Lu Santo Vancieliu secunnu Matteo 2

1 2 3 4 5 6 7 8 9 10 11 12 13 14 15 16 17 18 19 20 21 22 23 24 25 26 27 28

¹ESSISSIENNU addunca natu Gesù a Bettalemme de Juda, ’ntiempu de lurre Rode, 'nzubitu te schioppanu li Maggi de l'uriente a Gerusalemme,²Diciennu: Adduv è lu natu rre de li Judei? ppecchì avimu vistu la stilla sua all'uriente, e simu venuti ppe l'adurare.³Appena ’ntise ste cose lu rre Rode, se cuntrubaudi, e coud'illu tutta la Gerusalemme.⁴Pue cunvucati tutti li principi de li sacerduoti, ditturi de lu puopulu, addimmannau ad illi, duve fuossi ppe nascere lu Cristu.⁵E chisti le rispusanu: A Bettalemme de Juda: ppecchì accussì avia lassatu scrittu lu prufeta:⁶Addunca tu Bettalemme, terra de Juda, nun si la pittirilla tra li capi de Juda: quannu esce de tie lu capitanu, chi riegula lu puopulu mio d'Isdraiellu.⁷Allura Rode, chiamatuse 'nzecrietu li Maggi, se ’nfurmau accuttu accuttu de illi, ’nquale tiempu foze, chi le cumpariu la stilla:⁸E mannannule a Bettalemme, le dicette: Jati, e faciti na ricirca all'affinu de stu quatrariellu: e quannu l'aviti truvatu, mi lu faciti assapire, ca lu vuogliu jire puru io all'adurare.⁹Chisti, appena ’ntise le parole de lu rre, sinne partieru. Ed eccute ca la stilla, ch'avianu vistu all'uriente, sinne jiadi avanti avanti de illi, ’nzinca a tantu chi arrivata supra lu luocu, duve stava lu bumminu, llà se fermaudi.¹⁰Vistu ch' appanu la stilla, li se inchiudi lu core d'allegrizza.¹¹E trasuti alla casa, truvaru lu bumminu ccu Maria la mamma, e sicce gninucchiarudi, e l'adurarudi: pue apiertu lu trisuoru, chi tenianu, le uffrieru li duni, uoru, 'ncienzu, e mirra.¹²Ed essiennu stati avvertuti 'nsuonnu de nun turnare a passare de duve Rode, pensaru de sinne jire ppe n'autra via allu paise luoru.¹³Partuti chi fozanu illi, l'anciulu de lu Segnure jiudi ’nsuonnu a Giuseppe, e le dicette: Levate, pigliate lu bumminu ccu la mamma, e fujatinne all'Eggittu, e un te stare a movere de llà, si 'mprimu nun te vena l'avvisu mio. Ppecchi Rode va pigliannu cuntu de la quatrariellu ppe lu fare murire.¹⁴Ed illu, appena risbigliatu, se pigliau lu piccirillu, e la mamma, e ccu lu gruoffu de la notte sinne scappaudi all’Eggittu.¹⁵Duve se tartinne ppe ’nzinca a quannu muriudi Rode: e ccussì foze adempisciutu quantu avia dittu lu Segnure ppe vucca de lu prufeta, chi dicia: De l’Eggittu m'aju chiamatu a figliuma.¹⁶Allura Rode vidiennuse chiacchiariatu de li Maggi, se ’nzirraudi forte, e mannau ad ammazzare tutti li quatrarielli, chi eranu a Bettalemme, e ppe tutti chilli cuntuorni, chi tenianu l'etate de dui anni 'nsutta, a secunna delu tiempu, ch ' aviadi appuratu deli Maggi.¹⁷E foze ccussi adempisciutu quantu avia pregnuosticatu lu prufeta Jeremia, chi dice:¹⁸Na vuce s' è ’ntisa a Rama, e chianti e strilli ’nquantitate: Rachela chiance li figli sue, nné vò sentere cunsulamienti, pecchi nun cce sú cchiui.¹⁹Muortu Rode, eccu ca l'anciulu de lu Segnure apparisciudi ’nsuonnu a Giuseppe all’Eggittu,²⁰E le dicette: Risbigliate, piglia lu quatrariellu, e la mamma de illu, e vatinne alla terra d'Isdraiellu: ppecchì sù muorti chilli, chi jianu circannu d'ammazzare lu piccirillu.²¹’Nzubitu se risbigliaudi, pigliau lu bumminu, e la mamma, e sinne jiudi alla terra d'Isdraiellu.²²Ma aviennu ’ntisu, ca regnavadi Archilau ’nvece de lu patre Rode, se spagnau de cce jire: ed essiennune avvertutu 'nsuonnu, se ritiraudi ’nGalilea,²³Duve arrivatu abbitaudi alla citate chiamata Nazaret: e vinne d'accussì adempisciutu quantu avia dittu lu prufeta: Illu sarrà chiamatu Nazarenu.