Lu Santo Vancieliu secunnu Matteo 12

1 2 3 4 5 6 7 8 9 10 11 12 13 14 15 16 17 18 19 20 21 22 23 24 25 26 27 28

¹'NCHIL patuppe dintra nu simminatu: e li discipuli sue sentiennu fame se miseru a cogliere spiche, e sille manciavanu.²Appena videttanu chistu li Farasei, le dicettanu: Eccute ca li discipuli tue fau chillu, chi un le cummena de fare de jurnu de sapatu.³Ma illu le rispuse: Nun aviti liettu mai chillu, chi fice Davide, quannu stava muriennu de la fame, ccu tutti chilli, chi l'eranu appriessu:⁴Cuomu illu trasiudi alla casa de Dio, se manciau li pani de la propusizione, chi nun era permissu nne ad illu, nnè alli cumpagni sue de manciare, ma sulamente alli sacerduoti?⁵O puru nun lejistiti alla legge, ca li jurni de sapatu li sacerduoti allu tiempiu guastanu lu sapatu, e un fau peccatu?⁶Addunca dicu a vue, ccà criju, ca cce „sta unu cchiù granne de lu tiempiu.⁷Ca si vue sapissiti chillu, chi vò dire: Vuogliu la misericuordia, e nno lu sacrificiu: un jissiti cunnannannu li ’nnuzienti:⁸Ppecchì lu Figliu de l'uomu è patrune puru de lu sapatu.⁹Ed essiennu partutu de lladi, sinne jiudi alla luoru sinicoca.¹⁰Ed eccute n'uomu, chi avia na manu siccata, e l'addimannaru, diciennu: È permissu lu sanare de jurnu de sapatu? ma ppe le fare n'accusa.¹¹Allura le rispuse: Chin’è tra de vue uomini, chi ha na sula piecura, e se 'ncavuna nu jurnu de sapatu dintra nu fuossu, e nun curra ’nzubitu a la cacciare fore?¹²Mò quale differienzia passa de n'uomu ccu na piecura? Addunca è permissu fare bene de jurnu de sapatu.¹³Allura disse a chill' uominu: Stenne sta manu. Ed illu la stise, ed eccutila sanata cuomu l'au tra.¹⁴Ma li Farasei esciuti de chillu luocu, si la cuncertavanu fra de illi, cuomu lu putire cacciare de lu munnu.¹⁵Ma Gesù, chi lu sapiadi, sinné partiudi: e le jierudi appriessu na nquantitate de gente, e le sanaudi a tutti:¹⁶E le arricummannau de nun lu jire diciennu.¹⁷Ppe adempiscere ccussì a quantu era statu dittu de lu prufeta Saia, chi dice:¹⁸Eccute lu serviture mio, chi aju scegliutu, lu mio diliettu, ppe lu quale l'anima mia sinn' è tanta cumpiaciuta. MÒ mintu lu spiritu mio supra de illu, e va trummettiannu la giustizia alle naziuoni.¹⁹Un va faciennu litiche, nné gridate, nné la vuce sua la sienti ’nmienzu le chiazze:²⁰Illu nun rumpa na canna jaccata, e nun smorza mancu lu micciu, chi fumadi, ’nfintantu chi un fa triunfare la giustizia:²¹Ed allu nume sue speranu li gienti.²²Allura li se prisentaudi unu, ch'avia lu diavulu ’ncuorpu, ed era cecatu e mutu, e ’ nzubitu lu sanau, e le vinne la vista, e la parola.²³E tutta chilla gran frattaria de gente restaudi arrimisa, e dicia: Piensuca è chistu lu figliu de Davide?²⁴Ma li Farasei sentiennu chistu, dicettanu: Chissu nun caccia li demuoni ccud autru mienzu, ca ccu Berzabuccu, ch'è lu capu de illi.²⁵Gesù pue, chi sapia tuttu chillu, chi pensavanu dintra la crozza, le disse d'accussì: Uogni riegnu, chi se divida ’ntanti partiti, se distruggia priestu: e ad uogni citate, o famiglia, chi un cc' è unione, ha puocu durata.²⁶Ma si satanassu discacciaudi a satanassu, e si la pigliaudi cuntra de illu stiessu: cuomu mai pò durare lu riegnu sue?