Lu Santo Vancieliu secunnu Matteo 17

1 2 3 4 5 6 7 8 9 10 11 12 13 14 15 16 17 18 19 20 21 22 23 24 25 26 27 28

¹E DUOPPU sie jurni Gesù pigliause Pietru, e Jacupu, e Giuvanni frate de chissu, e le purtaudi supra n'autu munte unu sinnunu:²E se canciaudi alla prisenza luoru. La facce sua se fice lucente cuomu lu sule, e le vestiture janche cuomu la nive.³Ed eccu ca le cumparieru Musè ed Alia discurriennu ccud illu.⁴E Pietru parrannu a Gesù, le diciu: Segnure, è buonu, ca simu cca: si vue, facimu ccà tri tabernaculi, unu ppe tie, n'autru ppe Musè, e n'autru pped Alia.⁵Mentreca parrava ancora, eccu ca na nuve lucente le adumbraudi. Ed eccu na vuce de dintra la nuve, diciennu: Chistu è lu Figliu mio diliettu, e minne cumpiaciu: sentitilu.⁶E li discipuli, sentutu chissu, cadieru faccinterra, e se spagnarudi assai assai.⁷E Gesù s'accustaudi ad illi, le tuccau, e disse: Levative, e un ve spagnati.⁸Ed illi azannu l'uocchi, nun vidieru a null’autru ch' a lu sulu Gesù.⁹Pue mentreca scinnianu de lu munte, Gesù le deze chistu cummannu, diciennu: Nun la diciti a nullu chista visione, finca lu Figliu de l'uomu nun risuscita de li muorti.¹⁰E li discipuli l'addimmannaru, diciennu: Cuomu va dunca, ca li Scribbi dicu, ca primu ha de venire Alia?¹¹E Gesù rispunniennu, le diciu: Veramente Alia ha de venire primu a cunzare tutte le cose.¹²Ma io ve dicu, ca Alia è venutu già, ed illi un l'hau canusciutu, anzica hau fattu ccud illu tuttu, chi hau vulutu: e d'accussi puru pata lu Figliu de l'uomu.¹³Allura li discipuli capiscieru, ca illu avia ’ntisu parrare de Giuvanni Battista.¹⁴E quannu fozedi juntu alla turbaglia, li s'accustau n'uomu 'ngninucchiannuse davanti ad illu, e diciennu: Segnure, aje pietate de figliuma, ch'è lunaticu, e traje forte: ca spissu me cade dintra lu fuocu, e mò dintra l'acqua:¹⁵E lu prisentai a li discipuli tue, ed illi nun lu putieru sanare.¹⁶E Gesù rispunniennu, disse: Ah generazione miscridente e scelerata ! ’nfina a quannu me tocca de stare ccu vue? ' nzinca a quannu ve puozzu cumpurtare? Purtatimilu ccà.¹⁷E Gesù cancariaudi lu demuoniu, ed illu sinne scappau, e de tannu lu piccirillu sanaudi.¹⁸Allura li discipuli s'accustaru a Gesù ’ndisparte de l'autra gente, e le dissanu: Ppecchì nue un lu putimme cacciare?¹⁹E le diciu Gesù: Ppe la incredulitate vostra. Ca io ve dicu ’nverità, ca si aviti fide, quantu n'aciniellu de sinaglia, e vue diciti a stu munte: Fatte llà, ed illu se farrà lladi, e nente ve sarradi 'mpussibule.²⁰Chista spezie de demuoni un fuje autrimienti ch'a botte de preghierie, e de dijuni.²¹Mentreca illi cunversavanu 'n Galilea, Gesù le diciudi: Illu succede, ca lu Figliu de l'uomu vena datu ’ nmanu de l'uomini:²²E chissi l'ammazzanu; ma illu lu tierzu jurnu risurje. E chilli sinne attuossicanu.²³E quannu fozanu venuti a Cafarnau, chilli, chi ricuglianu le due dramme se prisentaru a Pietru, e dissanu: Lu Mastru vuostru un pagad'illu le due dramme?²⁴Ed illu rispunniudi: Si. E cuomu stava pped intrare 'ncasa, Gesù lu previnne, e le diciudi: Cchi tinne para, Simu? De chine siggianu li tributi e le gabelle li rre de la terra? de li figli luoru, o de li furestieri?²⁵Pietru le disse: De li furestieri. Gesù le rispuse: Addunca li figli sù franchi.²⁶Ma ppe nun le scannalizzare, vavatinne a mare, e jetta l'amu: e chillu pisciu, chi primu vena ʼngalla, afferralu, ed aperecce la vucca, ca cce truovi nu statere: piglialu, e dunaccelu ppe tie, e ppe mie.