Genesi 40

¹ His ita gestis, accidit ut peccarent pincerna regis Aegypti et pistor domino suo.

² Iratusque pharao contra duos eunuchos, praepositum pincernarum et praepositum pistorum,

³ misit eos in carcerem principis satellitum, in quo erat vinctus et Ioseph.

⁴ Et princeps satellitum tradidit eos Ioseph, qui ministrabat eis. Aliquantulum temporis illi in custodia tenebantur.

⁵ Videruntque ambo somnium nocte una iuxta interpretationem congruam sibi.

⁶ Ad quos cum introisset Ioseph mane et vidisset eos tristes,

⁷ sciscitatus est eos dicens: “ Cur tristior est hodie solito facies vestra? ”.

⁸ Qui responderunt: “ Somnium vidimus, et non est qui interpretetur nobis ”. Dixitque ad eos Ioseph: “ Numquid non Dei est interpretatio? Referte mihi quid videritis ”.

⁹ Narravit praepositus pincernarum somnium suum: “ Videbam coram me vitem,

¹⁰ in qua erant tres propagines, crescere paulatim in gemmas et post flores uvas maturescere;

¹¹ calicemque pharaonis in manu mea. Tuli ergo uvas et expressi in calicem, quem tenebam, et tradidi poculum pharaoni ”.

¹² Respondit Ioseph: “ Haec est interpretatio somnii: tres propagines, tres adhuc dies sunt,

¹³ post quos elevabit pharao caput tuum et restituet te in gradum pristinum; dabisque ei calicem iuxta officium tuum, sicut facere ante consueveras.

¹⁴ Tantum memento mei, cum tibi bene fuerit, et facias mecum misericordiam, ut suggeras pharaoni, ut educat me de isto carcere;

¹⁵ quia furto sublatus sum de terra Hebraeorum et hic innocens in lacum missus sum ”.

¹⁶ Videns pistorum magister quod somnium in bonum dissolvisset, ait: “ Et ego vidi somnium, quod tria canistra farinae haberem super caput meum;

¹⁷ et in uno canistro, quod erat excelsius, portare me ex omnibus cibis pharaonis, qui fiunt arte pistoria, avesque comedere eos ”.

¹⁸ Respondit Ioseph: “ Haec est interpretatio somnii: tria canistra, tres adhuc dies sunt,

¹⁹ post quos auferet pharao caput tuum ac suspendet te in patibulo, et comedent volucres carnes tuas ”.

²⁰ Exinde dies tertius natalicius pharaonis erat; qui faciens grande convivium pueris suis elevavit caput magistri pincernarum et caput pistorum principis in medio puerorum suorum;

²¹ restituitque alterum in locum suum, ut porrigeret ei poculum,

²² alterum suspendit in patibulo, sicut interpretatus erat eis Ioseph.

²³ Attamen praepositus pincernarum non est recordatus Ioseph, sed oblitus est interpretis sui.