Lu Santo Vancieliu secunnu Matteo 27

1 2 3 4 5 6 7 8 9 10 11 12 13 14 15 16 17 18 19 20 21 22 23 24 25 26 27 28

¹FATTU pue jurnu, tinneru cunsurtu li capi de li sacerduoti, e li seniuri de lu puopulu cuntra de Gesù, ppe lu mannare a morte.²E ligatu ti lu purtaru e cunzignaru a lu prieside Ponziu Pilatu.³Tannu Juda, chi l'avia tradutu, vidiennu, ca lu cunnannavanu; pentutu, restituivu li trenta dinari alli capi de li sacerduoti, ed alli seniuri,⁴Diciennu: Aju peccatu, tradiennu n'uomu giustu. Ma chilli dissera: Cchi ne importadi? ti la vidi tuni.⁵E jettati li dinari allu tiempiu, sinne jiu: e se jiu a ʼmpicare a nu lazzu.⁶Li capi de li sacerduoti pue, pigliatise li dinari, disseru: Ud è licitu de le mintere allu trisuoru: sunu priezzu de sangu.⁷E fattu cunsurtu, ne cumpraru nu campu de nu pignataru, ppe cce orvicare li furestieri.⁸Ppecchissu chillu campu se chiama Acciedima, ciuè, campu de sangu, ’nzinca allu jurnu d'oje.⁹Allura s'adempiu chillu, chi disse Jeremia prufeta, diciennu: E se pigliaru trenta dinari d'argientu, priezzu de chill' uomu, chi cumpraru de li figli d'Isdraiellu:¹⁰E l'appricarudi a nu campu de pignataru, cuomu m'uordinau lu Segnure.¹¹Gesù pue foze prisentatu a lu prieside, e lu’nterrugau lu prieside, diciennu: Sini tu lu Rre de li Judei? Le dice Gesù: Tu lu dici.¹²Ed accusatu de li capi de li sacerduoti, e seniuri, un rispunne.¹³Allura le dice Pilatu: Un sienti quantu capi d'accusa te dunanu?¹⁴E un le rispunne ppe nente, de muodu chi lu prieside sinne maravigliadi assai.¹⁵’Nchilla sulennitate lu prieside sulia liberare nu carciratu, a voglia luoru.¹⁶Avia tannu carciratu nu famusu latru, chiamatu Barabba.¹⁷Cungregati addunca tutti chilli, disse Pilatu: Chine vuliti, ch ' io ve liberi? Barabba, o Gesù, dittu lu Cristu?¹⁸Ca sapiad 'illu, ca ppe 'mmidia l'avianu tradutu.¹⁹E sediennu ’ntribunale, le mannaudi a dire la mugliere: Nun vulire avire cchi fare ccu chill’uomu giustu, ca multu aju patutu oje ’nsuonnu pped illu.²⁰Li capi de li sacerduoti 'ntantu, e li seniuri persuaseru allu puopulu de dummannare Barabba, e fare murire Gesù.²¹E ripigliannu la parola lu prieside, le diciudi: Chine vuliti de sti dui, chi ve liberassi? Ma chilli disseru: Barabba.²²Le dice Pilatu: Cchi minne fazzu io addunca de Gesù, chiamatu Cristu?²³Dicenu tutti: Sia crucifissu. Diciu ad illi lu prieside: Ca cchì male ha fattu? Ma illi gridavanu cchiù forte diciennu: Sia crucifissu.²⁴Vidiennu pue Pilatu, ca un facia prufittu, e lu tumultu cchiù criscia: pigliau certa acqua, e sinne lavau le manu ’mprisienzia de lu puopulu, diciennu: Io signu ’ nnuzente de lu sangu de st' uomu giustu: viditivila vue.²⁵E rispunniennu tuttu l'univiersu puopuln, diciudi: Lu sangu sue supra de nue, e supra de li figli nuostri.²⁶Allura le liberau Barabba: e pue le cunzignau Gesù fraggellatu ppe lu crucifiggere.²⁷Allura li surdati de lu prieside, purtatu Gesù allu pretuoriu, cungregaru ’ntuornu ad illu tutte le squatre:²⁸E spugliannulu, lu vestieru de na veste russa,²⁹E’ntrizzata na curuna de spine, cci la 'mpizzaru 'ncapu, e le miseru na canna alla manu destra. E gninncchiati avanti ad illu, lu ’njerfiavanu, diciennu: Dio te sarvi, rre de li Judei.³⁰E sputannulu, pigliaru na canna, e ni lu vattianu ’ncapu.³¹E duoppu sta berlina, le cacciaru la clamida, e lu vestieru ccu le vestiture sue, e lu purtaru a crucifiggere.³²All’escere ’ncuntraru nu Cirineu de nume Simune: e lu furzaru a purtare la cruce de chillu.³³E vinneru a nu luocu, chi se chiamava Guolguta, chi vò dire luocu de le Crozze.