Lu Santo Vancieliu secunnu Matteo 9

1 2 3 4 5 6 7 8 9 10 11 12 13 14 15 16 17 18 19 20 21 22 23 24 25 26 27 28

¹NCHIANATU supra na varchicella, ripassau lu E lacu, e sinne jiu alla citate sua.²Ed eccute ca li se prisentau nu paraliticu jettatu a nu funnu de liettu. E Gesù vidiennu la fide luoru, dicette a chillu paraliticu: Figliu mio, tene fide, ca te sunu perdunate tutte le peccata.³Ma ' nzubitu zierti Scribbi dissanu dintra de illi: Chistu jastimadi.⁴E vidiennu Gesù chillu, chi stavanu pensannu, le dicette: Ppecchi jati faciennu tanti mali pensieri dintra de lu core vuostru?⁵Cchi è cchiù facile a dire: Te sunu perdunate le peccata tua: o puru dire: Susate, e camina?⁶Ed acciò mò lu sapiti, ca lu Figliu de l'uomu ha tuttu lu putire supra la terra de perdunare tutte le peccata: Azate, disse a chillu paraliticu, 'mpesate lu liettu, e vavatinne alla casicella tua.⁷Ed illu se susiudi, e sinne jiudi alla casa sua.⁸Appena chi le turbe videttanu chistu, se pigliaru de pagura, e ludaru Dio, ch'avia datu all'uomu tanta putestate.⁹Ed essiennu Gesù passatu cchiù avanti, vidette n' uominu sedutu supra nu vancu, chi se chiamava Mattio. E le dicette: Vieni appriessu a mie. Ed illu s’azau, e lu seguiu.¹⁰E 'ntramente chi stavadi sedutu 'ntavula dintra la casa, eccute ca jieru na nquantitate de prubbicani e peccaturi, e se sedieru puru ’ntavula ccu Gesù, e li discipuli sue.¹¹E vidiennu chistu li Farasei, dicianu alli discipuli sue: Ppecchi lu Mastru vuostru mancia ccu li prubbicani e ccu li peccaturi?¹²Ma Gesù, ch'avia ’ntisu tuttu, le dicette: Nun hau bisuognu de lu miedicu chilli, chi stau buoni, ma 'nvece li malati.¹³Mò jative; 'mparati chillu, chi vò dire: Io vuogliu la misericuordia, e nno lu sacrificiu. Un signu venutu ppe chiamare lu giustu, ma lu peccature.¹⁴Allura li se abbicinaru li discipuli de Giuvanni, e le dissanu: Ppecchì nue ccu li Farasei dijunamu spissu, e li discipuli tue nun dijunanu?¹⁵E Gesù le rispunniudi: Puonnu mai li figli de lu spusu chiancere, quannu lu spusu l'hau ccud illi? Vena pue lu tiempu, chi lu spusu le vene cacciatu: e tannu dijunanu.¹⁶Nullu 'mpacchia na pezza de pannu nuovu a na vestitura vecchia: ppecchì le succede, ca la rropa nova sinne raga la vecchia, e lu grupu se fa cchiù largu.¹⁷Nuè mintanu lu vinu nuovu all'utri viecchi: ppecchì le trammene, ca se rumpanu l'utri, e lu vinu se funna ’nterra, e l'utri se vaudi a fare benedire. Ma si se minta lu vinu nuovu all'utri nuovi, l'unu, e l'autri stau 'nzarvu.¹⁸'Ntramente chi parrava desta manera, eccute ca unu de chilli principi le jiudi alla banna, diciennu: Segnure, pruopiu muoni na figlicella mia è morta: ma vieni, stenne la manu tua supra de illa, ca se rivisciadi.¹⁹E Gesù se iziudi, e le jiudi appriessu ccu li discipuli sue.²⁰Ed eccute na fimmina, chi patia de na fusione de sangu a dudici anni, li se accustau darrietu, e le tuccau lu lavru suttanu de la vesta.²¹Ppecchi dicia dintra de illa: Si quantu amalepene tuoccu la vesta sua, signu sanata.²²Ma Gesù vutatuse, la guardau, e le dicette: Figlia mia, statti de bonanimu, ca la fide tua te ha sarvatu. E'nchillu stante la fimmina foze sarva.²³Ed essiennu arrivatu Gesù alla casa de chillu principe, te vidette le trummette e na frattaria de gente, chi facia nu timultu, e le diciu:²⁴Jativinne: ppecchi la quatrarella nun è morta, ma dormadi. Ed illi sinne 'njerfiavanu.²⁵Quannu pue esciu fore tutta chilla gente, illu trasiudi, la pigliau ppe la manu, e la quatrarella s'azaudi.²⁶E sinne sparse la nnuminata ppe tuttu chillu paise.²⁷E ’ntramente chi pue Gesù sinne partiadi, dui cecati le currianu appriessu, gridannu, e diciennu: Fi gliu de Davide, aje pietate de nue.²⁸’Nzubitu chi pue foze arrivatu alla casa, li se prisentaru davanti li cecati. E Gesù le dicette: Criditi vue, ca io ve puozzu fare giovamientu? Ed illi le dicianu: Sini, Segnure.²⁹Allura le tuccau l'uocchi, diciennu: A secunna de la fide vostra ve sia fatta la grazia.³⁰E l'uocchi luoru s'aperierudi: e Gesù amminazzannule, le dicette: Guardative de lu jire diciennu.³¹Ma illi ’nvece, appena sinne jierudi, ne sunaru lu cuornu ppe tuttu chillu paise.³²Depue juti chi sinne fozanu illi, li se prisentau n'uomu mutu, chi avia lu diavulu ’ncuorpu.³³E cacciatu lu diavulu, allu mutu le vinne ʼnzubitu la parola, e tutta chilla gente ne restau china de maraviglia, e diciadi: Mai cchiù s'è vista na cosa simile ad Isdraiellu.³⁴Ma li Farasei dicianu: Chistu caccia li demuoni ppe mienzu de lu capu de tutti li demuoni.³⁵E jiennu girijannu Gesù ppe tutte chille citati, e chille castella, dava ’nzegnamientu alle luoru sinicoche, e predicava lu vancieliu de lu riegnu, sanannu tutti li guai, e tutte le malatie.³⁶E vidiennu pue chilla frattaria de gente, se mosse a cumpassione de illa: ppecchi la vidia malamente ’ncaminata, e stava arringata cuomu piecure senza pecuraru.³⁷Allura disse alli discipuli sue: La massaria veramente è truoppu grossa, ma li vrazzali sù picca.³⁸Pregati addunca lu patrune de la massaria, chi mannassi metituri assai alla massaria sua.