Lu Santo Vancieliu secunnu Matteo 11

1 2 3 4 5 6 7 8 9 10 11 12 13 14 15 16 17 18 19 20 21 22 23 24 25 26 27 28

¹ED Daviennu Gesù frunutu de dare tutti sti ’nzegnamienti alli sue dudici discipuli, partiu de chillu luocu ppe jire a inzegnare, e predicare alle luoru citati.²Ma aviennu Giuvanni ’ntisu dintra lu carciru ste belle cose, chi faciadi Gesù Cristu, spedisciu dui de li discipuli sue³Alle dire: Tu si chillu, chi hai de venire, o puru avimu ancore de aspettare?⁴E Gesù rispuse a chilli: Jati, e cuntati a Giuvanni chillu, chi aviti ’ntisu, ed aviti vistu.⁵Li cecati vidanu, li zuoppi caminanu, li lebbrusi sù munnati, li surdi sentanu, li muorti riviscianu, ed alli poverielli li se annunzia lu vancieliu:⁶Ed è viatu chillu, chi supra de mie nun piglia mutivu de scannalu.⁷Quannu pue chilli fozanu partuti, ’ncignau Gesù a parrare de Giuvanni alle turbe: Cchi cosa siti vue juti a videre allu desiertu? na canna sbattuta de lu vientu?⁸Mapuru, cchì siti juti a videre? n'uomu vestutu pulitu? Tutti chilli, chi vestanu ccussì puliti, stau alli palazzi de li rre.⁹Ma via, cchì jistiti a videre? nu prufeta? E puru dicu a vue, ch'è cchiù de nu prufeta.¹⁰Ppecchi chistu è chillu, de lu quale sta scrittu: Eccu ca io spedisciu avanzi a tie l'anciulu mio, chi te pripara avanzi la via.¹¹’Nveritate ve dicu, ca tra li nati de na fimmina un cc'è allu munnu n'autru, chi appattassi a Giuvanni Battista: ma puru lu cchiù minure, ch'è allu riegnu de li cieli, è maggiure de illu.¹²Ma de lu tiempu de Giuvanni Battista ’nzinca a muoni, lu riegnu de li cieli se precura ccu la forza, e li cchiù fuorti lu rapiscianu.¹³Ppecchì tutti li prufieti, e la legge hau prufetizzatu 'nzinca a Giuvanni:¹⁴E si la vuliti capire, illu è chillu Alia, chi duvia venire.¹⁵Chine ha ricchie ppe sentere, chi sienti.¹⁶Un sacciu pruopiu a chine rassimigliare chista razza de gente? Illa rassimiglia a chilli quatrarielli, chi staudi assettati a ste chiazze: ch'a botte de gridate chiamanu li cumpagni luoru,¹⁷E dicenu: Avimu sunatu, e vue nun aviti ballatu: avimu cantatu canzune piatuse, e vue nun aviti chianciutu.¹⁸Ppecchi è venutu Giuvanni, chi nun manciava, nné vivia, e dicenu: Tena lu diavulu.¹⁹È venutu lu Figliu de l'uomu, chi manciadi, e vivadi, e dicenu: Eccute nu manciature, e nu viviture, amicu de li prubbicani e de li peccaturi. Ed è giustificata la sapienzia de li figli sue.²⁰Allura illu ’ncignaudi a fare na rimproverata alle citati, duve cce aviadi fattu tanti meraculi, chi nun avissinu fattu penitienzia.²¹Guai a tie, o Corozain, guai a tie, o Betsaida: ppecchi, si a Tiru, e a Sidune fuossinu stati fatti li stiessi meraculi, chi sù stati fatti a vue, oh de quantu tiempu avissinu fattu penitienzia alla cinnera e allu ciliziu !²²Ppecchissu io mò ve dicu: Tiru, e Sidune hau d'esere trattati ccu cchiù ducizza de vue lu jurnu de la judiziu.²³E tu, Cafarnau, te cridi, ca te auzi 'nzinca lu cielu? tu hai de scinnere dintra lu ’nfiernu: ppecchi, si a Suoduma fuossinu stati fatti li meraculi, chi sù stati fatti a tie, Suoduma piensuca ancore cce fuossidi.²⁴E ve dicu la veritate, ca la terra de Suoduma vena trattata ccu mienu rigure de tie lu jurnu de lu judiziu.²⁵'Nchillu stante Gesù ’ncignaudi a dire: Io te ringraziu, o Patre, Segnure de lu cielu e de la terra, ppecchì hai tenutu celate tutte ste cose alli saccienti, ed alli prudienti, e le rivelasti alli piccirilli.²⁶Ma coussi è, o Patre: ppecchi deccussì t'ha piaciutu.²⁷Tutte quante le cose a mie me sù state date de Patrimma. E a lu Figliu nullu canusce ’nfore de lu Patre: e nullu canusce a lu Patre ’nfore de lu Figliu, e de chillu, a chi lu Figliu lu ha vulutu svelare.²⁸Veniti ccu mie tutti chilli, chi stati travagliati, e malicuntienti, ca io ve ristuoru.²⁹Pigliati lu juvu mio supra de vue, e 'mparati supra de mie, chi signu nu paciune e de core tenneru: e truvati ripuosu all'anime vostre.³⁰Ppe quantu è benignu lu juvu mio, autrutantu è lieciu lu pisu.