El Santo Vangelo segond Mattee 3

1 2 3 4 5 6 7 8 9 10 11 12 13 14 15 16 17 18 19 20 21 22 23 24 25 26 27 28

¹IN quell temp là è vegnuu Giovann Battista a predicà in del desert de la Giudea,²E'l diseva: Fee penitenza: perchè el paradis ghe l'emm ai spall.³Perchè quest chì l'è quell tal omm, che l'ha parlaa Isaia profetta, disend: La vos de quell, che sbragia in del desert: Preparee la strada del Signor: tiree drizz i scu sentee.⁴E lu l'istess Giovann el gh' aveva ona vesta de pell de camell, e ona zenta de coramm in vitta: e 'l sò mangià eren locust, e mel salvadegh.⁵Allora andava là de lu Gerusalemm, e tutta la Giudea, e tutt el paes intorna al Giordan.⁶quand gh' aveven confessaa i sou peccaa, je battezzava in del Giordan.⁷Ma siccome lu el vedeva a vegnì a fass battezza tanti Farisee, e Saducee, el gh'ha ditt: Razza de viper, chi ve insegna a scappà via de la rabbia, che dev vegnì?⁸Fee donca di frut degn de penitenza.⁹E no me stee a di denter de vialter: Gh' emm Abramm per pader. Perchè mì ve disi, ch' el Signor el pò fà saltà foura de sti prej di fioeu de Abramm.¹⁰Perchè la folc l'è giamò a la radis di piant. Donca ogni pianta, che farà minga bon frut, la sarà tajada, e drovada de fà fough.¹¹Per adess mì ve battezzi cont l'acqua per penitenza: ma quell, ch'ha de vegnì dopo de mi, e che mi ghe porti nanca adree i sciavatt, lu el ve battezzarà cont el Spiritusant, e col foeugh.¹²Lu, cont la soa pala in man, el nettarà la soa era, e'l calcarà el forment in granee; ma el brusarà la paja cont on fough, che se smorza pu.¹³Allora Gesù l'è rivaa de Galilea al Giordan in de Giovann, per vess battezzaa de lu.¹⁴Ma Giovann nol voreva saveghen, disend: Mi gh' hoo bisogn de vess battezzaa de ti, e ti te vegnet de mi?¹⁵Ma Gesù el gh' ha rispost, disend: Lassa fà per adess: perchè inscì ne conven a fà per vess in regola. Allora l'ha faa a sò mceud.¹⁶Gesù, penna battezzaa, l'è vegnuu foura de l'acqua. E ecco che ghe s'è dervii el ciel: e l'ha veduu el Spirit del Signor a vegnì giò come ona colomba, e fermass sora de lu.¹⁷In quell menter s'è sentii ona vos del ciel, che diseva: Quest chi l'è el mè fioeu, che ghe vuj ben, e in lu me sont compiasuu.