Lu Santo Vancieliu secunnu Matteo 13

1 2 3 4 5 6 7 8 9 10 11 12 13 14 15 16 17 18 19 20 21 22 23 24 25 26 27 28

¹’NCHILLU jurnu pue Gesù esciutu de la casa, stava assettatu alla praja de lu mare.²E li se abbicinaudi ’ntuornu na caterva de gente, tantu vieru, chi ’nchianau supra na varca, se sediu: e tutta chilla frattaria de gente restau allu tagliu de lu mare,³E parrau ad illi de tante cose ppe mienzu deparabule, diciennu: Eccu ca nu simminature jiu ppe simminare.⁴E ’ntramente chi stava jettannu la simente, cadettanu tante perne ppe la via, e curseru ’nzubitu l’aggielli, ch'eranu ’nnariu, e sille manciaru.⁵Na porzione de simente cadiu supra zierti petra e muni, duve cc'era appena na liccatura de terra:’nzubitu spunciu lu lavure, ppecchi lu terrienu era truoppu 'mpannu.⁶Ma quantu amalepene azau lu sule, ti lu tantu ’nfucau, chi siccaudi lestu lestu, ppecchi era senza radiche.⁷N'autra porzione cadiu supra le spine: e crisciute le spine cce restaudi affucata.⁸E n'autra ’nfine cadiu supra na terra bona: e jettau de li cientu, de li sessanta, e de li trenta a tumminata.⁹Chine a ricchie ppe sentere, chi sienti.¹⁰E abbicinatise li discipuli sue le dicettanu: Ppe quale mutivu parri ad illi ccussi cifratu?¹¹Ed illu rispunniennu, le disse. Ppecchi a vue v'è cunciessu cumprinnere li mistieri de lu riegnu de li cieli: ma ad illi nun li s'è data sta facurtate.¹²Ppe lu mutivu, ca a chine hadi, li se dunadi, e stadi all'abbunnanzia: ma a chine nun hadi, le vena levatu puru chillu, chi hadi.¹³E ppecchissu parru ad illi ccu parabule: ppecchì vidiennu nun vidanu, ed aviennu la ’ntisa nun sentanu, e nun capiscianu.¹⁴E s'adempiscia ccu chistu la prufezia de Saia, chi dice: Sentiti ccu le ricchie vostre, e un capisciti: guardati ccu l'uocchi vuostri, e nun viditi.¹⁵Ppecchì chista sorte de puopulu ha nu core truoppu grassu, e le ricchie toste, e l'uocchi chiusi: de muodu tale, chi nun vidanu ccu l'uocchi, nun sentanu ccu le ricchie, e nun cumprinnanu ccu lu core, acciò se cummertissiru, ed io le putissi sanare.¹⁶Ma viati l'uocchi vuostri, chi vidanu, e le ricchie vostre, chi sentanu.¹⁷Ppecchi ve dicu la veritate, ca tanti e tanti prufieti, e tanti giusti desideravanu de videre chillu, chi vue viditi, e un lu videttanu: e de sentere chillu, chi vue sentiti, e nun lu ’ntisanız.¹⁸Sentiti mò puru vue la passatella de lu simminature.¹⁹Tutti chilli, chi sentanu la parola de la riegnu, e nun cce mintanu li siensi, va nu malandrinu, e l'arrapina tuttu chillu, chi avia simminatu allu core sue: chistu è chillu, chi se cugliu la simente 'nmienzu la strata.²⁰Chillu pue, chi mina la simente supra li petramuni, è chillu, chi sente la parola, e la riciva ’nzubitu ccu cuntentizza:²¹Ma mancannule le radiche, un pò avire durata longa: e quantu'amalepene se prisentanu le male occasiuoni e le persecuziuoni pped amure de la parola, ’nzubitu se scannalizzadi.²²L'autru pue, chi riciva la simente dintra le spine, è chillu, chi senta la parola: ma lu pensieru de lu sieculu prisente, e la ʼngurdiggia de le ricchizze le fau restare la parola affucata dintra lu cannaruozzu, e se renna senza fruttu.²³Ma chillu ’nfine, chi ha simminatu a nu buonu terrienu, è chillu, chi senta la parola ccu tutta attenzione, e ne ricoglie lu fruttu, renniennule quale lu cientu, quale lu sessanta, e quale lu trenta pped unu.²⁴N'autra parabula le cuntau ad illi, diciennu: Lu riegnu de li cieli rassimiglia a n' uominu, chi simmina allu funnu sue na bona simente.²⁵Ma’ntiempů, chi l'uomini durmianu, jiu nu nimicu sue, e simminau la zanzania ’nmienzu lu granu, e sinne fujiudi.²⁶Crisciutu pue lu lavure, e fatta la spica, allura se scummegliau la magagna de la zanzania.²⁷E tutti li servituri de chillu patre de famiglia li se abbicinaru, e le dissanu: Signure, nun hai tu simminatu simente scerta a stu campu tue? Cuomu addunca cc'è tutta sta zanzania?²⁸Ed illu le rispuse: 'Ncunu uomu, chi m'è nimicu m'è jutu a fare stu dispiettu. E li servituri le dicettanu: Vue, chi jissimu all'annettare?