Lu Santo Vancieliu secunnu Matteo 5

1 2 3 4 5 6 7 8 9 10 11 12 13 14 15 16 17 18 19 20 21 22 23 24 25 26 27 28

¹GESÙ appena te vidette chilla granne quantitate de gente, ' nchianau supra nu timpariellu, s'assettaudi, e li discipuli sue s'abbicinaru ad illu.²Aperiu la vucca, e dannule 'mparamientu le dicia:³Viati li poveri de spiritu: ppecchi de chisti è lu riegnu de li cieli.⁴Viati li cchiù manzi: ppecchì chisti pussedanu la terra.⁵Viati chilli, chi chiancianu: ppecchì chisti venanu cunsulati.⁶Viati chilli, chi tenanu fame, e sidde de giustizia: ppecchì chisti sunudi abbuttati.⁷Viati li misericuordiusi: ppecchi chisti trovanu misericuordia.⁸Viati chilli, chi tenanu lu core niettu: ppecchi chisti vidanu Dio.⁹Viati li pacifichi: ppecchì sarau chiamati figli de Dio.¹⁰Viati chilli, chi patanu persecuziuoni ppe amure de la giustizia: ppecchì de chisti è lu riegnu de li cieli.¹¹Viati tutti vue, quannu l'uomini ve maledicianu, e ve persiecutanu, e dicianu de vue tantu male ccu menzogne, ppe causa mia:¹²Stative addunca alliegri, e cuntienti, ca la ricumpenza vostra è assai granne alli cieli: ppecchi de sta manera fozanu persecutati li prufieti, chi sù stati primu de vue.¹³Vue siti lu sale de la terra. Ca si lu sale se fa 'nzipidu, 'ccu chi se pò salare cchiui? E nun vale ppe nente, ma sulu allu jettare 'nmienzu la via, e zampatu de li gienti.¹⁴Vue siti la luce de lu munnu. Nun se pò nascunnere na citate fravicata supra nu munte.¹⁵Nnè appiccianu la licerna, e la mintanu sutta nu mienzutumminu, ma supra na lumera, ppe dare lustru a tutti li gienti de la casa.¹⁶Ccussì lampija la luce vostra avanti all'uomini: ppe videre le vostre opere bone, e sinne gruoriare lu Patre vuostru, ch'è alli cieli.¹⁷Nun ve jati cridiennu, ch' io fuossi venutu ppe sciogliere la legge, o li prufieti: nun vinni ppe la sciogliere, ma ppe l'adempiscire.¹⁸Ppecchi mo ve dicu ’nveritate, ca si nun passa lu cielu e la terra, un se riscatta mancu nu pitazzu de la legge, ’nzinca a tantu chi un fuossi tuttu adempisciuta.¹⁹Chine pue trasgrediscissi unu de chisti cumman namienti lu cchiù picciulu, e diessi lu stiessu ’nzegnamientu all'uomini, vena chiamatu quatrariellu allu riegnu de li cieli: ma chillu pue, chi se trova d'avire fattu o ’nzegnatu, chistu sarà tenutu ppe n'uomu granne allu riegnu de li cieli.²⁰Addunca dicu a vue, ca si la giustizia vostra nun è abbunnante cchiù de chilla de li Scribbi e de li Farasei, un cce trasiti allu riegnu de li cieli.²¹Aviti ’ntisu chillu, chi foza dittu all'antichi: Nun ammazzare: ppecchi chine ammazza, è reu 'njudiziu.²²Io muoni dicu a vue: ca chine se 'nzirra cuntra lu frate sue, è reu 'njudiziu. Echine ha dittu allu frate, raca: sarà reu allu cunciliu. E chine l'ha chia matu, pazzu: sarà reu de lu fuocu de lu ’nfiernu.²³Addunca, si tu stai ppe fare l'offertuoriu all'autaru, e llà te vene ’nmente, ca lu frate tue ha ’ncuna cosa cuntra de tie:²⁴Lassa cuomu te truovi l'ufferta supra l'autaru, curre a fare pace ccu fratitta, e torna pue a fare chillu, chi stave faciennu.