Lu Santo Vancieliu secunnu Matteo 14

1 2 3 4 5 6 7 8 9 10 11 12 13 14 15 16 17 18 19 20 21 22 23 24 25 26 27 28

¹NCHILLU tiempu Rode lu tetrarcu sentiu parrare de le cose de Gesù:²E disse alli curtiggiani sue: Chistu è Giuvanni Battista, chi è risuscitatu de la morte, e ppecchissu muoni ha la virtute de fare tutti sti meraculi.³Ppecchì Rode, aviennu fattu ligare a Giuvanni, lu ’nzimmau dintra nu carciru ppe causa de Rodiade mugliere de lu frate.⁴Allu quale Giuvanni dicia: Nun t' è permissu tenire a chista.⁵Ed illu vuliennulu ammazzare, se spagnau de lu puopulu: ppecchì lu tenianu ppe nu prufeta.⁶Ma lu jurnu nataliziu de Rode la figlicella de Rodiade esciudi ’nmienzu ad abballare, e piaciudi a Rode.⁷Tantu chi ccu juramientu le prumise de le dare tuttu chillu, chi l'avissi circatu.⁸Ma illa 'mmiziata de la mamma, le disse: Duname ccà dintra nu vacile la capu de Giuvanni Battista.⁹Se rattristau lu rre: ma ppe causa de lu juramientu datu, e de li cummitati, dunau l'ordine, chi le fuossi purtata.¹⁰E mannaudi a scruzzare Giuvanni dintra lu carciru.¹¹E foze purtata la capu sua a nu vacile, e cunzignata a chilla giuvinella, chi la prisentaudi alla mamma.¹²E li discipuli sue jierudi a pigliare lu cuorpu, e l'uorvicarudi: e curseru duoppu a purtare la nova a Gesù.¹³Aviennu ’ntisu chistu Gesù, sinne partiu de lladi ccu na varca, e sinne jiudi a nu luocu sulagnu, e desiertu: ed aviennulu saputu le turbe, le curseru d'appriessu a pede de le citati.¹⁴Ed esciutu de la varca, vidiu chilla frattaria de gente, se muviudi ' a cumpassione de illa, e sanau tutti li malati luoru.¹⁵Ma essiennuse fatta la sira, li se abbicinarudi li discipuli sue, e le dissanu: Lu luocu è desiertu, e l'ura è fatta tardu: licienzia stu puopulu, ca puru va ppe ’ncuna turra, e se pruvvida de manciare.¹⁶Ma Gesù le diciu: Nun cc'è nicessitate de sinne jire: daticcenne vue de manciare.¹⁷Ed illi le rispusanu: Nue ccà nun avimu autru ca suli cinque pani, e dui pisci.¹⁸Ed illu le disse: Dunatimille a mie.¹⁹Ed aviennu uordinatu alle turbe de s'assettare supra l'erva, pigliau li cinque pani, e li dui pisci, sversau l'uocchi ’ncielu, benediciu, e stuozzijau, e deze alli discipuli li pani, e li discipuli alle turbe.²⁰E tutti manciarudi, e s'abbuttarudi. E ricozanu dudici cuofini chini de stozza restatizzi.²¹E chilli, chi avianu manciatu, fozanu de numeru cinquemilia uomini, 'nnestra de le fimmine, e de li quatrarielli.²²E ’ nzubitu Gesù uordinau alli discipuli sue de ’nchianare supra la varca, e lu jire ad aspettare all'autra banna, 'ntramente ch'illu licenziava lu puopulu.²³E licenziate le turbe, sagliu illu sulu supra nu munte ppe fare orazione. E venuta la sira, era sulu sulu a chillu luocu.²⁴La varca ’ntantu era ’nmienzu lu mare sbattuta de l'unne: ppecchì lu vientu l'era cuntrariu.²⁵Ma alla quarta vijilia de la notte, jiu 'nviersu de illi Gesù caminannu supra mare.²⁶E li discipuli appena lu videttanu caminare supra lu mare, se cuntrubarudi, e dicianu: Chista è na pantasima. E chini de pagura se misanu a gridare.²⁷Ma’nzubitu Gesù parrau ad illi, e le disse: Faciti curaggiu: signu io, un ve spagnati.²⁸Ma Pietru le rispuse, e le disse: Segnure, si si tuni, cummanname, chi viegni duve tie supra l'acqua.²⁹Ed illu disse: Vieni. E Pietru scisu de la varca, caminava supra l'acqua ppe jire duve Gesù.³⁰Ma vidiennu, ca lu vientu era truoppu forte, se pigliau de pagura: e stannu ppe s'affucare, gridau, e disse: Segnure, sarvame.³¹E Gesù stise ’ nzubitu la manu, lu pigliau, e le disse: Si de puocu fide, ppecchì hai dubitatu?³²Ed essiennu illi ’nchianati supra la varca, lu vientu se quetaudi.³³Ma chilli, chi eranu dintra la varca, curseru, e l'aduraru, diciennu: Tu sini ppe lu vieru lu Figliu de Dio.³⁴E passatu lu lacu, sinne jieru alla terra de Gene sar.³⁵Ed aviennulu la gente de chillu luocu ricanusciutu, mannaru 'ngiru ppe tuttu chillu paise, e le prisentaru tutti li malati:³⁶E le circaru 'ngrazia de putire chisti tuccare na puntilla de la vesta. E tutti chilli, chi la tuccaru, fozanu sanati.