Lu Santo Vancieliu secunnu Matteo 8

1 2 3 4 5 6 7 8 9 10 11 12 13 14 15 16 17 18 19 20 21 22 23 24 25 26 27 28

¹ED appena chi fozescisu de la munte, le jiudi appriessu na frattaria de gente:²Ed eccute ca nu lebbrusu li se abbicinaudi, e adurannulu, le dicia: Segnure, si tu vue, me pue cacciare sta lebbra.³E Gesù stennette la manu, lu tuccau, e disse: Lu vuogliu, si munnatu. E’nzubitu la lebbra sinne vulaudi.⁴E Gesù le dicette: Guardate, si lu pue jire diciennu: ma fatte videre sultantu de lu sacerduotu, ed offrele lu dunu cummanatu de Musé, ppe testimuonianzia de illi.⁵E trasutu chi foze a Cafarnau, jiu a lu truvare, ed a sicce arricummannare nu Centuriune,⁶Diciennu: Segnure, lu serviture mio sta jettatu a nu liettu de la casa malatu ccu la paralisa, e fa gridate de malanova⁷E Gesù le rispunniu: Io viegnu, e ti lu sanu.⁸Ma lu Centuriune rispunnienu, dicette: Segnure, io nun signu dignu, chi tuni trasisse alla casa mia: ma dice surtantu na parola, ca lu serviture mio sana ’nzubitu.⁹Ppecchì io signu n'uomu subuordinatu all'autri, ed aju sutta de mie zierti surdati, e dicu ad unu: Va, ed illu va: ed all'autru: Vieni, ed illu vene: ed allu serviture mio: Fa la tale cosa: ed illu la fadi.¹⁰Gesù sentute ste parole ne restau maravigliatu, e disse a chilli, chi le jianu appriessu: Ve dicu ’nveritate, ca na fide ccussì granne un l'aju truvata ad Isdraiellu.¹¹Ed io ve dicu, ca ne venanu 'nquantitate de l'uriente, e de l'uccidente, e s'assettanu ccud Abbramu, ccu Isaccu, e ccu Giacuobbu allu riegnu de li cieli:¹²Ma li figli de lu riegnu venanu jettati alle tenebri esteriuri, duve se chiance, e s'ammolanu li dienti.¹³Allura disse Gesù allu Centuriune: Vatinne, ca cunforma hai circatu, t' è statu datu. E ’nchilla stessa ura sanau lu serviture.¹⁴Ed essiennu Gesù trasutu alla casa de Pietru, vidette la socra de illu curcata cculla freve:¹⁵E quantu amalepene le tuccau la manu, la freve passaudi, e levatase, se mise alle servere.¹⁶Venuta pue la sira, li se prisentaru na nquantitate de spirdati: e ccu zerte parole, chi dicia, li spirdi abbissavanu: e sanau tutti li malati:¹⁷Ppe ccussi venire adempisciutu chillu, chi foza dittu de lu prufeta Saia, lu quale dice: Illu s'ha pigliatu le ’ nfiermitati nostre: e sinne ha purtatu li malanni nuostri.¹⁸Vidiennu pue Gesù na nquantitate de gente, chi le stavadi attuornu, uordinau de passare all’autra banna.¹⁹Ed abbicinatuse nu scribba, le dicette: Summà, io te viegnu d'appriessu ad uogni pizzu, chi vai.²⁰E Gesù le disse: Le vurpi hau le luoru tane, e l'aggielli de lu cielu hau li nidi: ma lu Figliu de l'uomu nun ha duve s'arripare ccu la capu.²¹N'autru de li discipuli sue le dicette: Segnure, duname primu lu permissu de jire a cuorvicare a patrimma.²²Ma Gesù le rispuse: Vienime appriessu, e lassa, chi li muorti se uorvicassiru tra de illi.²³Ed essiennu 'nchianatu supra la varca, le ficeru cumpagnia li discipuli sue.²⁴Ma eccu ca se mosse na granne timpestata de mare, tantu chi le unne cummegliavanu la varca: ma illu durmiadi.²⁵Curseru ’nzubitu duve illu li discipuli sue, e lu risbigliarudi, diciennu: Segnure, sarvacce, ca sinnò ne perdimu.²⁶E Gesù le dicette: Vue ppecchi ve spagnati, o uomini de puocu fide fide? Allura se susiudi, cummannau alli vienti ed allu mare, e vidisti na carmaria perfetta.²⁷Tutta chilla gente ne restaudi arrimisa, e dicianu: Chin'è chistu, chi lu mare e li vienti l'ubbidiscianu?²⁸Ed essiennu illu sbarcatu de chilla banna lu lacu allu paise de li Geraseni, le jieru allu ’ncuntru dui, chi tenianu lu diavulu ’ncuorpu, e chi escianu de le sepurture, ed eranu tanti furiusi, chi nullu putia passare ppe chilla via.²⁹E ’ nzubitu se miseru a gridare, diciennu: Cchì accunti avimu nue ccu tie, o Gesù figliu de Dio? Si venutu mò primu de lu tiempu a cce 'nquetare?³⁰E puocu luntanu de illi cc'era na murra de puorci, chi pascianu.³¹Li demuoni 'ntantu lu pregavanu, diciennu: Si cce vue cacciare de ccà, mannacce armenu duve sta murra de puorci.³²Ed illu le rispuse: Jati. E chilli essiennu esciuti, trasieru dintra li puorci, e ’nzubitu tutta la murra se jettau a precipiziu dintra mare: e s'affucau all'acqua.³³Li purcari se miseru a fujere: e juti alla citate, cuntaru tuttu chillu, chi l'era trammenutu, e puru de chilli, chi avianu lu diavulu ’ncuorpu.³⁴Ed eccu ca tutta la citate curse ad affruntare a Gesù: e appena lu videttanu, lu pregaru de sinne jire de li cunfini luoru.