El Santo Vangelo segond Mattee 28

1 2 3 4 5 6 7 8 9 10 11 12 13 14 15 16 17 18 19 20 21 22 23 24 25 26 27 28

¹A LA nott poeu del sabet,vegnend a la mattina, la Maddelenna, e l'altra Maria hin andaa a vedè el sepolcher.²In quella succed on gran terremott. E l'è, che l'angiol del Signor vegnuu del ciel l'è andaa là, e l'ha voltaa coi gamb per aria la preja, e l'era là settaa su:³La soa faccia l'era come ona lusnada, e la soa vesta l'era bianca come la nev.⁴E i guardi per la gran paura de lu hin restaa li come mort.⁵Ma l'angiol del Signor mettendes a parlà el gh' ha ditt ai donn: Abbiee minga paura vialter: che soo, che cerchee Gesù, ch'è staa miss in cros:⁶Lu l'è minga chỉ: perchè l'è resuscitaa, come l'aveva ditt. Vegnii a vedè el sit, dove l'era buttaa giò el Signor.⁷Andee subet, e disigh ai sò scolar, che lu l'é resuscitaa: e intanta el ve va denanz in Galilea: là el vedarii. Ecco che mì v' hoo avvertii.⁸E lor vegnend foura subet del sepolcher pienn de stremizzi, e d' allegria, hin cors a dagh la notizia ai' scolar.⁹In quella Gesù el gh'è andaa incontra, e 'l gh' ha ditt: Addio. E lor gh' hin andaa vesin, e gh'han brasciaa su i pee, e l'han adoraa.¹⁰Allora Gesù el gh' ha ditt: Abbiee minga paura. Andee, disigh ai mè fradej, che vaghen in Galilea; me vedaran là.¹¹Appenna via lor, quajvoeuna di guardi l'è andada in cittaa, e l'ha riportaa ai capp di sazerdott tutt quell, ch' era success.¹²E quist trandes insemma coi anzian, e fasend complott, gh' han daa ona bella somma ai soldaa,¹³Disendegh: Disari: I sò scolar hin vegnuu de nott, e intanta che nun dormivem, l'han robaa.¹⁴E se'l president al vegnarà a savè sta robba, nun el quiettaremm, e ve liberaremm d'ogni seccadura.¹⁵E lor han ciappaa el danee, e han faa quell, che gh' era staa insegnaa. E sta vos la s' è trada attorna in mezz ai Ebrej, finna al di d'incoeu.¹⁶Ma vundes scolar hin andaa in Galilea al mont, che gh' ha insegnaa Gesù.¹⁷E quand l'han vist l'han adoraa: ma quajghe dun hin restaa in dubbi.¹⁸Ma Gesù vesinandes el gh' ha parlaa, disend: A mi m'è staa daa tutta la potenza in ciel e in terra.¹⁹Andee donca, e istruii foura tutta la gent: battezzandi a nomm del Pader, del Fioeu, e del Spiritusant:²⁰Insegnègh a fà tutt quell, che mi v'hoo comandaa: e mi saront cont vialter tutt i dì, finna a la consumazion di secoj.