Lu Santo Vancieliu secunnu Matteo 28

1 2 3 4 5 6 7 8 9 10 11 12 13 14 15 16 17 18 19 20 21 22 23 24 25 26 27 28

¹LA sira pue de lu sapatu, chi scampiava lu primu jurnu de la simana, vinne Maria Matalena, e l'autra Maria, a visitare lu summurcu.²Ed eccu ca fice nu granne terrimutu. Ppecchi l'anciulu de la Segnure scise de lu cielu: e abbicinannuse sversau la lapida, e sicce assettau de supra:³Era l'aspiettu sue cuomu nu lampu, e la vesta sua cuomu la nive.⁴Ppe la pagura li custodi se sbiguttieru, e se ficeru cuomu muorti.⁵Parrannu pue l'anciulu diciudi alle fimmine: Un ve spagnati: ca sacciu, ca circati Gesù, chi è statu crucifissu:⁶Nud é cca: ppecchì risuscitau, cunforma disse. Veniti, e viditi lu luocu, duve avianu mintutu lu Segnure.⁷E ’nzubitu jiennu, diciti alli discipuli sue, ca é risuscitatu: ed eccu ca vadi avanzi de vue 'nGalilea: llà lu viditi.Eccu ca io vinne aju avvisatu.⁸Ed esciennu tannu ppe tannu de lu summurcu ccu timure, e gaviu granne, currieru a darene la nova alli discipuli.⁹Ed eccu ca Gesù se fice avanti ad ille, diciennu: Dio ve sarvi. Ed ille li se abbicinaru, s'abbrazzaru alli piedi, e l'aduraru.¹⁰Tannu le disse Gesù: Un ve spagnati: Jati, e diciti alli fratielli mie, chi vajinu ’nGalilea: llà me viderannu.¹¹Partute chi fozeru, eccu ca zierti custodi vinneru a la citate, e cuntaru a li capi de li sacerduoti tuttu chillu, ch'era succiessu.¹²E cungregati ccu li seniuri, e fattu cunsurtu, dezeru na bona summa a li surdati,¹³Diciennu: Diciti: Li discipuli sue vinneru de notte, e si l'arruparu, mentreca durmiamu.¹⁴E si sta nutizia vadi alle ricchie de lu prieside, nue lu persuadimu, e ve facimu sicuri.¹⁵Ed illi, pigliatuse lu dinaru, ficeru, cuomu l'avianu 'mparatu. E chista nutizia è prubbica appriessu de li Judei, ' nzinca allu jurnu,d'oje.¹⁶Li unnici discipuli pue jieru 'nGalilea allu munte, chi l'aviadi ’nzegnatu Gesù.¹⁷E vidiennulu l'aduraru: ma ziertine dubitaru.¹⁸Ed abbicinannuse Gesù, parraudi ad illi, diciennu: Mi s'è datu uogni putire 'ncielu e ’nterra.¹⁹Jati addunca, ’nzegnati a tutti li gienti: vattiannule a nume de lu Patre, de lu Figliu, e de lu Spiritu santu:²⁰’Nzegnannu ad illi de fare tuttu chillu, chi v'aju cummanatu: ed eccu ca io signu ccu vue tutti li jurni, 'nfinca alla cunsumazione de lu sieculu.