Lu Santo Vancieliu secunnu Matteo 23

1 2 3 4 5 6 7 8 9 10 11 12 13 14 15 16 17 18 19 20 21 22 23 24 25 26 27 28

¹TANNU Gesù parravu alle turbe, ed alli discipuli sue,²Diciennu: Supra la catrida de Musé s'assettaru li Scribbi, e li Farasei.³Tuttu chillu addunca, chi ve dicenu, seguiti e faciti: ma cuom’ illi fannu vue nun faciti: ppecchì dicenu, e nun fau.⁴Ammuzzellanu pisi granni, e chi un se puonnu, e le mintanu supra le spalli de l'uomini: ma pue illi nun le vonnu movere mancu ccu nu jiritu.⁵Tuttu fannu pped esere viduti de l'uomini: Ppecchì portanu cchiù granni le filatterie, e cchiù longhe le france de la veste.⁶Circanu alle cene li primi luochi, e le prime sece alle sinicoche,⁷E li saluti alla chiazza, e l'esere chiamati de la gente mastri.⁸Ma vue ud aviti de vulire esere chiamati mastri. Ca unu edi lu Mastru vuostru, e vue tutti siti frati.⁹E nun chiamati nisciunu ’nterra patre vuostru: ca unu è lu Patre vuostru, chilla, ch'è incielu.¹⁰Nné ve faciti chiamare mastri: ppecchi unu sulu è lu Mastru vuostru, Cristu.¹¹Chine è lu cchiù granne de vue, è lu siervu vuostru.¹²E chine se 'ngrannija, vene umiliatu: e chine se umilia, vena 'ngrannisciutu.¹³Guai pue a vue, Scribbi e Farasei ippuocriti: ppecchi chiuditi lu riegnu de li cieli ’ nfacce all'uomini. Ca vue nun cce trasiti, nné cce lassati trasere chilli, chi cce stau ppe trasere.¹⁴Guai a vue, Scribbi e Farasei ippuocriti: ppecchi ve manciati le case de le viduve, recitannu longhe oraziuoni: ppecchissu siti judicati cchiù severamente.¹⁵Guai a vue, Scribbi e Farasei ippuocriti: ppecchì girati mare e terra ppe fare nu prusellitu: e fattu chi l'aviti, lu renniti figliu de lu ’nfiernu allu duppiu de vue.¹⁶Guai a vue, cunnutturi cecati, chi diciti: Chine. jura ppe lu tiempiu, ud é nente: chine pue jura ppe l'uoru de lu tiempiu, resta obbligatu.¹⁷Ciuoti, e cecati: Ppecchi qual'è cchiui, l'uoru, o lu tiempiu, chi santifica l'uoru?¹⁸E chine jura ppe l'ataru, ud é nente: chine pue jura ppe l'ufferta, ch'è supra de illu, resta obbligatu.¹⁹Cecati: Cchid é cchiui, l'ufferta, o l'ataru, chi la santifica?²⁰Chi addunca jura ppe l'ataru, jura pped illu, e ppe tutte chille cose, chi sunu supra de illu.²¹E chine jura ppe lu tiempiu, jura pped illu, e ppe chine l'abbita.²²E chine jura ppe lu cielu, jura ppe lu truonu de Dio, e ppe chillu, chi sicce seda de supra.²³Guai a vue, Scribbi e Farasei ippuocriti: chi pagati la diecima de la menta, de l'anitu, e de lu cuminu, ed aviti trascuratu lu cchiù essenziale de la legge, la giustizia, la misericuordia, e la fide. Chiste cose se duvianu fare, e chille nun s' avianu de lassare.²⁴Cunnutturi cecati, chi sculati nu muscariellu, e pue ve 'njuciti nu camelu.²⁵Guai a vue, Scribbi e Farasei ippuocriti, ppecchi lavati de fore lu bicchieri e lu piattu: de dintra pue siti chini de rapine, e de munnizze.²⁶Faraseu cecatu, lava primu de dintra lu bicchieri e lu piattu, si vue, chi s'annietti puru de fore.²⁷Guai a vue, Scribbi e Farasei ippuocriti: ca siti simili a sepurture 'njanchiate, chi de fore paranu belle alla gente, ma de intra sù chine de ossa de muorti, e d'uogni spurchizia.²⁸E ccussì vue de fore pariti giusti alla gente: de intra pue siti chini d'ippuocrisia e d'iniquitate.²⁹Guai a vue, Scribbi e Farasei ippuocriti, chi fravicati summurchi alli prufieti, e addurnati li muonumienti de li giusti,³⁰E diciti: Si fuossimu stati a li jurni de li patri nuostri, nun sariamu stati suoci luoru allu scannamientu de li prufieti.³¹Deccussì vue stiessi faciti testimuoniu cuntra de vue, ca siti figli de chilli, chi accidieru li prufieti.³²E vue inchiti la misura de li patri vuostri.³³Serpienti, razza de vipere, ’nchi muodu fujiti de la cunnanna de lu ’nfiernu?³⁴Pperò eccu ca io ve mannu li prufieti, li savii, e li scribbi, e de chisti n ' ammazzati, le crucifiggiti, e ne fraggellati dintra le sinicoche vostre, e le persecutati de citate a citate:³⁵Unne vegna supra de vue tuttu lu sangu giustu sparsu supra de la terra, ’ncignannu de lu sangu d'Abele lu giustu ’nzinca allu sangu de Zaccaria figliu de Barachia, chi vue ammazzastiti tra lu tiempiu e l'ataru.³⁶Nverità ve dicu, ca tuttu chistu avvene supra de chista generazione.³⁷Gerusalemme, Gerusalemme, chi ammazzi li prufieti, e lapidiji chilli, chi sù mannati a tie, quantu vote aju vulutu cungregare li figli tue, cuomu la gallina se minta sutta l'ali li pullicini, e tu nun hai vulutu?³⁸Eccu ca la casa vostra resta diserta.³⁹Ppecchi ve dicu, un me viditi cchiù, ' nfinca nun diciti: Benedittu chillu, chi vena a nume de lu Segnure.