Genesi 40

NOVA VULGATA	VULGATA
1 His ita gestis, accidit ut peccarent pincerna regis Aegypti et pistor domino suo.	1 His ita gestis, accidit ut peccarent duo eunuchi, pincerna regis Ægypti, et pistor, domino suo.
2 Iratusque pharao contra duos eunuchos, praepositum pincernarum et praepositum pistorum,	2 Iratusque contra eos Pharao (nam alter pincernis præerat, alter pistoribus),
3 misit eos in carcerem principis satellitum, in quo erat vinctus et Ioseph.	3 misit eos in carcerem principis militum, in quo erat vinctus et Joseph.
4 Et princeps satellitum tradidit eos Ioseph, qui ministrabat eis. Aliquantulum temporis illi in custodia tenebantur.	4 At custos carceris tradidit eos Joseph, qui et ministrabat eis : aliquantulum temporis fluxerat, et illi in custodia tenebantur.
5 Videruntque ambo somnium nocte una iuxta interpretationem congruam sibi.	5 Videruntque ambo somnium nocte una, juxta interpretationem congruam sibi :
6 Ad quos cum introisset Ioseph mane et vidisset eos tristes,	6 ad quos cum introisset Joseph mane, et vidisset eos tristes,
7 sciscitatus est eos dicens: “ Cur tristior est hodie solito facies vestra? ”.	7 sciscitatus est eos, dicens : Cur tristior est hodie solito facies vestra ?
8 Qui responderunt: “ Somnium vidimus, et non est qui interpretetur nobis ”. Dixitque ad eos Ioseph: “ Numquid non Dei est interpretatio? Referte mihi quid videritis ”.	8 Qui responderunt : Somnium vidimus, et non est qui interpretetur nobis. Dixitque ad eos Joseph : Numquid non Dei est interpretatio ? referte mihi quid videritis.
9 Narravit praepositus pincernarum somnium suum: “ Videbam coram me vitem,	9 Narravit prior, præpositus pincernarum, somnium suum : Videbam coram me vitem,
10 in qua erant tres propagines, crescere paulatim in gemmas et post flores uvas maturescere;	10 in qua erant tres propagines, crescere paulatim in gemmas, et post flores uvas maturescere :
11 calicemque pharaonis in manu mea. Tuli ergo uvas et expressi in calicem, quem tenebam, et tradidi poculum pharaoni ”.	11 calicemque Pharaonis in manu mea : tuli ergo uvas, et expressi in calicem quem tenebam, et tradidi poculum Pharaoni.
12 Respondit Ioseph: “ Haec est interpretatio somnii: tres propagines, tres adhuc dies sunt,	12 Respondit Joseph : Hæc est interpretatio somnii : tres propagines, tres adhuc dies sunt :
13 post quos elevabit pharao caput tuum et restituet te in gradum pristinum; dabisque ei calicem iuxta officium tuum, sicut facere ante consueveras.	13 post quos recordabitur Pharao ministerii tui, et restituet te in gradum pristinum : dabisque ei calicem juxta officium tuum, sicut ante facere consueveras.
14 Tantum memento mei, cum tibi bene fuerit, et facias mecum misericordiam, ut suggeras pharaoni, ut educat me de isto carcere;	14 Tantum memento mei, cum bene tibi fuerit, et facias mecum misericordiam : ut suggeras Pharaoni ut educat me de isto carcere :
15 quia furto sublatus sum de terra Hebraeorum et hic innocens in lacum missus sum ”.	15 quia furto sublatus sum de terra Hebræorum, et hic innocens in lacum missus sum.
16 Videns pistorum magister quod somnium in bonum dissolvisset, ait: “ Et ego vidi somnium, quod tria canistra farinae haberem super caput meum;	16 Videns pistorum magister quod prudenter somnium dissolvisset, ait : Et ego vidi somnium : quod tria canistra farinæ haberem super caput meum :
17 et in uno canistro, quod erat excelsius, portare me ex omnibus cibis pharaonis, qui fiunt arte pistoria, avesque comedere eos ”.	17 et in uno canistro quod erat excelsius, portare me omnes cibos qui fiunt arte pistoria, avesque comedere ex eo.
18 Respondit Ioseph: “ Haec est interpretatio somnii: tria canistra, tres adhuc dies sunt,	18 Respondit Joseph : Hæc est interpretatio somnii : tria canistra, tres adhuc dies sunt :
19 post quos auferet pharao caput tuum ac suspendet te in patibulo, et comedent volucres carnes tuas ”.	19 post quos auferet Pharao caput tuum, ac suspendet te in cruce, et lacerabunt volucres carnes tuas.
20 Exinde dies tertius natalicius pharaonis erat; qui faciens grande convivium pueris suis elevavit caput magistri pincernarum et caput pistorum principis in medio puerorum suorum;	20 Exinde dies tertius natalitius Pharaonis erat : qui faciens grande convivium pueris suis, recordatus est inter epulas magistri pincernarum, et pistorum principis.
21 restituitque alterum in locum suum, ut porrigeret ei poculum,	21 Restituitque alterum in locum suum, ut porrigeret ei poculum :
22 alterum suspendit in patibulo, sicut interpretatus erat eis Ioseph.	22 alterum suspendit in patibulo, ut conjectoris veritas probaretur.
23 Attamen praepositus pincernarum non est recordatus Ioseph, sed oblitus est interpretis sui.	23 Et tamen succedentibus prosperis, præpositus pincernarum oblitus est interpretis sui.