Genesi ܒܪܝܬܐ 49

¹ ܘܰܩܪܳܐ ܝܰܥܩܽܘܒ ܠܰܒܢܰܘ̈ܗܝ ܘܶܐܡܰܪ ܠܗܽܘܢ: ܐܶܬܟܰܢܫܘ ܘܶܐܚܰܘܶܝܟܽܘܢ ܡܕܶܡ ܕܓܳܕܶܫ ܠܟܽܘܢ ܒܚܰܪܬܳܐ ܕܝܰܘ̈ܡܳܬܳܐ.

² ܐܶܬܟܰܢܰܫܘ ܘܰܫܡܰܥܘ ܒܢܰܘ̈ܗܝ ܕܝܰܥܩܽܘܒ: ܫܡܰܥܘ ܠܺܝܣܪܳܐܶܝܠ ܐܰܒܽܘܟܽܘܢ.

³ ܪܽܘܒܺܝܠ ܒܽܘܟܪܝ ܐܰܢ̱ܬ: ܚܰܝܠܝ ܘܪܺܝܫ ܬܽܘܩܦܝ: ܫܰܪܟܳܐ ܕܰܫܩܽܘܠܬܳܐ: ܘܫܰܪܟܳܐ ܕܥܽܘܫܢܳܐ.

⁴ ܛܥܰܝܬ ܐܰܝܟ ܡܰܝ̈ܳܐ: ܠܳܐ ܬܦܽܘܫ: ܕܰܣܠܶܩܬ ܠܡܰܫܟܒܶܗ ܕܰܐܒܽܘܟ: ܫܰܪܺܝܪܳܐܺܝܬ ܛܰܘܶܫܬ ܬܶܫܘܺܝܬܝ ܘܰܣܠܶܩܬ.

⁵ ܫܶܡܥܽܘܢ ܘܠܶܘܺܝ ܐܰܚ̈ܶܐ: ܡܳܐܢ̈ܶܐ ܕܪܽܘܓܙܳܐ ܡܶܢ ܟܝܳܢܗܽܘܢ.

⁶ ܒܐ̱ܪܳܙܗܽܘܢ ܠܳܐ ܥܶܠܰܬ ܢܰܦܫܝ: ܘܒܰܟܢܽܘܫܺܝܗܽܘܢ ܠܳܐ ܢܶܚܬܶܬ ܡܶܢ ܐܺܝܩܳܪܝ ܡܶܛܽܠ ܕܰܒܪܽܘܓܙܗܽܘܢ ܩܛܰܠܘ ܓܰܒܖ̈ܶܐ: ܘܰܒܚܶܡܬܗܽܘܢ ܥܩܰܪܘ ܫܽܘܪܳܐ.

⁷ ܠܺܝܛ ܗܘ̣ ܪܽܘܓܙܗܽܘܢ ܡܶܛܽܠ ܕܥܰܫܺܝܢ: ܘܚܶܡܬܗܽܘܢ ܡܶܛܽܠ ܕܩܰܫܝܳܐ: ܐܶܦܰܠܶܓ ܐܶܢܽܘܢ ܒܝܰܥܩܽܘܒ: ܘܶܐܒܰܕܰܪ ܐܶܢܽܘܢ ܒܺܝܣܪܳܐܶܝܠ.

⁸ ܝܺܗܽܘܕܳܐ ܠܳܟ ܢܰܘܕܽܘܢ ܐܰܚܰܝ̈ܟ: ܐܺܝܕܳܟ ܥܰܠ ܩܕܳܠܳܐ ܕܰܒܥܶܠܕܒܳܒܰܝ̈ܟ: ܢܶܣܓܕܽܘܢ ܠܳܟ ܒܢܰܘ̈ܗܝ ܕܰܐܒܽܘܟ.

⁹ ܓܽܘܪܝܳܐ ܕܰܐܪܝܳܐ ܝܺܗܽܘܕܳܐ: ܡܶܢ ܩܶܛܠܳܐ ܒܶܪܝ ܣܠܶܩܬ: ܒܪܶܟ ܘܰܪܒܰܥ ܐܰܝܟ ܐܰܪܝܳܐ: ܘܰܐܝܟ ܓܽܘܪܝܳܐ ܕܰܐܪܝܳܐ: ܘܡܰܢܽܘ ܢܩܺܝܡܺܝܘܗܝ.

¹⁰ ܠܳܐ ܢܶܥܢܰܕ ܫܰܒܛܳܐ ܡܶܢ ܝܺܗܽܘܕܳܐ: ܘܰܡܒܰܕܩܳܢܳܐ ܡܶܢ ܒܶܝܬ ܖ̈ܶܓܠܰܘܗܝ: ܥܕܰܡܳܐ ܕܢܺܐܬܶܐ ܡܰܢ ܕܕܺܝܠܶܗ ܗܺܝ: ܘܠܶܗ ܢܣܰܟܽܘܢ ܥܰܡ̈ܡܶܐ.

¹¹ ܢܶܐܣܽܘܪ ܒܰܓܦܶܬܳܐ ܥܺܝܠܶܗ: ܘܰܒܫܰܒܽܘܩܳܐ ܒܰܪ ܐܰܬܳܢܶܗ: ܢܚܰܘܰܪ ܒܚܰܡܪܳܐ ܠܒܽܘܫܶܗ: ܘܒܰܕܡܳܐ ܕܥܶܢ̈ܒܶܐ ܬܰܟܣܺܝܬܶܗ.

¹² ܙܳܖ̈ܓܳܢ ܥܰܝܢܰܘ̈ܗܝ ܡܶܢ ܚܰܡܪܳܐ: ܘܚܶܘܳܖ̈ܳܢ ܫܶܢܰܘ̈ܗܝ ܡܶܢ ܚܰܠܒܳܐ.

¹³ ܙܒܽܘܠܽܘܢ ܥܰܠ ܣܦܳܖ̈ܰܝ ܝܰܡ̈ܡܶܐ ܢܶܫܪܶܐ: ܘܗܽܘ ܥܰܠ ܫܽܘܦܪܳܐ ܕܰܣܦܺܝܢ̈ܶܐ: ܘܰܬܚܽܘܡܶܗ ܥܕܰܡܳܐ ܠܨܰܝܕܳܢ.

¹⁴ ܐܺܝܣܳܟܳܪ ܓܰܒܪܳܐ ܓܰܢ̱ܒܪܳܐ: ܕܰܪܒܺܝܥ ܒܶܝܬ ܫܒܺܝ̈ܠܶܐ.

¹⁵ ܘܰܚܙܳܐ ܡܰܫܪܝܶܗ ܕܫܰܦܺܝܪ: ܘܰܐܪܥܶܗ ܕܛܳܒܳܐ: ܘܰܐܪܟܶܢ ܟܰܬܦܶܗ ܠܫܽܘܥܒܳܕܳܐ: ܘܰܗܘܳܐ ܠܡܰܕܰܐܬܳܐ.

¹⁶ ܕܳܢ ܢܕܽܘܢ ܠܥܰܡܶܗ ܐܰܝܟ ܚܰܕ ܡܶܢ ܫܰܒ̈ܛܶܐ ܕܺܝܣܪܳܐܶܝܠ.

¹⁷ ܢܶܗܘܶܐ ܕܳܢ ܚܶܘܝܳܐ ܥܰܠ ܐܽܘܪܚܳܐ: ܘܚܰܪܡܳܢܳܐ ܕܥܰܠ ܫܒܺܝܠܳܐ: ܕܢܳܟܶܬ ܠܣܽܘܣܝܳܐ ܒܥܶܩܒܶܗ: ܘܡܰܪܡܶܐ ܠܪܳܟܒܶܗ ܠܒܶܣܬܪܶܗ.

¹⁸ ܠܦܽܘܪܩܳܢܳܟ ܣܰܟܺܝܬ ܡܳܪܝܳܐ.

¹⁹ ܓܳܕ ܒܓܰܝܣܳܐ ܢܶܦܽܘܩ: ܘܗܽܘ ܢܶܓܶܕ ܥܶܩܒܳܐ.

²⁰ ܐܳܫܺܝܪ ܛܳܒܳܐ ܐܰܪܥܶܗ: ܘܗܽܘ ܢܶܬܶܠ ܬܽܘܪܣܳܝܳܐ ܠܡܰܠܟ̈ܶܐ.

²¹ ܢܰܦܬܳܠܺܝ ܐܺܝܙܓܰܕܳܐ ܩܰܠܺܝܠܳܐ: ܝܳܗܶܒ ܡܺܐܡܪܳܐ ܫܰܦܺܝܪܳܐ.

²² ܒܪܳܐ ܕܬܰܪܒܺܝܬܳܐ ܝܰܘܣܶܦ: ܒܪܳܐ ܕܬܰܪܒܺܝܬܳܐ: ܣܰܩ ܥܰܝܢܳܐ ܒܶܢܝܳܢܳܐ ܣܡܺܝܟܳܐ ܕܣܳܠܶܩ ܒܫܽܘܪܳܐ: ܘܶܐܬܚܪܺܝܘ ܥܰܡܶܗ.

²³ ܘܰܣܓܺܝܘ ܘܣܰܩܪܽܘܗܝ ܡܳܖ̈ܰܝ ܓܽܘܕ̈ܶܐ.

²⁴ ܘܗܶܦܟܰܬ ܒܥܽܘܫܢܳܐ ܩܶܫܬܶܗ ܘܶܐܬܒܰܕܰܪܘ ܕܖ̈ܳܥܶܐ ܕܺܐܝܕܰܘ̈ܗܝ: ܡܶܢ ܐܺܝ̈ܕܰܝ ܥܰܫܺܝܢܳܐ ܕܝܰܥܩܽܘܒ: ܘܡܶܢ ܫܶܡ ܪܳܥܝܳܐ ܕܟܺܐܦܳܐ ܕܺܝܣܪܳܐܶܝܠ.

