El Santo Vangelo segond Mattee 2

1 2 3 4 5 6 7 8 9 10 11 12 13 14 15 16 17 18 19 20 21 22 23 24 25 26 27 28

¹ESSEND donca nassuu Gesù in Betlemm de Giuda in temp, che regnava el re Erod, ecco che i Mag riven d'orient a Gerusalemm,²E disen: In dove l'è el re di Giudee, ch'è nassuu? perchè nun emm vist la stella in orient, e semm vegnuu chì per adorall.³Sentend sti robb el re Erod, el se stremiss, e insemma a lu tutta Gerusalemm.⁴E ciamand a consej tutt i capp di sazerdott, e i Scriba del popol, el ghe domanda indove l'è, che l'avaria dovuu nass el Crist.⁵Ma lor gh'han risponduu: In Betlemm de Giuda: perchè el profetta l'aveva scritt a sta manera:⁶E ti Betlemm, terra de Giuda, te see minga la pussee piscinina tra i cittaa de Giuda: perchè de tì ha de vegnì foeura el capitani, ch' ha de governà el mè popol d'Israell.⁷Allora Erod el fa ciamà in segrett i Mag, e 'l scava foura ben polit el temp, che gh'è compars la stella.⁸E mandandi a Betlemm, el gh' ha ditt: Andee, e ciamee cunt polit del fioeu: e quand l'avarii trovaa, femel savè, per fà, che poda vegnì anca mì a adorall.⁹Dopo avè sentuu el re, lor hin andaa. E ecco lì che la stella, che aveven vist in orient, se la trouven denanz de battistrada, fina a tant che rivada dove gh' era el bambin, la s'è fermada.¹⁰Quand ch'han vist la stella, s' hin sentuu tutt a consolà.¹¹E andand denter in cà, han trovaa el bambin cont Maria soa mader, e ingenugiandes giò, l'han adoraa: e dopo avè dervii foura i sau tesor, gh' han faa di regaj de or, incens, e mirra.¹²Essend pou staa visaa in sogn de tornà minga indree in de Erod, hin tornaa al sò paes de lor per tutt' altra strada.¹³Appenna che lor hin voltaa via, l'angiol del Signor el gh'è compars in sogn a Giusepp, e 'l gh ' ha ditt: Leva su, e ciappa el bambin, e la soa mamma, e scappa in Egitt, e fermet là fin che to el dirol mì: perchè succedarà, che Erod el cercarà el fioeu per fenill foura.¹⁴Lu, penna dessedaa, l'ha ciappaa mader e fioeu, che l'era anmò scur, e ghe l'ha dada in Egitt.¹⁵E là el s'è fermaa fina a la mort de Erod: per fà, che succedess quell, ch'era staa ditt dal Signor per mezz del profetta, ch'el dis: Hoo ciamaa mè fioeu de l'Egitt.¹⁶Allora Erod vedendes mincionaa di Mag, el s' è inrabbii maladettament, e l'ha mandaa a scannà tutt i fioeu, che gh'era in Betlemm, e in di contorna, de l'etaa di duu ann in giò, segond el temp, che l'aveva interquerii parland coi Mag.¹⁷Allora s'è verificaa i paroll del profetta Geremia, ch' el diseva:¹⁸Fina a Rama s'è sentii a vosà, a piang, a sgari: Rachella la piangeva i soeu fieu, e la podeva minga dassen pas, perchè gh'eren pu.¹⁹Mort peu Erod, ecco che l'angiol del Signor el gh'è compars in sogn a Giusepp in Egitt,²⁰Disendegh: Leva su, e ciappa el fioeu cont la soa mamma, e va in la terra d'Israell: perchè hin mort quij tai, che voreven fagh la pell al bambin.²¹Lu, penna dessedaa, l'ha tolt su el bambin, e la soa mamma, e l'è vegnuu in la terra d'Israell.²²Sentend poeu, che Archelao el regnava in Giudea in scambi de Erod so pader, el gh' ha avuu paura a anda là: e visaa in sogn, el s' è ritiraa in Galilea.²³Rivaa là, l'ha loggiaa in d'ona cittaa, che se ciama Nazaret: per fà, che succedess quell, ch'era staa ditt dai profetta: Ch'el sarà ciamaa Nazaren.