²⁹Ma illu le rispuse: Nuoni: ppecchi cugliennu la zanzania, scippati puru lu granu.³⁰Lassati, chi l'unu, e l'autra criscissinu ppe ’nzinca alla ricota, e’ntiempu de lu metere dicu alli metituri: Cacciati primu de tuttu la zanzania, facitila a sarcinelle, e vrusciatila; lu granu niettu pue mi lu trasiti dintra lu granaru.³¹Le pripuniudi puru n'autra parabula, diciennu: Lu riegnu de li cieli rassimiglia a nu cuoccitiellu de sienipa, chi lu pigliaudi n' uominu, e lu simminau alla pripenna sua:³²Chi si ’nvista te para la cchiù minuta de tutte le simienti, quannu pue s' è crisciuta, è la cchiù granne de lutti li ligumi, e diventa n’arvule, tantu vieru, chi l'aggielli, chi stau ’nnariu sicce vaudi a ripusare supra li rami.³³E n'autra parabula le cuntaudi: Rassimiglia puru lu riegnu de li cieli a nu pitazzu de criscente, chi na fimmina lu mischiadi a nu tumminu de farina, e la pasta se lievita tutta.³⁴Tutte chiste cose Gesù dicette allu puopulu ppe mienzu de parabule: e nun parrau mai ad illi senza parabule:³⁵Ppe ccussi adempiscire a chillu, chi era statu dittu de lu prufeta: Aperu la vucca mia ccu le parabule, e svielu cose, chi sù state ammucciate de quannu se criau lu munnu.³⁶Allura Gesù, licenziatu chi appe lu puopulu,sinne turnaudi alla casa: ed abbicinatise ad illu li discipuli sue, dicettanu: Speganne la parabula de la zanzania simminata allu campu.³⁷Ed illu rispunniennu, le diciu: Chillu, chi simmina bona simente, è lu Figliu de l'uomu.³⁸Lu campu, è lu munnu. La bona simente, su li figli de lu riegnu. La zanzania, sù li figli de lu malan drinu.³⁹Lu nimicu pue, chi l'ha simminata, è lu diavulu. La ricota, è lu frunituoriu de lu sieculu: li metituri pue, sunu l'anciuli.⁴⁰Sincuomu addunca se ricoglia la zanzania, e se vruscia: d'accussì succede quannu fruna lu sieculu.⁴¹Lu Figliu de l'uomu manna l'anciuli sue, e caccianu fore de la riegnu tutti li scannali, e tutti chilli, chi cummittanu malandrinerie:⁴²E le jettanu a na furnace de fuocu: duve le sienti chiancere, e disgracinare li dienti.⁴³Allura li giusti risplennanu cuomu lu sule allu riegnu de lu Patre luoru. Chine ha ricchie ppe sentere, chi sienti.⁴⁴De cchiù, lu riegnu de li cieli se pò rassumigliare a nu trisuoru nascuostu dintra nu terrienu: chi aviennulu truvatu n'uomu, lu cummoglia ccu terra, e chinu de cuntentizza se va a vinnere tuttu chillu, chi tena, e s'accatta chillu terrienu.⁴⁵E se pò ancore rassimigliare lu riegnu de li cieli a nu negoziante, chi va circannu bone perne.⁴⁶Lu quale aviennune truvatu una assai preziusa, se va, vinne quantu tene, e si l'accattadi.⁴⁷E puru rassimiglia lu riegnu de li cieli a na rite jettata a mare, chi pisca uogni sorta de pisci.⁴⁸La quale, quannu se inchiudi, li piscaturi la tiraru fore, s'assettaru alla praja de lų mare, e ficenu lu scartu. Li buoni le sarvarudi alli cati, e li mali le jettarudi.⁴⁹D'accussi trammene allu frunituoriu de lu sieculu, ca venanu l'anciuli, e scartanu li mali ’nmienzu alli buoni,⁵⁰E le jettanu alla furnace de fuocu: duve chiancianu, ed ammolanu li dienti.⁵¹Aviti vue 'ntisu tutte ste cose? Signorsini, rispusanu illi.⁵²E le dicette puru: Addunca uogni Scribbu struisciutu ppe lu riegnu de li cieli, rassimiglia a nu pat de famiglia, lu quale caccia fore de la dispensa sua rrope nove, e rrope usate.⁵³Frunutu chi avette Gesù de cuntare ste parabule, sinne partiudi de chillu luocu.⁵⁴E sinne jiudi allu paise sue, e dava ’nzegnamientu alle luoru sinicoche, tantu vieru, chi ne restavanu maravigliati, e dicianu: Cuomu mai chistu pò avire tanta sapienzia, e fare tanti meraculi?⁵⁵Nun è illu figliu de nu mastru? La mamma sua nun è chilla, chi se chiama Maria, e li frati sue nun sù chilli, chi se chiamanu, Giacumu, Giuseppe, Simune, e Juda?⁵⁶E tutte le suoru, nun sù mischiate ccu nue? De duve addunca le sù venute tutte ste virtuti?⁵⁷E restavanu scannalizzati de illu. Ma Gesù le dicette: Nullu prufeta vena unuratu alla casa propia, ed allu paise sue.⁵⁸E nun cce voze fare llà tanti meraculi, canuscien nu quantu eranu scridebuli.