²⁵ ܐܰܠܳܗܶܗ ܕܰܐܒܽܘܟ ܢܥܰܕܪܳܟ: ܘܺܐܝܠܫܰܕܰܝ ܢܒܰܪܟܳܟ: ܒܽܘܪܟܬܳܐ ܕܰܫܡܰܝܳܐ ܡܶܢ ܠܥܶܠ: ܘܒܽܘܪܟܬܳܐ ܕܰܬܗܽܘܡܳܐ ܕܰܪܒܺܝܥܳܐ ܡܶܢ ܠܬܰܚܬ: ܒܽܘܪܟܬܳܐ ܕܰܬܕܰܝ̈ܳܐ ܘܰܕܖ̈ܰܚܡܶܐ.

²⁶ ܒܽܘܖ̈ܟܳܬܶܗ ܕܰܐܒܽܘܟ ܥܫܶܢ̈ܝ ܥܰܠ ܒܽܘܖ̈ܟܳܬܳܐ ܕܡܰܘܠ̈ܕܳܢܰܝ: ܥܕܰܡܳܐ ܠܣܰܒܪܳܐ ܕܖ̈ܳܡܳܬܳܐ ܕܥܳܠܰܡ: ܢܶܗܘ̈ܝܳܢ ܥܰܠ ܪܺܝܫܶܗ ܕܝܰܘܣܶܦ: ܘܥܰܠ ܪܺܝܫ ܟܠܺܝܠܳܐ ܕܰܐܚܰܘ̈ܗܝ.

²⁷ ܒܶܢܝܳܡܶܝܢ ܕܺܐܒܳܐ ܚܳܛܽܘܦܳܐ: ܒܨܰܦܪܳܐ ܢܶܐܟܽܘܠ ܒܶܙܬܳܐ: ܘܰܒܪܰܡܫܳܐ ܢܦܰܠܶܓ ܡܶܕܶܡ ܕܡܰܥܕܶܐ.

²⁸ ܟܽܠܗܽܘܢ ܗܳܠܶܝܢ ܫܰܒ̈ܛܶܐ ܕܺܝܣܪܳܐܶܝܠ ܬܪܶܥܣܰܪ: ܘܗܳܢܳܐ ܡܶܕܶܡ ܕܶܐܡܰܪ ܠܗܽܘܢ ܝܰܥܩܽܘܒ ܐܰܒܽܘܗܽܘܢ: ܐܶܡܰܪ ܠܗܽܘܢ ܘܒܰܪܶܟ ܐܶܢܽܘܢ: ܐ̱ܢܳܫ ܐܰܝܟ ܒܽܘܪܟܬܶܗ.

²⁹ ܒܰܪܶܟ ܐܶܢܽܘܢ ܘܦܰܩܶܕ ܐܶܢܽܘܢ: ܘܶܐܡܰܪ ܠܗܽܘܢ: ܐܶܢܳܐ ܡܶܬܟܰܢܫ ܐ̱ܢܳܐ ܠܘܳܬ ܥܰܡܝ: ܩܽܘܒܪܽܘܢܝ ܠܘܳܬ ܐܰܒܗܰܝ̈.

³⁰ ܒܰܡܥܰܪܬܳܐ ܕܰܒܚܰܩܠܳܐ ܕܥܶܦܪܽܘܢ ܚܺܝܬܳܝܳܐ: ܒܰܡܥܰܪܬܳܐ ܕܰܒܚܰܩܠܳܐ ܐܰܥܺܝܦܬܳܐ ܕܰܩܕܳܡ ܡܰܡܪܶܐ: ܕܒܰܐܪܥܳܐ ܕܰܟܢܰܥܢ: ܚܰܩܠܳܐ ܕܰܙܒܰܢ ܐܰܒܪܳܗܳܡ ܡܶܢ ܥܶܦܪܽܘܢ ܚܺܝܬܳܝܳܐ: ܠܺܝܘܪܬܳܢܳܐ ܕܩܰܒܪܳܐ.

³¹ ܬܰܡܳܢ ܩܒܰܪܘ ܠܰܐܒܪܳܗܳܡ ܘܰܠܣܰܪܳܐ ܐܰܢ̱ܬܬܶܗ: ܘܬܰܡܳܢ ܩܒܰܪܘ ܠܺܐܝܣܚܳܩ ܘܰܠܪܰܦܩܰܐ ܐܰܢ̱ܬܬܶܗ: ܘܬܰܡܳܢ ܩܶܒܪܶܬ ܠܠܶܝܰܐ.

³² ܙܒܺܝܢܬܳܐ ܕܚܰܩܠܳܐ ܘܰܡܥܰܪܬܳܐ ܕܒܳܗ̇ ܡܶܢ ܒܢܰܝ̈ ܚܺܝܬ.

³³ ܘܟܰܕ ܫܰܠܶܡ ܝܰܥܩܽܘܒ ܠܰܡܦܰܩܳܕܽܘ ܠܰܒܢܰܘ̈ܗܝ: ܦܫܰܛ ܖ̈ܶܓܠܰܘ̈ܗܝ ܒܥܰܪܣܳܐ: ܘܶܐܬܟܪܰܗ ܘܡܺܝܬ: ܘܶܐܬܟܢܶܫ ܠܘܳܬ ܥܰܡܶܗ.