³⁴E le dezeru a vivere vinu mischiatu ccu fele: e cuomu l'appe assaggiatu, un ne voze vivere.³⁵Duoppu chi l'avetteru crucifissu, sinne spartieru le vestiture, e le miseru alli zanzari: acciò s'adempissi chillu, chi fo dittu de lu prufeta diciennu: Se haudi spartute le vestiture mie, e supra la vesta mia sicce jettaru la sorte.³⁶E sediennu lu guardavanu.³⁷E le miseru ’nfrunte nu cartiellu ccu lu delittu sue: Chistu è Gesù rre de li Judei.³⁸Tannu fozeru crucifissi 'nzeme ad illu dui latruni: unu a destra, e l'autru a manca.³⁹E chilli, chi passavanu, lu jestimavanu gruolluliannu la capu,⁴⁰E diciennu: Ohi tu, chi sciuolli lu tiempiu de Dio, e ’ntri jurni lu fravichi dapere: sarva te stiessu: si figliu de Dio sini, scinne de la cruce.⁴¹De lu stiessu muodu li capi de li sacerduoti sberfiannuse de illu ccu li Scribbi, e seniuri, dicianu:⁴²Ha sarvatu all’autri, e mò nun se pò sarvare illu: si è rre d'Isdraiellu, scinnissi muoni de la cruce, e nue lu cridimu.⁴³Ha cunfidatu a Dio: lu liberassi muoni, si le vò bene: ppecchì ha dittu: Signu figliu de Dio.⁴⁴Chissu stiessu pue le rimpruveravanu li latruni, ch'eranu crucifissi ’nzeme ad illu.⁴⁵De l'ura sesta ’nzinca all'ura nona la terra tutta se cuperiu de neglie.⁴⁶E versu l'ura nona Gesù sclamaudi forte, diciennu: Eli, Eli, lamma sabacthani? chi vò dire: Dio inio, Dio mio, pecchì m'abbannunasti?⁴⁷Ma zierti, chi stavanu lladi, e sentianu, dicianu: Illu chiama ad Alia.⁴⁸E llà ppe llà curriennu unu de illi pigliau na sponsa, e la ’nzuppau d'acitu, e la mise a na canna, e cci la dava a vivere.⁴⁹L'autri pue dicianu: Lassa, ca mò vidimu, si vena Alia a lu liberare.⁵⁰Ma Gesù n'autra vota sclamannu fortemente, spirau.⁵¹Ed eccu lu velu de lu tiempiu se strazzau a due parti de supra ’nzutta, la terra tremau, e le petre se spaccaru;⁵²E le sepurture s'aperieru: e multi cuorpi de santi, chi durmianu, se risuscitaru.⁵³Ed esciennu de le sepurture duoppu la risurrezzione d'illu, vinneru alla santa citate, e cumparieru a multe persune.⁵⁴Lu Centuriune pue, e chilli, ch'eranu ccud illu a guardare Gesù, vistu lu terrimutu e chillu, chi succedia, se spagnaru fortemente, diciennu: Ppe lu vieru Figliu de Dio era chistu.⁵⁵Cc'eranu puru multe donne de luntanu, chi avianu seguutu Gesù de la Galilea, serviennulu:⁵⁶Tra chisse cc'era Maria Matalena, e Maria mamma de Giacumu, e Giuseppe, e la mamma de li figli de Zibideu.⁵⁷E fatta chi foze la sira, vinne nu riccu de Arimatea, ppe nume Giuseppe, chi era puru illu discipulu de Gesù.⁵⁸Chistu jiu a truvare Pilatu, e circau lu cuorpu de Gesù. Tannu Pilatu cummannau, chi se restituissi lu cuorpu.⁵⁹E Giuseppe, pigliatuse lu cuorpu, lu 'mmuolicau a nu lenzulu jancu.⁶⁰E lu mintiu a na sepurtura sua nova, ch'avia scavatu dintra le petre. E arruozzulau na granne petra supra la chiatra de la sepurtura, e sinne jiu.⁶¹Cc'eranu Maria Matalena, e l'autra Maria, assettate faccifrunte la sepurtura.⁶²L'autru jurnu, ch'è duoppu la Parasceva, s'adu naru li capi de li sacerduoti, e li Farasei duve Pilatu,⁶³Diciennu: Signure, ne simu ricordati, ca chillu ’ngannature diciu, quannu era vivu: Duoppu tri jurni risuscitu.⁶⁴Uordina dunca, chi se custudissi la sepurtura ' nfinca allu tierzu jurnu: un viegninu li discipuli, e si l'arrupinu, e pue dicissinu a lu puopulu: È risuscitatu de li muorti: e l'urtimu arrure è pieju de la primu.⁶⁵Le diciu Pilatu: Aviti le guardie, jati, custuditi, cuomu miegliu sapiti.⁶⁶E chilli jiennusinne, rinfurzaru le guardie a la sepurtura, e miseru lu signale alla lapida.