Tobia ܛܘܒܝܛ 1

1 2 3 4 5 6 7 8 9 10 11 12 13 14

Gen Es Lv Nm Dt Gs Gdc Rt 1Sam 2Sam 1Re 2Re 1Cr 2Cr Esd Ne Tb Gdt Est 1Mac 2Mac Gb Sal pr Qo Ct Sap Sir Is Ger Lam Bar Ez Dn Os Gl Am Abd Gn Mi Na Ab Sof Ag Zc Ml

¹ܬܘܒ ܟܬܒܐ ܕܛܘܒܝܛ ܐܝܟ ܡܫܠܡܢܘܬܐ ܕܫܒܥܝܢ ܟܬܒܐ ܕܡ̈ܠܐ ܕܛܘܒܝܛ ܗ̇ܘ ܕܒܝܐܝܠ ܗ̇ܘ ܕܚܢܢܐܝܠ ܗ̇ܘ ܕܐܕܘܐܝܠ ܗ̇ܘ ܕܓܒܐܝܠ ܡܢ ܙܪܥܐ ܕܐܫܐܝܠ ܡܢ ܫܪܒܬܐ ܕܢܦܬܠܝ²ܗ̇ܘ ܕܐܫܬܒܝ ܗܘܐ ܒܝܘ̈ܡܬܗ ܕܫܠܡܢܥܣܪ ܡ̇ܠܟܐ ܕܐܬܘܪ̈ܝܐ̇. ܡܢ ܬܝܒܣ ܗ̇ܝ ܕܐܝܬܝܗ̇ ܡܢ ܝܡܝܢܐ ܕܩܕܫ ܕܢܦܬܠܝ ܒܓܠܝܠܐ ܠܥܠ ܡܢ ܐܫܝܪ³ܐܢܐ ܛܘܒܝܛ ܒܐܘܪ̈ܚܬܐ ܕܫܪܪܐ ܪܕܐ ܗܘܝܬ ܘܕܙܕܝ̣ܩܘܬܐ ܟܠܗܘܢ ܝܘܡ̈ܬܐ ܕܚ̈ܝܐ ܕܝܠܝ. ܘܡܪ̈ܚܡܢܘܬܐ ܣܓ̈ܝܐܬܐ ܥܒܕܬ ܠܐ̈ܚܐ ܕܝܠܝ̣. ܘܠܥܡܐ ܗ̇ܘ ܕܐ̇ܙܠ ܥܡܝ ܠܐܬܪܐ ܕܐܬܘܪ̈ܝܐ ܠܢܝܢܘܐ⁴ܘܟܕ ܐܝܬܝ ܗܘܝܬ ܒܐܬܪܐ ܕܝܠܝ ܒܐܪܥܐ ܕܝܣܪܝܠ ܟܕ ܛܠܝܐ ܐܝܬܝ ܗܘܝܬ ܟܠܗ̇ ܫܪܒܬܐ ܕܢܦܬܠܝ ܐܒܐ ܕܝܠܝ̣. ܐܪܚܩܬ ܡܢ ܒܝܬܐ ܕܒܐܘܪܫܠܡ̇. ܗ̇ܝ ܕܐܬܓܒܝܬ ܡܢ ܟܠܗܝܢ ܫܪ̈ܒܬܐ ܕܐܝܣܪܝܠ ܠܡܕܒܚܘ ܟܠܗܝܢ ܫܪ̈ܒܬܐ̇. ܘܐܬܩܕܫ ܗܝܟܠܐ ܕܒܝܬ ܡܫܪܝܗ ܕܡܪܝܡܐ ܗ̇ܘ ܕܐܬܒܢܝ ܒܗ̇ ܠܟܠܗܘܢ ܕܪ̈ܐ ܕܥܠܡܐ⁵ܘܟܠܗܝܢ ܫܪ̈ܒܬܐ ܕܡܪܝܐ ܟܕ ܐܪ̈ܚܩܝܢ ܡܕܒ̈ܚܢ ܗ̈ܘܝ ܒܒܥܠܐ ܠܥܓܠܬܐ̣. ܘܒܝܬܐ ܕܢܦܬܠܝ ܐܒܐ ܕܝܠܝ⁶ܘܐܢܐ ܒܠܚܘܕܝ ܪܕܐ ܗܘܝܬ ܙܒ̈ܢܝܢ ܣ̈ܓܝܐܢ ܠܐܘܪܫܠܡ ܒܥܐ̈ܕܐ̇. ܐܝܟ ܗ̇ܝ ܕܟܬܝܒܐ̇. ܠܟܠܗ ܐܝܣܪܝܠ ܒܦܘܩܕܢܐ ܕܠܥܠܡ. ܟܕ ܪܝܫ̈ܝܬܐ ܘܒܘܟܪ̈ܐ ܘܡܥܣܪ̈ܐ ܕܥ̈ܠܠܬܐ̇. ܘܪܝܫܝܬ ܥܙ̈ܐ ܕܥܪ̈ܒܐ ܐܝܬ ܗܘܐ ܠܝ⁷ܘܝܗܒܬ ܗܘܝܬ ܠܗܝܢ ܠܟܗ̈ܢܐ ܠܒ̈ܢܝܐ ܕܐܗܪܘܢ ܩܕܡ ܡܕܒܚܐ̇. ܡܥ̈ܣܪܐ ܕܟܠܗܝܢ ܥ̈ܠܠܬܐ ܝܗ̇ܒ ܗܘܝܬ ܠܒ̈ܢܝܐ ܕܠܘܝ ܠܗ̇ܢܘܢ ܕܡܢܝܚܝܢ ܗܘܘ ܒܐܘܪܫܠܡ̇. ܘܠܥܘܣܪܐ ܬܪܝܢܐ̣. ܡܙܒܢ ܗܘܝܬ̣. ܘܐܙܠ ܗܘܝܬ ܘܡܢ̇ܦܩ ܗܘܝܬ ܠܗܘܢ ܒܐܘܪܫܠܡ̇. ܒܟܠ ܫܢܬܐ⁸ܘܠܬܠܝܬܝܬܐ̣. ܝܗ̇ܒ ܗܘܝܬ ܠܗ̇ܢܘܢ ܕܙܕ̇ܩ̣. ܐܝܟܢܐ ܕܦܩܕܬܢܝ ܕܒܘܪܐ ܐܡܐ ܕܝܠܝ. ܡܛܠ ܕܝܬܡܐ ܐܫܬܒܩܬ ܡܢ ܐܒܐ⁹ܘܟܕ ܗܘܝܬ ܓܒܪܐ̣. ܢܣܒܬ ܠܚܢܢܐ ܐܢܬܬܐ̇. ܡܢ ܙܪܥܐ ܕܫܪܒܬܐ ܕܝܠܢ. ܘܝܠܕܬ ܡܢܗ̇ ܒܪܐ. ܘܩܪܝܬ ܠܫܡܐ ܕܝܠܗ ܛܘܒܝܐ¹⁰ܘܟܕ ܐܫܬܒܝܬ ܠܢܝܢܘܐ̣. ܟܠܗܘܢ ܐܚ̈ܝ ܘܗ̇ܢܘܢ ܕܡܢ ܓܢܣܐ ܕܝܠܝ̣. ܐܟܠܝܢ ܗܘܘ ܡܢ ܠܚ̈ܡܐ ܕܥܡ̈ܡܐ¹¹ܐܢܐ ܕܝܢ ܢܛܪܬ ܠܢܦܫܐ ܕܝܠܝ ܕܠܐ ܐܟܘܠ̣¹²ܐܝܟܢܐ ܕܥܗܝܕ ܗܘܝܬ ܒܟܠܗ̇ ܢܦܫܐ ܕܝܠܝ ܠܐܠܗܐ¹³ܘܝܗܒ ܠܝ ܡܪܝܡܐ ܛܝܒܘܬܐ̣. ܘܪܡܘܬܐ ܩܕܡ ܫܠܡܢܥܣܪ̣. ܘܐܝܬܝ ܗܘܝܬ ܙܒܘ̇ܢܐ ܕܝܠܗ̣¹⁴ܘܐܙܠ ܗܘܝܬ ܠܡܕܝ. ܘܣܡܬ ܓܘܥܠܢܐ ܠܘܬ ܓܒܐܝܠ ܐܚܘܗܝ ܕܓܒܪܝܐܝܠ ܒܪܐܓܝܐ ܕܡܕܝ. ܕܟܣܦܐ ܕܟܟܪ̈ܐ ܥܣܪ¹⁵ܘܟܕ ܡܝܬ ܫܠܡܢܥܣܪ ܐܡܠܟ ܗܘܐ ܣܢܚܪܝܡ ܒܪܐ ܕܝܠܗ ܚܠܦܘܗܝ. ܘܐܘܪ̈ܚܬܐ ܕܝܠܗ ܠܐ ܡܛܟ̈ܣܬܐ ܗ̈ܘܝ. ܘܠܐ ܬܘܒ ܐܬܡܨܝܬ ܠܡܐܙܠ ܠܡܕܝ¹⁶ܘܒܝܘܡ̈ܬܗ ܕܫܠܡܢܥܣܪ̣. ܡܪ̈ܚܡܢܘܬܐ ܣܓܝܐ̈ܬܐ ܥܒܕܬ ܠܐ̈ܚܐ ܕܝܠܝ¹⁷ܠܠܚ̈ܡܐ ܕܝܠܝ ܗܘܝܬ ܝܗܒ ܠܟܦ̈ܢܐ. ܘܢܚ̈ܬܐ ܠܥܪ̈ܛܠܝܐ. ܘܐܢ ܠܐܢܫ ܡܢ ܗ̇ܢܘܢ ܕܡܢ ܓܢܣܐ ܕܝܠܝ ܚ̇ܙܐ ܗܘܝܬ ܕܡܚܬ ܗܘܐ ܘܫ̣ܕܐ ܒܣܬܪ ܫܘܪܐ ܕܢܝܢܘܐ̣. ܩܒܪ ܗܘܝܬ ܠܗ¹⁸ܘܐܢ ܠܐܢܫ ܩ̇ܛܠ ܗܘܐ ܣܢܚܪܝܡ ܡ̇ܠܟܐ̣. ܟܕ ܐܬ̣ܐ ܕܥ̇ܪܩ ܗܘܐ ܡܢ ܝܗܘܕ̣. ܩܒܪ ܗܘܝܬ ܠܗ ܟܕ ܓ̇ܢܒ ܗܘܝܬ. ܠܣ̈ܓܝܐܐ ܓܝܪ ܩ̣ܛܠ ܒܚܡܬܐ ܕܝܠܗ̣. ܐܬܒܥܝܘ ܗܘܘ ܗܟܝܠ ܡܢ ܡ̇ܠܟܐ ܗܠܝܢ ܦܓܪ̈ܐ̣ ܘܠܐ ܐܫܬܟܚܘ¹⁹ܟܕ ܐܙܠ ܕܝܢ ܚܕ ܡܢ ܗܠܝܢ ܕܒܢܝܢܘܐ̣. ܚܘܝ ܠܡ̇ܠܟܐ ܡܛܠܬܝ̇. ܕܐܢܐ ܩ̇ܒܪ ܗܘܝܬ ܠܗܘܢ. ܘܐܬܛܫܝܬ ܟܕ ܐܫܬܘܕܥܬ ܕܡܬܒܥܐ ܐܢܐ ܠܡܡܬ. ܘܟܕ ܕܚܠܬ ܫ̇ܢ̣ܝܬ²⁰ܘܐܬܚ̈ܛܦܝܢ ܟܠܗܝܢ ܗܠ̣ܝܢ ܕܐܝܬ ܗ̈ܘܝ ܠܝ̣. ܘܠܐ ܐܫܬܒܩ ܠܝ ܘܠܐ ܡܕܡ. ܣܛܪ ܡܢ ܚܢܢܐ ܐܢܬܬܐ ܕܝܠܝ̇. ܘܛܘܒܝܐ ܒܪܐ ܕܝܠܝ²¹ܘܠܐ ܥܒܪܘ ܝܘܡ̈ܬܐ ܚܡܫܝܢ ܥܕܡܐ ܕܩܛܠܘܗܝ ܬܪܝܗܘܢ ܒ̈ܢܝܐ ܕܝܠܗ̇. ܘܥܪܩ̣ ܠܛܘܪܐ ܕܐܪܪܛ.. ܘܐܡܠܟ ܗܘܐ ܣܪܚܕܘܢܨܪ ܒܪܐ ܕܝܠܗ. ܘܛܟܣ ܗܘܐ ܠܐܚܝܘܪ ܗ̇ܘ ܕܚܢܢܐܝܠ ܒܪܐ ܕܐܚܐ ܕܝܠܝ̇ ܥܠ ܟܠܗ ܚܘܫܒܢܐ ܕܡܠܟܘܬܐ ܕܝܠܗ̣. ܘܥܠ ܟܠܗ ܦܘܪܢܣܐ²²ܘܐܦܝܣ ܗܘܐ ܐܚܝܚܘܪ ܚܠܦܝ̣. ܘܐܬܝܬ ܠܢܝܢܘܐ. ܐܚܝܚܘܪ ܕܝܢ ܐܝܬܘܗܝ ܗܘܐ ܫܩܝܐ̣. ܘܥܠ ܥܙܩܬܐ ܘܦܪܢܣܐ ܘܥܒ̇ܕ ܚܘܫܒܢܐ. ܘܐܩܝܡܗ ܣܪܚܕܘܢܨܪ ܒܪܐ ܡܢ ܗ̇ܝ ܕܬܪܬܝܢ. ܐܝܬܘܗܝ ܕܝܢ ܡܢ ܐܚܐ ܕܝܠܝ

1 2 3 4 5 6 7 8 9 10 11 12 13 14

Gen Es Lv Nm Dt Gs Gdc Rt 1Sam 2Sam 1Re 2Re 1Cr 2Cr Esd Ne Tb Gdt Est 1Mac 2Mac Gb Sal pr Qo Ct Sap Sir Is Ger Lam Bar Ez Dn Os Gl Am Abd Gn Mi Na Ab Sof Ag Zc Ml

Altre sezioni del sito

Utility

SCRUTATIO

Tobia ܛܘܒܝܛ 1

Confronta con un'altra Bibbia

Cambia Bibbia