El Santo Vangelo segond Mattee 4

1 2 3 4 5 6 7 8 9 10 11 12 13 14 15 16 17 18 19 20 21 22 23 24 25 26 27 28

¹ALLORA Gesù l'è staa menaa dal Spirit in del desert, per fà, ch'el diavol le tentass.²E dopo avè digiunaa quaranta di, e quaranta nott, a la fin gh'è vegnuu famm.³E mettendeghes ai cost el tentador, el gh'ha ditt: Se te see fioeu del Signor, fa in manera, che sti prej deventen pan.⁴Lu, respondendegh, el ghe dis: Gh'è scritt: Che l'omm el viv minga domà de pan, ma d'ogni parolla, che ven foura de la boca del Signor.⁵Allora el diavol l'ha menaa in la cittaa santa, e'l l'ha miss giò su la scima del tempi,⁶E 'l gh' ha ditt: Se te see fioeu del Signor, sbattet gió. De già che gh'è scritt: Ch'el t' ha raccomandaa ai seu angioj, e lor te portaran in brasc, per fà, che coi pee no te topicchet in di prej.⁷Gesù el gh'ha ditt: Gh'è scritt anca: Te tentaree minga Domeneddio.⁸El diavol, de capp, l'ha menaa sora a on mont ben ben per aria: e 'l gh' ha fa vedė tutt i quatter part del mond cont tutt el sò bell,⁹E 'l gh' ha ditt: Mì te daroo tutta sta robba, se te me adoraree in gencucc.¹⁰Allora Gesù el gh' ha ditt: Va via, satanass: perchè gh'è scritt: Adora Domeneddio, e servel lu soll.¹¹Allora el diavol l'ha pientaa: e ghe s' è miss intorna i angioj a servill.¹²Gesù peu avend sentii, che Giovann l'era staa miss in preson, el s' è retiraa in Galilea:¹³E abandonand la cittaa de Nazaret, l'è andaa a abità in Cafarnaum, cittaa in riva al mar ai confin de Zabulon e Neftali:¹⁴Per fà, che succedess quell, ch' era staa ditt da Isaia profetta:¹⁵La terra de Zabulon, e la terra de Neftali, che mena al mar de là del Giordan, la Galilea di nazion.¹⁶El popol, che camminava a scur, l'ha veduu ona gran lus: e la lus l'è vegnuda su per quij tai, che eren sotterraa in l'ombria de la mort.¹⁷Dopo d'allora l'ha comenzaa Gesù a predicà, e a di: Fee penitenza: perchè gh'è vesin el paradis.¹⁸E camminand Gesù de fianch al mar de Galilea, l'ha veduu duu fradej, Simon cont in nomm Peder, e Andreja sò fradell, che buttaven la red in mar (perchè eren pescador ),¹⁹E'l gh'ha ditt: Vegnimm adree a mì, che mi ve faroo deventà pescador d'omen.²⁰E lor han pientaa lì subet i red, e gh'hin andaa adree.²¹E de li andand inanz, l'ha veduu duu d'alter fradej, Giacom de Zebedee, e Giovann sò fradell, dent in d'ona barca insemma cont Zebedee sò pader, che giu staven i soeu red: e j'ha ciamaa.²²E lor subet, pientand e red e pader, gh'hin andaa adree.²³E Gesù l'andava intorna per tutta la Galilea, insegnand in di sò sinagogh de lor, e predicand el Vangeli del paradis, e fasend guarì tutt i piagh, e tutt i malattij del popol.²⁴E la nomina, ch'el s'era faa l'andava per tutta la Siria, e gh'han presentaa tucc quij tai, che eren mal in gamba, e tocch d'ogni sorta de malann e de dolor; quij, che gh'aveven el diavol adoss, i lunategh, e i paralitegh; e lu j'ha faa guari.²⁵E gh'è trottaa adree ona frotta de gent de la Galilea, de la Decapoli, de Gerusalemm, de la Giudea, e de là del Giordan.