Lu Santo Vancieliu secunnu Matteo 18

1 2 3 4 5 6 7 8 9 10 11 12 13 14 15 16 17 18 19 20 21 22 23 24 25 26 27 28

¹ACHILL'ura s'abbicinaru li discipuli a Gesù, diciennu: Chine fai cchiù granne allu riegnu de li cieli?²E chiamannu Gesù nu piccirillu, ti lu situaudi ’nmienzu ad illi,³E dissadi: Nveritate ve dicu, ca si un ve cummertiti, e un ve faciti cuomu a stu piccirillu, nun trasiti allu riegnu de li cieli.⁴Chine addunca s’umilia cuomu a stu piccirillu, chistu è lu cchiù granne allu riegnu de li cieli.⁵E chi se piglia nu piccirillu cuomu a chistu a nume mio, se pigliadi a mie.⁶Chine pue scannalizzadi unu de sti piccirilli, chi cridanu a mie, miegliu pped illu, chi se ʼmpennissi ’ncanna na mola de trappitu, e s'annegassi allu funnu de lu mare.⁷Guai allu munnu ppe li scannali! Ca è nicessariu, mo avviegninu li scannali: ma guai a chill'uomu, chi fa succedere lu scannalu.⁸Si la manu tua, o lu pede tue te scannalizzadi: taglialu, e jettalu: è buonu ppe tie, mo trasi alla vita debule, o ciunca, ca aviennu due manu, o dui piedi, ed esere jettatu allu fuocu etiernu.⁹E si l'uocchiu tue te scannalizzadi, cacciatilu, e jettalu luntanu de tie: è buonu ppe tie ccu n'uocchiu sulu trasere alla vita, anzica aviennu dui uocchi esere jettatu allu fuocu de lu ’nfiernu.¹⁰Viditi de nun smerfiare unu de sti quatrarielli: ca io ve dicu, ca l'anciuli luoru ’ncielu vidanu sempre la facce de lu Patre mio, ch'è ’ncielu.¹¹Ppecchì lu Figliu de l'uomu vinnadi a sarvare chillu, chi era perutu.¹²Cchi vinne pare? si unu avissi cientu piecure, ed una sinne sperdissi: un lassa le nuvantanove ppe li munti, e va circannu chilla, chi s'è spersa?¹³E si ppe sciorta la trova: ve dicu ’nveritate, ca se preja cchiù de chistuna, ca de le nuvantanove, chi nud eranu sperse.¹⁴Deccussì nun vò lu Patre vuostru, ch'è 'ncielu, chi perissi unu de sti piccirilli.¹⁵Si mai fratitta tavissi mancatu, vani, e currieggilu tra de tie, ed illu sulu. Si te sente, l'hai guadagnatu a fratitta.¹⁶Si pue nun te sente, porta ccu tie unu, o dui persuni, acciò chi ccu la testimuonianzia de dui, o tridi tuttu s ' aggiustassi.¹⁷Si nun te sente, dicelu a la ghiesia. Si pue nun sente la ghiesia, tienilu cuomu nu jentile, e prubbicanu.¹⁸'Nverità ve dicu, tuttu chillu, chi ligati ’nterra, eni puru ligatu ’ncielu: e tuttu chillu, chi sciugliti ’nterra, eni puru sciuotu ’ncielu.¹⁹N'autra vota ve dicu, ca si dui de vue s'accordanu ’nterra a dummannare na cosa qualunque, lu Patre mio, ch'è 'ncielu vi la cuncede.²⁰Ca duve sunu dui, o tridi cungregati a nume mio, llà signu io ’nmienzu ad illi.²¹Allura accustannuse Pietru ad illu, diciu: Segnure, quantu vote pecca fratimma cuntra de mie, ed io lu perdugnu? ’nfinca a sette?²²E Gesù le dicedi: Nun te dicu 'nfinca a sette: ma 'nfinca a settanta vote sette.²³'Mperò lu riegnu de li cieli s'assimiglia a nu rre, chi voze fare li cunti ccu li servituri sue.²⁴Ed aviennu ’ncignatu a fare li cunti, li se prisentaudi unu, chi le duviadi dece milia talienti.²⁵E nud aviennu cuomu ccille rendere, lu patrune cummannau, chi fuossinu vinnuti illu, la mugliere, li figli, e tuttu chillu, chi aviadi, mo se pagassi.²⁶'Ngninucchiatu chillu siervu, lu pregava diciennu: Aje pacienzia, aspettame, e te riennu tuttu.²⁷Muossu a cumpassione lu patrune de chillu siervu, lu lassau jire, e le lassau lu diebitu.²⁸Esciutu pue chillu siervu truvau n'autru serviture, chi le duviadi cientu dinari: e teniennulu ppe ca pizzana l'affucava, diciennu: Renneme chillu, chi me divi.²⁹E'ngninucchiatu chillu serviture, pregava a chistu, diciennu: Aje pacienzia, aspettame, e te riennu tuttu.³⁰Ma illu nun voze: e sinne jiu, e lu mise 'ncarciru, ppe ’nzinca chi un pagassi.³¹Vidiennu l'autri servituri chistu fattu, sinne rattristarudi assai: e jieru a cuntare a lu patrune sue tuttu chillu, chi aviadi fattu.³²Tannu lu patrune si lu chiamaudi: e le disse: Siervu malandrinu, io te lassai tuttu lu diebitu, ppecchì minne pregasti:³³Nun duvie tu dunca avire cumpassione de lu paru tue, cuomu io n'aviadi avutu de tie?³⁴E ’nzirratu lu patrune lu cunzignaudi alli carnifici, ’nzinca chi un pagassi tuttu lu diebitu.³⁵D'accussì lu Patre mio cileste fa ccu vue, purusi ognunu de vue nun perduna de core a lu frate sue.