²⁵Quannu te impatti ppe la via ccu l'avversariu tue, aggiustate priestu: ppecchì scanzi lu periculu de te purtare ’nmanu de lu judice l'avversariu tue, e de lu judice vai ’nmanu allu ministru: e te cunzignanu a nu carciru.²⁶E te dicu 'nveritate, ca de llà nun iesci, si ’mprimu ud hai pagatu tutti li cavalli spari.²⁷Aviti 'ntisu chillu, chi foza dittu all'antichi: Nun faciti adultieriu.²⁸Ma io muoni dicu a vue: ca chine guarda na fimmina ccu malu fine, ha già allu core sue cummissu l'adultieriu ccud illa.²⁹Si 'ncasu l'uocchiu diestru tue te scannalizzadi, cacciatilu, e jettalu chiuca vidi: ppecchì è miegliu ppe tie perdere unu sulu miembru, ca te mintere ccu tuttu lu cuorpu dintra lu ’nfiernu.³⁰E si la manu destra tua te scannalizzadi, tagliala, e jettala luntana de tie: ppecchì, cuomu te dissi, è miegliu ppe tie perdere unu sulu de li miembri tue, ca jire tuttu lu cuorpu dintra lu 'nfiernu.³¹È statu puru dittu, ca chine ne manna la mugliere propia, le diessi lu libiellu de lu ripudiu.³²Ma io muoni dicu a vue: Ca chine ne manna la mugliere propia,’nforchè ppe causa d'adultieriu, la fa diventare de mala cunnutta: e chine se spusa na fimmina de chiste, cummitte adultieriu.³³E nun aviti ’ntisu chillu, chi foza dittu all'antichi: Un canciare mai lu juramientu: ma renne a lu Segnure lu juramientu tue.³⁴Ccussì io dicu a vue, un jati mai jurannu, nne ppe lu cielu, ppecchì è lu truonu de Dio.³⁵Nnè ppe la terra, ppecchì è lu sgabiellu de li piedi sue: nnė ppe Gerusalemme, ppecchì chista è la citate de lu rre: granne³⁶Nnè jurare ppe la capu tua, ppecchi tu nun si patrune de fare jancu, o nivuru nu pilu de li capilli.³⁷Lu parrare vuostru sia sempre, sini, sini: noni, noni: ppecchì lu parrare assai sciurta a mala cosa.³⁸Aviti ’ntisu cchì fo dittu: Uocchiu pped uocchiu, e dente ppe dente.³⁹Ma io muoni dicu a vue, un jati faciennu resistienzia allu malu: anzica si ’ ncunu te ʼmpanica nu schiaffu a na massilla de la facce destra, votace l'autra menzina.⁴⁰E a chillu, chi te vò purtare alla curte, ppe te scippare lu giaccu, dunacce puru lu mantu.⁴¹E si ’ncunu te forza a currere ppe mille passi, va ccud illu pruopiu ppe n'autri duimilia.⁴²Quannu t’ è stata circata na cosa, dunala: e nun vutare facce a chine vò ’mpriestu ’ncunu granu.⁴³Aviti’ntisu chillu, chi fo dittu: Amerai lu pruossimu tue, ed uodierai lu tue nimicu.⁴⁴Ma io ve dicu: Amati li vuostri nimici, faciti bene a chine ve fa male: e pregati ppe chilli, chi ve persiecutanu, e ve calunnianu:⁴⁵Ccussì siti veri figli de lu Patre vuostru, chi sta 'ncielu: lu quale fa escere lu sule sue supra li buoni e supra li mali: e fa chiovere l'acqua supra li giusti e supra li peccaturi.⁴⁶Autrimienti, si amati chilli, chi ve amanu, quale gapparia faciti? nun fau puru d’accussi li prubbicani?⁴⁷E si salutati li suli frati vuostri, quale cosa faciti cchiù de l'autri? nun fau puru lu stiessu li jentili?⁴⁸Addunca siati vue perfietti, cuomu è perfiettu lu Patre vuostru cileste.