Jó 39

VULGATA	NOVA VULGATA
1 Numquid nosti tempus partus ibicum in petris, vel parturientes cervas observasti ?	1 Numquid nosti tempus partus ibicum in petris vel parturientes cervas observasti?
2 Dinumerasti menses conceptus earum, et scisti tempus partus earum ?	2 Dinumerasti menses conceptus earum et scisti tempus partus earum?
3 Incurvantur ad fœtum, et pariunt, et rugitus emittunt.	3 Incurvantur ad fetum et pariunt et fetus suos emittunt.
4 Separantur filii earum, et pergunt ad pastum : egrediuntur, et non revertuntur ad eas.	4 Impinguantur filii earum et adolescunt in campo, egrediuntur et non revertuntur ad eas.
5 Quis dimisit onagrum liberum, et vincula ejus quis solvit ?	5 Quis dimisit onagrum liberum, et vincula ipsius quis solvit?
6 cui dedi in solitudine domum, et tabernacula ejus in terra salsuginis.	6 Cui dedi in solitudine domum et tabernacula eius in terra salsuginis.
7 Contemnit multitudinem civitatis : clamorem exactoris non audit.	7 Contemnit multitudinem civitatis, clamorem exactoris non audit.
8 Circumspicit montes pascuæ suæ, et virentia quæque perquirit.	8 Explorat montes pascuae suae et virentia quaeque perquirit.
9 Numquid volet rhinoceros servire tibi, aut morabitur ad præsepe tuum ?	9 Numquid volet taurus ferus servire tibi aut morabitur ad praesepe tuum?
10 Numquid alligabis rhinocerota ad arandum loro tuo, aut confringet glebas vallium post te ?	10 Numquid alligabis taurum ferum ad arandum loro tuo, aut confringet glebas vallium post te?
11 Numquid fiduciam habebis in magna fortitudine ejus, et derelinques ei labores tuos ?	11 Numquid fiduciam habebis in magna fortitudine eius et derelinques ei labores tuos?
12 Numquid credes illi quod sementem reddat tibi, et aream tuam congreget ?	12 Numquid credes illi quod revertatur et sementem in aream tuam congreget?
13 Penna struthionis similis est pennis herodii et accipitris.	13 Ala struthionis laeta est, penna vero ciconiae et avolat.
14 Quando derelinquit ova sua in terra, tu forsitan in pulvere calefacies ea ?	14 Quando derelinquit ova sua in terra, in pulvere calefiunt.
15 Obliviscitur quod pes conculcet ea, aut bestia agri conterat.	15 Obliviscitur quod pes conculcet ea, aut bestia agri conterat.
16 Duratur ad filios suos, quasi non sint sui : frustra laboravit, nullo timore cogente.	16 Duratur ad filios suos quasi non sint sui; frustra laborans nullo timore anxiatur.
17 Privavit enim eam Deus sapientia, nec dedit illi intelligentiam.	17 Privavit enim eam Deus sapientia nec dedit illi intellegentiam.
18 Cum tempus fuerit, in altum alas erigit : deridet equum et ascensorem ejus.	18 Cum tempus fuerit, in altum alas erigit, deridet equum et ascensorem eius.
19 Numquid præbebis equo fortitudinem, aut circumdabis collo ejus hinnitum ?	19 Numquid praebebis equo fortitudinem aut circumdabis collo eius iubam?
20 Numquid suscitabis eum quasi locustas ? gloria narium ejus terror.	20 Numquid suscitabis eum quasi locustas? Gloria hinnitus eius terror;
21 Terram ungula fodit ; exultat audacter : in occursum pergit armatis.	21 vallem ungula fodit, exsultat audacter, in occursum pergit armatis.
22 Contemnit pavorem, nec cedit gladio.	22 Contemnit pavorem nec territur neque cedit gladio.
23 Super ipsum sonabit pharetra ; vibrabit hasta et clypeus :	23 Super ipsum sonabit pharetra, micat hasta et acinaces.
24 fervens et fremens sorbet terram, nec reputat tubæ sonare clangorem.	24 Fervens et fremens sorbet terram nec consistet, cum tubae sonaverit clangor.
25 Ubi audierit buccinam, dicit : Vah ! procul odoratur bellum : exhortationem ducum, et ululatum exercitus.	25 Ubi audierit bucinam, dicit: “Uah!”. Procul odoratur bellum, exhortationem ducum et ululatum exercitus.
26 Numquid per sapientiam tuam plumescit accipiter, expandens alas suas ad austrum ?	26 Numquid per sapientiam tuam plumescit accipiter, expandens alas suas ad austrum?
27 Numquid ad præceptum tuum elevabitur aquila, et in arduis ponet nidum suum ?	27 Numquid ad praeceptum tuum elevabitur aquila et in arduis ponet nidum suum?
28 In petris manet, et in præruptis silicibus commoratur, atque inaccessis rupibus.	28 In petris manet et in praeruptis silicibus commoratur atque in culmine et arce.
29 Inde contemplatur escam, et de longe oculi ejus prospiciunt.	29 Inde contemplatur escam, et de longe oculi eius prospiciunt.
30 Pulli ejus lambent sanguinem : et ubicumque cadaver fuerit, statim adest.	30 Pulli eius lambent sanguinem; et, ubicumque cadaver fuerit, statim adest ”.
31 Et adjecit Dominus, et locutus est ad Job :
32 Numquid qui contendit cum Deo, tam facile conquiescit ? utique qui arguit Deum, debet respondere ei.
33 Respondens autem Job Domino, dixit :
34 Qui leviter locutus sum, respondere quid possum ? manum meam ponam super os meum.
35 Unum locutus sum, quod utinam non dixissem : et alterum, quibus ultra non addam.