ⁴⁰ܬܚܙܩܢܝ ܚܝܠܐ ܒܩܪܒܐ ܘܬܒܪܟ ܠܕܩܝܡܝܢ ܥܠܝ ܬܚܘܬܝ⁴¹ܘܩܕܠܗܘܢ ܕܒ̈ܥܠܕܒܒܝ ܐܦܢܝܬ ܠܝ ܘܠܣ̈ܢܐܝ ܐܫܬܩ ܐܢܘܢ⁴²ܢܓܥܘܢ ܠܘܬ ܡܪܝܐ ܘܠܐ ܢܗܘܐ ܠܗܘܢ ܦܪܘܩܐ ܘܢܒܥܘܢ ܡܢ ܡܪܝܐ ܘܠܐ ܢܥܢܐ ܐܢܘܢ⁴³ܐܫܚܘܩ ܐܢܘܢ ܐܝܟ ܥܦܪܐ ܥܠ ܐ̈ܦܝ ܪܘܚܐ ܘܐܝܟ ܣܝܢܐ ܕܫ̈ܘܩܐ ܐܕܘܫ ܐܢܘܢ⁴⁴ܬܦܠܛܢܝ ܡܢ ܕܝܢܘܗ̈ܝ ܕܥܡܐ ܘܬܥܒܕܢܝ ܪܝܫܐ ܠܥܡ̈ܡܐ ܥܡܐ ܕܠܐ ܝܕܥܬ ܢܦܠܚܘܢܢܝ⁴⁵ܘܡܫܡܥ ܐܕܢܐ ܢܫܡܥܘܢܢܝ ܒܢ̈ܝܐ ܢܘܟܪ̈ܝܐ ܢܫܬܥܒܕܘܢ ܠܝ⁴⁶ܒܢ̈ܝܐ ܢܘܟܪ̈ܝܐ ܢܬܟܠܘܢ ܘܢܬܚܓܪܘܢ ܡܢ ܫܒ̈ܝܠܝܗܘܢ⁴⁷ܚܝ ܗܘ ܐܠܗܐ ܘܒܪܝܟ ܗܘ ܡܚܝܠܢܝ ܘܐܬܬܪܝܡ ܐܠܗܐ ܦܪܘܩܝ⁴⁸ܐܠܗܐ ܕܝܗܒ ܠܝ ܬܒܥܬܐ ܘܫܥܒܕ ܠܥܡ̈ܡܐ ܬܚ̈ܘܬܝ⁴⁹ܘܡܦܨܝܢܝ ܡܢ ܒ̈ܥܠܕܒܒܝ ܘܐܦ ܡܢ ܐܝܠܝܢ ܕܩܝܡܝܢ ܥܠܝ ܬܪܝܡܢܝ ܘܡܢ ܓܒܪ̈ܐ ܥܘ̈ܠܐ ܬܦܨܝܢܝ⁵⁰ܡܛܠ ܗܢܐ ܐܘܕܐ ܠܟ ܒܝܬ ܥܡܡ̈ܐ ܡܪܝ ܘܠܫܡܟ ܐܙܡܪ⁵¹ܡܘܪܒ ܦܘܪܩܢܐ ܕܡܠܟܗ ܘܥܒܕ ܛܝܒܘܬܐ ܠܡܫܝܚܗ ܠܕܘܝܕ ܘܠܙܪܥܗ ܥܕܡܐ ܠܥܠܡ

Cambia Bibbia

Confronta con un'altra Bibbia

Versetti esaminati