Sapienza ܚܟܡܬܐ 2

1 2 3 4 5 6 7 8 9 10 11 12 13 14 15 16 17 18 19
Versetti esaminati

1ܐܡܪܘ ܓܝܪ ܒܢܦܫܗܘܢ ܘܠܐ ܐܬܚܫܒܘ ܬܪܝܨܐܝܬ ܙܥܘܪ ܗܘ ܘܒܥܩܬܐ ܗܘ ܥܘܡܪܢ ܘܠܝܬ ܐܣܝܘܬܐ ܒܡܦܩܢܗ ܕܐܢܫܐ ܘܠܐ ܐܬܓܠܝ ܗ̇ܘ ܕܐܫܬܪܝ ܡܢ ܫܝܘܠ2ܡܛܠ ܕܡܢ ܫܠܝܐ ܗܘܝܢ ܘܡܢ ܒܬܪ ܗܠܝܢ ܗܦܟܝܢܢ ܕܢܗܘܐ ܐܝܟ ܕܠܐ ܗܘܝܢ ܡܛܠ ܕܐܝܟ ܬܢܢܐ ܗܝ ܪܘܚܐ ܒܢܚܝܪ̈ܝܢ ܘܡܠܬܐ ܐܝܟ ܒܠܨܘܨܝܬܐ ܡܬܬܙܝܥܐ ܒܠܒܢ3ܕܡܐ ܕܕܥܟܬ ܐܝܟ ܩܛܡܐ ܗܘܐ ܦܓܪܐ ܘܪܘܚܐ ܡܬܐܫܕܐ ܐܝܟ ܐܐܪ ܪܦܝܐ4ܘܡܬܛܥܐ ܫܡܢ ܒܬܪ ܙܒܢܐ ܘܐܢܫ ܠܐ ܡܬܕܟܪ ܥܒ̈ܕܝܢ ܘܥܒܪ ܥܘܡܪܢ ܐܝܟ ܥܩ̈ܒܬܐ ܕܥܢ̈ܢܐ ܘܐܝܟ ܥܪܦܠܐ ܕܡܬܪܕܦܐ ܡܢ ܙܠܝܩ̈ܘܗܝ ܕܫܡܫܐ ܘܚܘܡܗ ܕܫܡܫܐ ܝܩܝܪ ܥܠܝܗ̇5ܛܠܢܝܬܐ ܓܝܪ ܕܥܒܪܐ ܐܝܬܘܗܝ ܥܘܡܪܢ ܘܠܝܬ ܐܣܝܘܬܐ ܒܡܦܩܢܢ ܡܛܠ ܕܐܬܚܬܡ ܘܠܝܬ ܕܡܗܦܟ6ܬܘ ܡܟܝܠ ܢܬܒܣܡ ܡܢ ܗܠܝܢ ܛܒ̈ܬܐ ܘܢܬܚܫܚ ܡܢ ܗܠܝܢ ܒܪ̈ܝܬܐ ܚܦܝܛܐܝܬ ܒܛܠܝܘܬܢ7ܚܡܪܐ ܓܒܝܐ ܘܒܣ̈ܡܢܐ ܢܬܡܠܐ ܘܠܐ ܢܥܒܪ̈ܢ ܥܘ̈ܦܝܗ̇ ܕܐܐܪ8ܢܬܟܠܠ ܡܢ ܗܒ̈ܒܘܗܝ ܕܘܪܕܐ ܥܕ ܠܐ ܢܚܡܐ9ܘܠܐ ܐܢܫ ܡܢܢ ܢܗܘܐ ܕܠܐ ܒܣܡܐ ܥܕܡܐ ܠܣܝܒܘܬܢ ܘܒܟܠ ܐܬܪ ܢܫܒܘܩ ܣܘܒܠܐ ܕܒܣܡܢ ܡܛܠ ܕܗܕܐ ܗܝ ܡܢܬܢ ܘܗܕܐ ܗܝ ܝܪܬܘܬܢ10ܘܢܬܥܫܢ ܥܠ ܡܣܟܢܐ ܙܕܝܩܐ ܘܠܐ ܢܚܘܣ ܥܠ ܐܪܡܠܬܐ ܘܐܦ ܠܐ ܥܠ ܝܬܡܐ ܘܠܐ ܢܒܗܬ ܡܢ ܣܒܐ ܥܬܝܩ ܝܘܡ̈ܬܐ11ܢܗܘܐ ܠܢ ܚܝܠܢ ܢܡܘܣܐ ܕܙܕܝܩܘܬܐ ܡܛܠ ܕܟܪܝܗܐ ܐܝܟ ܡܚܝܠܐ ܡܬܟܘܢ12ܢܥܟܪ ܠܙܕܝܩܐ ܡܛܠ ܕܠܐ ܒܣܝܡ ܠܢ ܩܐܡ ܓܝܪ ܠܘܩܒܠ ܥܒ̈ܕܝܢ ܘܡܚܣܕ ܠܢ ܒܥܒ̈ܕܘܗܝ ܕܢܡܘܣܐ ܘܡܕܟܪ ܥܠܝܢ ܣ̈ܟܠܘܬܐ ܕܡܪܚܘܬܢ13ܘܡܣܒܪ ܕܝܕܥܬܐ ܕܐܠܗܐ ܐܝܬ ܒܗ ܘܐܡܪ ܥܠ ܢܦܫܗ ܕܒܪܗ ܐܢܐ ܕܐܠܗܐ14ܗܘܐ ܠܢ ܡܟܣܢܐ ܕܡܚܫ̈ܒܬܢ ܝܩܝܪ ܗܘ ܥܠܝܢ ܘܐܦ ܕܢܚܙܝܘܗܝ15ܡܛܠ ܕܠܐ ܕܡ̇ܐ ܠܕܐܚܪ̈ܢܝܢ ܥܘܡܪܗ ܘܡܫܚܠܦܝܢ ܐܢܘܢ ܫܒܝ̈ܠܘܗܝ16ܐܝܟ ܛܡ̈ܐܐ ܐܬܚܫܒܢ ܠܗ ܘܡܪܚܩ ܡܢ ܐܘܪ̈ܚܬܢ ܐܝܟ ܕܡܢ ܛܡܐܘܬܐ ܘܡܒܪܟ ܐܘܪ̈ܚܬܗܘܢ ܘܚܪܬܗܘܢ ܕܙܕܝ̈ܩܐ ܘܡܫܬܒܗܪ ܕܐܠܗܐ ܗܘ ܐܒܘܗܝ17ܢܚܙܐ ܐܢ ܫܪ̈ܝܪܢ ܐܢܝ̈ܢ ܡ̈ܠܘܗܝ ܢܢܣܝܘܗܝ ܒܡܦܩܢܗ18ܐܢ ܓܝܪ ܐܝܬܘܗܝ ܙܕܝܩܐ ܒܪܗ ܕܐܠܗܐ ܡܩܒܠ ܗܘ ܠܗ ܘܦܪܩ ܠܗ ܡܢ ܐܝ̈ܕܝܗܘܢ ܕܐܝܠܝܢ ܕܩܡܘ ܠܩܘܒܠܗ19ܒܨܥܪܐ ܘܒܬܫܢܝܩܐ ܢܫܐܠܝܘܗܝ ܕܢܕܥ ܝܨܝܦܘܬܐ ܕܡܟܝܟܘܬܗ ܘܢܒܩܝܘܗܝ ܐܠܐ ܐܝܬ ܒܗ ܒܝܫܬܐ20ܠܡܘܬܐ ܡܦܪܣܝܐ ܢܚܫܒܝܘܗܝ ܢܗܘܐ ܓܝܪ ܥܠܘܗܝ ܫܐܘܠܐ ܡܢ ܡ̈ܠܘܗܝ21ܗܠܝܢ ܐܬܚܫܒܘ ܦܟܝ̈ܗܐ ܘܛܥܘ ܡܛܠ ܕܥܘܪܬ ܐܢܘܢ ܒܝܫܘܬܗܘܢ22ܘܠܐ ܐܝܕܥܘ ܪ̈ܐܙܘܗܝ ܕܐܠܗܐ ܘܠܐ ܣܒܪܘ ܥܠ ܐܓܪܐ ܚܣܝܐ ܘܠܐ ܕܢܘ ܢܦܫܬ̈ܐ ܕܣܒ̈ܐ ܕܕܠܐ ܡܘܡ23ܡܛܠ ܕܐܠܗܐ ܒܪܐ ܐܢܫܐ ܕܠܐ ܚܒܠܐ ܒܝܘܩܢܐ ܕܕܡܘܬܗ ܓܒܝܠܬܗ24ܒܚܣܡܗ ܕܐܟܠܩܪܨܐ ܥܠ ܡܘܬܐ ܠܥܠܡܐ ܡܢܣܝܢ ܠܗ ܕܝܢ ܐܝܠܝܢ ܕܡܢܬܗ ܐܢܘܢ