El Santo Vangelo segond Mattee 18

1 2 3 4 5 6 7 8 9 10 11 12 13 14 15 16 17 18 19 20 21 22 23 24 25 26 27 28

¹IN quell men ter ghe s' hin vesinnaa a Gesù i soeu scolar, e gh' han ditt: Chi l'è mò el pussee grand in paradis?²E Gesù l'ha ciamaa arent on fieu, e l'ha faa anda in mezz a lor,³E l'ha ditt: In veritaa mì ve disi, che se ve convertarii minga, e deventarii minga comè fioeu, andarii minga in paradis.⁴Donca, chi se sia deventarà piscinin compagn de sto fieu, quell el sarà el pussee grand in paradis.⁵E chi se sia ricevaraa a mè nomm on Fioeu come quest chì, el me ricev mì.⁶Chi pou darà scandol a quajvun de sti piscinitt, che me creden a mì, el saria mej per lu, cho el se fuss taccaa al coll on pes d'asen, e ch' el se fuss sprofondaa in mar.⁷Guaj al mond per via di scandoj. Perchè l'è inevitabil, che ghe sia di scandoj: ma guaj a quell' omm, che per causa soa succed on scandol.⁸Che se per combinazion la toa man, o el to pè te dassen scandol: tajeti via, e s'giacchi lontan de ti: l'è mej per ti rivà in paradis cont on pè de men, o ona man de men, che nè andà a l'inferna cont tutt do i man, e tutt duu i pee.⁹E se el tò cucc el te serv de scandol, streppetel foura, e buttel de lontan de tì: l'è mej per ti anda in paradis cont on cucc sol, che ne andà a l'inferno cont duu.¹⁰Guardev ben de sprezzà quajvun de sti piscinitt: perchè mì ve foo savè, che i soeu angioj de lor, ch'hin in ciel, veden semper la faccia de mè Pader, che l'è in ciel.¹¹Perchè el Fioeu de l'omm l'è vegnuu a salvà quell, ch'era andaa perduu.¹²Cosse ven par a vialter? se vun el gh'avess cent pegor, e voeuna de quist la se perdess: el pienta minga là i alter norantaneuv, e 'l gira a cercà quella, che s'è perduu?¹³E s'el riva a trovalla: ve disi la veritaa, che l'pussee content de questa chì, che di norantanoeuv, che s'è minga perduu.¹⁴In l'istessa manera, vost Pader, che l'è in ciel, el voeur, che se perda nanca vun de sti piscinitt.¹⁵Che se tò fradell el t'avess faa ona bozzera, va, tirel de part, e correggel a quattr' cucc. Se lu el te da a trà, to hee guadagnaa to fradell.¹⁶Se pou el te da minga a trà, menna adree do, o tre personn, per fà, che cont i paroll de duu, o trii testimoni se giusta tuttcoss.¹⁷E se ghe importarà nagott nanca de lor, faghel save a la gesa. E s'el ghe dà minga a trà nanca a la gesa, considerel per on gentil, on publican.¹⁸In veritaa mi ve disi: Tutt quell, che ligarii su la terra, el sarà ligaa in ciel: e tutt quell, che desligarii su la terra, el sarà desligaa anca in ciel.¹⁹Ve disi anca, che se duu de vialter se mettaran d'accord a domandà quell che se sia a sto mond, ghe sarà conceduu tutt da mé Pader, che l'è in ciel.²⁰Perchè dove gh'è dò o tre personn, che se tran insemma a nomm mė, mì sont là in mezz a lor.²¹Allora ghe s'è vesinaa Peder, e 'l gh'ha ditt: Signor, finna a quanti vault ghe perdonaroo a me fradell, che me fà del maa? finna a la settima voeulta?²²Gesù el ghe dis: Te disi minga finna a sett veult: ma finna a settanta volt sett.²³Per quest el paradis el someja a on re, che ha voruu fa i cunt ai sò servitor.²⁴E cominciand a guardà l'attivitaa, gh'è staa presentaa vun, che ghe doveva des milla talent.²⁵E siccome quest chì l'era minga in cas de pagà, el padron l'ha daa orden de vend lu, soa miee, i fioeu, e tutt quell, ch'el gh' aveva, per pagà el debit.²⁶Ma el servitor ingenugiandes, el le pregava, disend: Abbia pazienza, che te daroo tuttcoss.²⁷Essendegh vegnuu compassion al padron de quell servitor, el l'ha miss in libertaa, e 'l gh' ha perdonaa el debit.²⁸Appenna via de lì el servitor, l'ha incontraa on servitor sò camarada, che ghe doveva cent danee: l'ha ciappaa per la gola, e le strangolava disendegh: Damm quell, che te me devet.²⁹E'l servitor sò camarada, in gencucc le pregava, disend: Abbia pazienza, che te pagaroo tutt.³⁰Ma lu l'ha voruu nò: e l'è andaa a fall mett in preson fin a tant che l'avess pagaa.³¹Ma veduu sto fatt i alter servitor, el gh' ha faa tant mal, che hin andaa del padron, e gh' han cuntaa su tutt quell, ch'era success.³²Allora el padron l'ha ciamaa denanz de lu, e l'gh' ha ditt: Servitor canaja, mì t'hoo perdonaa tutt el debit, perchè te see raccomandaa a mì:³³Te dovevet minga donca anca tì avè compassion d'on servitor tò camarada, come mi gh' hoo avuu compassion de ti?³⁴E'l padron rabbiaa, l' ha daa in man ai sbirr, per fin a tant che l'avess pagaa tutt el debit.³⁵Istess precis el farà cont vialter mè Pader in ciel, se chisessia de vialter no perdonarà de coeur ai soeu fradej.