²⁷E si io cacciu li demuoni pped opera de Berzabuccu, li figli vuostri pped opera de chine le caccianu? Sunu pue illi stessi chilli, chi ve judicanu.²⁸Ma si io cacciu li demuoni ppe mienzu de lu spiritu de Dio, è cosa chiuca certa, ca lu riegnu de Dio è arrivatu a vue.²⁹Ppecchì cuomu mai ’ncunu pò trasere dintra la casa de nu curaggiusu, ppe l'arrupare le grannizze, chi tenadi, si ’mprimu nun liga stu forte, e le sacchija pue la casa?³⁰Chine nun è ccu mie, è cuntra de mie: e chine nun ricoglie ccu mie, disperdadi.³¹Addunca dicu a vue: Uogni peccatu, ed uogni jastigna vena perdunata all'uomini: ma la jastigna cuntra de lu Spiritu un vena perdunata mai.³²E chine avissi sparratu cuntra lu Figliu de l'uomu, le vena perdunatu: ma chine pue avissi sparratu cuntra de lu Spiritu santu, un vena perdunatu mai nnė a chistu sieculu, nnè all'autru.³³O teniti ppe buonu l'arvule, e lu fruttu de illu è puru buonu: o teniti ppe malu l'arvule, e lu fruttu è puru malu: ppecchỉ de lu fruttu se judica l'arvule.³⁴Razza de vipere, cuomu mai putiti parrare a bene, quannu siti tanti mali? ppecchì chillu, chi senta lu core dice la vucca.³⁵L'uomu buonu de nu buonu trisuoru ne caccia lu bene: e l'uomu malu de nu malu trisuoru ne caccia lu male.³⁶Accussi addunca dicu a vue, ca de uogni parola sciocca, ch' hau dittu l'uomini, ne hau de dare cuntu lu jurnu de lu judiziu.³⁷Ppecchi le parole tue te giustificanu, e le parole tue te cunnannanu.³⁸Allura rispunnieru taluni de li Scribbi e de li Farasei, diciennu: Mastru, vulimu videre de tie 'ncunu meraculu.³⁹Ma illu le rispuse: Chista mala generazione e currutta vò videre de mie nu signu: ed io nullu signu le vuogliu cuncedere, 'nfore de chillu de Jona prufeta.⁴⁰Ppecchì sincuomu Jona stette ppe tri jurni, e tri nuotti dintra lu ventre de na valena, ccussì lu Figliu de l'uomu sta ppe tri jurni, e tri nuotti dintra de la terra.⁴¹L'uomini de Niniva se ribellanu lu jurnu de lu judiziu cuntra de chista nazione, e la cunnannu: ppecchì ficenu penitienzia quannu predicava Jona. Ed eccute mò ccà unu, ch'è cchiù de Jona.⁴²La rigina de lu menzijurnu se scatina lu jurnu de lu judiziu cuntra sta razza d'animali, e le cunnanna: ppecchì vinneru de lu finituoriu de la terra ppe sentere la sapienzia de Salamune, ed eccute ca ccà cce stadi unu cchiù de Salamune.⁴³Quannu lu spirdu malignu è esciutu de n’uominu, sinne vadi ppe li luochi asciutti, circannu ripuosu, e nun lu trovadi.⁴⁴Allura dice: Rituornu alla casa mia, duve signu esciutu. E turnatu la trova vacante, e bella scupata, e addurnata.⁴⁵Allura te va piglia n'autri sette spirdi cchiù pieji de illu, e vau all'abbitare: e lu statu de chill' uominu se fa pieju de primu. D’accussì succede a chista mala razzata.⁴⁶'Ntramente chi illu stava parrannu a chilli gienti, eccute ca la mamma sua, e li frate stavanu de fore, vidiennu de lu putire parrare.⁴⁷E ’ncunu le dicette: Mammata ccu li frati tue sù fore, e te vau circannu.⁴⁸Ma illu rispunniudi a chillu, chi lu parravadi: Chin'è la mamma mia, e chine sù li frati mie?⁴⁹E stisa la manu viersu de li discipuli sue: Chisti, disse, sunu la mamma mia, e li frati, chi tiegnu.⁵⁰Ppecchì tutti chilli, chi fau la vuluntate de Patrimma, ch' è ’ncielu, me sunu frate, suoru, e mamma.