Lu Santo Vancieliu secunnu Matteo 21

1 2 3 4 5 6 7 8 9 10 11 12 13 14 15 16 17 18 19 20 21 22 23 24 25 26 27 28

¹E CUOMU s'abbicinaru a Gerusalemme, e vinneru a Batfage a lu munte Ulivetu: tannu Gesù mannau dui discipuli,²Diciennu ad illi: Jati a lu castiellu, chi ve sta de frunte, e cce truvati n'asina ligata, e lu pullitru ccud illa: sciuglitila, e purtatimila:³E si ancunu ve dice 'ncuna cosa, diciti, ca lu Segnure n' ha bisuognu: e’nzubitu vi la duna.⁴Tuttu chistu abbinne, ppecchì s'adempiscissi chillu, chi disse lu prufeta, diciennu:⁵Diciti a la figlia de Sion: Eccu lu rre tue vena a tie mansuetu, 'ncavarcatu a na ciuccia, e nu ciucciariellu figliu de na ciuccia de jugu.⁶Jiennu pue li discipuli, ficenu, cuomu avia cummannatu Gesù.⁷E purtaru la ciuccia, e lu pullitru: e miseru supra de illa le vestita luoru, e cci lu ficeru assettare de supra.⁸Paricchie turbe pue spannieru ’nmienzu de la strata le vestiture luoru: autri tagliavanu ramura de arvuli, e le curcavanu ppe la via:⁹De pue le turbe, chi jianu avanzi, e chille, chi venianu appriessu, scramavanu, diciennu: Usanna allu figliu de Davide: benedittu chi vene a nume de lu Segnure: usanna all'autu cielu.¹⁰E cuomu foze trasutu a Gerusalemme, se scasau la citate tutta quanta, diciennu: Chin’è chistu?¹¹Li puopuli dicianu: Chistu ė Gesù prufeta de Nazaret ' nGalilea.¹²E trasiu Gesù a lu tiempiu de Dio, e ne cacciava tutti li vinnituri e cumpraturi: e le banche de li banchieri, e le sece de li vinnituri de palumme jetta ppe ’nterra:¹³E le dice: Sta scrittu: La casa mia se chiama casa d'orazione: vue n'aviti fattu na caverna de latruni.¹⁴E li s’abbicinaru dintra lu tiempiu cecati e ciunchi: e le sanau.¹⁵Vidiennu pue li capi de li sacerduoti, e li Scribbi, li meraculi, chi fice, e li quatrarielli, chi gridavanu ’nmienzu la ghiesia, e dicianu: Usanna a lu figliu de Davide: se 'nzirraru,¹⁶E le dicetteru: Sienti cchi dicu chisti? E Gesù rispunniu: Sini. Ud ayiti mai liettu: Ca de la vucca de li quatrarielli, e de chilli, chi vivu latte, hai rennuta perfetta laude?¹⁷E lassatille, sinne jiu fore de la citate a Betania: e cce durmiudi.¹⁸La matina pue turnannu 'ncitate, ’ ntise fame.¹⁹E vidiennu nu pede de ficu vicinu alla via, li se abbicinau: e nun cce truvau ca pampine, e le diciu: Un nasci mai de tie fruttu ’nsempitiernu: e se siccaudi llà ppe lladi chilla ficu.²⁰E vidiennu li discipuli, se maravigliaru, diciennu: Cuomu siccaudi a nu credde?²¹Rispunniennu pue Gesù, le disse: 'Nverità ve dicu, si aviti fide, e nun dubitati, nun sulu faciti chillu, ch'aju fattu de sta ficu, ma si puru diciti a stu munte: Va, e jettate a mare, d'accussi avvene.²²E tuttu chillu, chi circati pregannu, e cridiennu, utteniti.²³E venutu allu tiempiu, li s'accustaru li capi de li sacerduoti, e li seniuri de lu puopulu, mentreca illu ’nzegnava, diciennu: Ccu quale putire fai ste cose? E chine t'ha dunatu chistu putire?