Genesi 49

¹ Vocavit autem Iacob filios suos et ait eis: “ Congrega mini, ut annuntiem, quae ventura sunt vobis in diebus novissimis.

² Congregamini et audite, filii Iacob,
audite Israel patrem vestrum!

³ Ruben primogenitus meus,
tu fortitudo mea et principium roboris mei;
prior in dignitate, maior in robore!

⁴ Ebulliens sicut aqua non excellas,
quia ascendisti cubile patris tui
et maculasti stratum meum.

⁵ Simeon et Levi fratres,
vasa violentiae arma eorum.

⁶ In consilium eorum ne veniat anima mea,
et in coetu illorum non sit gloria mea;
quia in furore suo occiderunt virum
et in voluntate sua subnervaverunt tauros.

⁷ Maledictus furor eorum, quia pertinax,
et indignatio eorum, quia dura!
Dividam eos in Iacob
et dispergam eos in Israel.

⁸ Iuda, te laudabunt fratres tui;
manus tua in cervicibus inimicorum tuorum;
adorabunt te filii patris tui.

⁹ Catulus leonis Iuda:
a praeda, fili mi, ascendisti;
requiescens accubuit ut leo
et quasi leaena; quis suscitabit eum?

¹⁰ Non auferetur sceptrum de Iuda
et baculus ducis de pedibus eius,
donec veniat ille, cuius est,
et cui erit oboedientia gentium;

¹¹ ligans ad vineam pullum suum
et ad vitem filium asinae suae,
lavabit in vino stolam suam
et in sanguine uvae pallium suum;

¹² nigriores sunt oculi eius vino
et dentes eius lacte candidiores.

¹³ Zabulon in litore maris habitabit
et in statione navium,
pertingens usque ad Sidonem.

¹⁴ Issachar asinus fortis,
accubans inter caulas

¹⁵ vidit requiem quod esset bona,
et terram quod optima;
et supposuit umerum suum ad portandum
factusque est tributis serviens.

¹⁶ Dan iudicabit populum suum
sicut una tribuum Israel.

¹⁷ Fiat Dan coluber in via,
cerastes in semita,
mordens calcanea equi,
ut cadat ascensor eius retro.

¹⁸ Salutare tuum exspectabo, Domine!

¹⁹ Gad, latrones aggredientur eum,
ipse autem aggredietur calcaneum eorum.

²⁰ Aser, pinguis panis eius,
et praebebit delicias regales.

²¹ Nephthali cerva emissa,
dans cornua pulchra.

²² Arbor fructifera Ioseph,
arbor fructifera super fontem:
rami transcendunt murum.

²³ Sed exasperaverunt eum et iurgati sunt,
et adversati sunt illi habentes iacula.

²⁴ Et confractus est arcus eorum,
et dissoluti sunt nervi brachiorum eorum
per manus Potentis Iacob,
per nomen Pastoris, Lapidis Israel.

²⁵ Deus patris tui erit adiutor tuus,
et Omnipotens benedicet tibi
benedictionibus caeli desuper,
benedictionibus abyssi iacentis
deorsum,
benedictionibus uberum et vulvae.

²⁶ Benedictiones patris tui confortatae sunt
super benedictiones montium aeternorum,
desiderium collium antiquorum;
fiant in capite Ioseph
et in vertice nazaraei inter fratres suos.

²⁷ Beniamin lupus rapax;
mane comedet praedam
et vespere dividet spolia ”.

²⁸ Omnes hi in tribubus Israel duodecim. Haec locutus est eis pater suus benedixitque singulis benedictionibus propriis.

²⁹ Et praecepit eis dicens: “ Ego congregor ad populum meum; sepelite me cum patribus meis in spelunca Machpela, quae est in agro Ephron Hetthaei

³⁰ contra Mambre in terra Chanaan, quam emit Abraham cum agro ab Ephron Hetthaeo in possessionem sepulcri;

³¹ ibi sepelierunt eum et Saram uxorem eius, ibi sepultus est Isaac cum Rebecca coniuge sua, ibi et Lia condita iacet ”.

³² Finitisque mandatis, quibus filios instruebat, collegit pedes suos super lectulum et obiit; appositusque est ad populum suum.