²⁴Rispunniennu Gesù, le disse: Ve fazzu puru io n'addummanna: e si me rispunniti, ve dicu puru io, ccu chi putire fazzu ste cose.²⁵Lu vattisimu, chi dava Giuvanni, de duve venia? de lu cielu, o de l'uomini? Ma illi pensavanu tra de illi, diciennu:²⁶Si dicimu, de lu cielu, illu ne dice: Ppecchì addunca un lu cridistivu? Si pue dicimu, de l ' uomini, ne spagnamu de la turba: ca tutti tenianu Giuvanni ppe prufeta.²⁷E rispunniennu a Gesù, dicieru: Un sapimu. Ed illu le disse: E mancu io ve dicu, ccu chi putire fazzu ste cose.²⁸Cchì vinne pare? N' uominu avia dui figli, e abbicinannuse allu primu, disse: Figliu, vani oje a fatigare alla vigna mia.²⁹Illu rispunniennu, disse: Un me piace. De pue pentutu, jiu.³⁰Abbicinatuse pue all’autru, le disse de lu stiessu muodu. Ma illu rispunniennu, diciu: Vaju, signure, e nun jiu.³¹Chine de sti dui fice la vuluntate de lu patre? Le dicenu: Lu primu. Dice ad illi Gesù: 'Nverità ve dicu, ca li prubbicani e le male fimmine vau primu de vue allu riegnu de lu cielu.³²Ca vinne de vue Giuvanni ppe la via de la giustizia, e un le cridistivu. Li prubbicani pue, e le male. fimmine le cridieru: e vue vidiennu chissu nemmenu ve pentistivu puru ppe cridere ad illu.³³N'autra parabula sentiti: Co'era nu patre de famiglia, chi chiantau na vigna, cce fice na sepe’ntuornu ’ntuornu, cce scavau nu parmientu, cce fravicau na turra, e l'affittau a zierti travagliaturi, e sinne partiu luntanu.³⁴Abbicinannuse pue la staggiune de li frutti, mannau li servituri sue adduve li culoni a se ricogliere li frutti.³⁵E li culoni, chiavatu de manu li servituri, unu lu paliaru, n'autru l'ammazzaru, e l'autru lu lapidiaru.³⁶N'autra vota mannaudi autri servituri cchiù de primu, e chilli ficeru lu stiessu ad illi.³⁷'Nfinarmente cce mannau lu figliu sue, diciennu: Averannu rispiettu ppe lu figliu mio.³⁸Li culoni, vidiennu lu figliu, dissanu tra de illi: Chistu è l'eredu, veniti, l'ammazzamu, e ne pigliamu la reditate.³⁹E acchiappatulu, lu jettaru fore de la vigna, e l'ammazzaru.⁴⁰Quannu dunca vena lu patrune de la vigna, cchì fadi a chilli culoni?⁴¹Dicudi illi: Li mali le manna alla malura: e la vigna sua l'affitta ad autri culoni, chi lu paganu a tiempu pruopiu.⁴²Le dice Gesù: Ud aviti mai liettu alla Scrittura: La petra, chi scartaru li fravicaturi, è divenuta petra de cantunera? Lu Segnure ha fattu chissu, ed è na maraviglia all'uocchi nuostri?⁴³'Mperò ve dicu, ca lu riegnu de Dio ve sarrà levatu, e sarrà dunatu a gente, chi lu sau curtivare.⁴⁴E chine cade supra de sta petra, se sfraggella: e a chine illa cade supra, ne resta scamacciatu.⁴⁵E aviennu ’ntisu li capi de li sacerduoti, e li Farasei le parabule sue, capieru, ca parrava de luoru.⁴⁶E vuliennulu chiavare de manu, se timettanu de le turbe, chi l'avianu ppe prufeta.