Giuditta ܝܗ̱ܘܕܝܬ 1

⁰ ܀ • ܟܬܒܐ ܕܝܗܘܕܝܬ ܀

¹ ܒܫܢܬ ܬܪܬܥܣܪܐ ܕܡܠܟܘܬܗ ܕܢܒܘܟܕܢܨ̇ܪ ܡܠܟܐ ܕܐܬܘܪ. ܕܐܡܠܟ ܒܢܝܢܘܐ ܡܕܝܢܬܐ ܪܒܬ̣ܐ̣. ܒܝܘܡ̈ܘܗܝ ܕܐܪܦܟܫܪ ܡ̇ܠܟܐ ܕܡܕܝ ܕܐܡܠܟ ܒܩܦܛܢ̣

² ܘܒܢܐ ܡܓܕܠܐ ܠܩܦܛܢ. ܘܐܚܕܪܗ ܫܘܪܐ ܒܟܐ̈ܦܐ ܦܣܝ̈ܠܬܐ. ܕܗ̇ܘܐ ܦܬܝܗ̇ ܕܟܐܦܐ̣. ܬܠܬ ܐ̈ܡܝܢ. ܘܐܘܪܟܗ̇ ܫܬ ܐܡ̈ܝܢ. ܘܗ̇ܘܐ ܪܘܡܗ ܕܫܘܪܐ̣ ܫܒ̈ܥܝܢ ܐܡ̈ܝܢ

³ ܘܒܢ̣ܐ ܡܓܕ̈ܠܐ ܕܬܪܥܐ ܕܫܘܪܐ ܡܐܐ ܐܡ̈ܝܢ. ܘܦܬܝܗ̇ ܕܬܪܥܐ ܫܬܝܢ ܐܡ̈ܝܢ

⁴ ܘܥ̣ܒܕ ܬܪ̈ܥܐ ܘܩܝ̈ܡܐ. ܪܘܡܗܘܢ̣ ܫܬܝܢ ܐܡ̈ܝܢ ܘܦܬܝܗܘܢ̣ ܐܪܒܥܝܢ ܐܡܝܢ. ܠܡܦܩܢܐ ܕܡܪ̈ܟܒܬܐ ܕܚܝܠܗ

⁵ ܘܒܝܘܡ̈ܬܐ ܗ̇ܢܘܢ̣. ܥܒ̣ܕ ܩܪܒܐ ܡ̈ܠܟܐ ܢܒܘܟܕܢ̣ܨܪ ܥܡ ܐܪܦܟܫܪ ܡ̇ܠܟܐ ܒܦܩܥܬܐ. ܗ̣ܝ ܗܝ ܦܩܥܬ ܕܘܪܐ

⁶ ܘܢܦܩܘ ܠܩܘܒܠܗ̣ ܟܠܗܘܢ ܥܡܪ̈ܝ ܛܘ̣ܪܐ ܘܟܘܠ ܕܥܡܪܝܢ ܥܠ ܢܗܪܐ ܦܪܬ̇ ܘܥܠ ܕܩܠܬ ܘܥܠ ܐܘܠܝ. ܒܦܩܥܬܐ ܕܐܪܝܘܟ ܡ̇ܠܟܐ ܕܥܝܠܡ. ܘܐܬܟܢܫܘ ܥ̈ܡܡܐ ܣܓܝ̈ܐܐ̇. ܠܡܩܪܒܘ ܥܡ ܟܠܕ̈ܝܐ

⁷ ܘܫ̇ܕܪ ܢܒܘܟܕܢܨܪ ܡ̇ܠܟܐ ܕܐܬܘܪ ܥܡ ܟܠܗܘܢ ܥ̇ܡܘܪ̈ܐ ܕܠܒܢܐ̣. ܘܥܠ ܟܠ ܕܥܡ̇ܪܝܢ ܒܩܝܠܝܩܝܐ. ܘܒܕܪܡܣܘܩ ܘܒܠܒܢܢ ܘܒܚܕܪ̈ܘܗܝ. ܘܥܠ ܟܠ ܕܥ̇ܡܪܝܢ ܥܠ ܝܕ ܝܡܐ

⁸ ܘܥܠ ܥ̇ܡܘܪ̈ܐ ܕܟܪܡܠܐ ܘܕܓܠܥܕ ܘܕܓܠܝܠܐ ܥܠܝܬܐ. ܘܒܦܩܥܬܐ ܪܒ̇ܬܐ ܕܐܝܙܪܥܐܝܠ

⁹ ܘܥܠ ܟܘܠ ܕܒܫܡ̇ܪܝܢ ܘܒܡܕ̈ܝܢܬܐ ܘܠܕܒ̇ܥܒܪܐ ܕܝܘܪܕܢܢ ܥܕܡܐ ܠܐܘܪܫܠܡ. ܘܠܕܒܛܢܢ. ܘܕܟܠܘܢ ܘܕܩܕܫ. ܘܠܕܒܢܗܪܐ ܕܡܨܪ̈ܝܢ ܘܠܕܒܬܚܦܝܣ. ܘܠܕܪܥܡܣܝܣ. ܘܠܟܘܠܗ̇ ܓܫܢ ܥܕܡܐ ܠܨܥܢ̣

¹⁰ ܘܠܡ̇ܦܣ. ܘܠܟܠ ܕܥ̇ܡܪܝܢ ܒܐܪܥܐ ܕܡܨܪܝܢ. ܥܕܡܐ ܠܬܚܘܡܐ ܕܟܘܫ

¹¹ ܘܐܗܦܟܘ ܦܬܓ̈ܡܐ ܕܢܒܘܟܕܢܨܪ ܡ̇ܠܟܐ. ܟܠܗܘܢ ܥܡܘܪ̈ܝܗ̇ ܕܐܪܥܐ. ܘܠܐ ܐܬܘ ܠܩܪܒܐ ܘܠܐ ܕܚ̣ܠܘ ܡܢܗ. ܡܛܠ ܕܗܘܘ ܟܠܗܘܢ ܐܝܟ ܓܒܪܐ ܚܕ. ܘܐܗܦܟܘ ܐܢܘܢ ܠܡܠܐܟ̈ܘܗܝ ܒܨ̇ܥܪܐ ܕܐܦܝ̈ܗܘܢ

¹² ܘܐܬܚ̣ܡܬ ܛܒ ܢܒܘܟܕܢܨܪ ܥܠ ܟܠܗ̇ ܐܪܥܐ ܗܕܐ. ܘܐܝܡܐ ܒܟܘܪܣܝܗ ܘܒܡܠܟܘܬܗ. ܕܢܬ̇ܒܥ ܡܢ ܟܠܗܘܢ ܬܚܘ̈ܡܐ ܕܩ̇ܝܠܝ̈ܩܝܐ ܘܕܕܪܡܣܘܩ ܘܕܒܝܫܢ. ܘܠܡܩܛܠܘ ܒܚܪܒܐ ܠܟܠܗܘܢ ܥ̇ܡܘܪ̈ܐ ܕܡܘܐܒ. ܘܠܒ̈ܢܝ ܥܡܗܘ̇ܢ ܘܠܟܠܗ̇ ܝܗܘܕ ܘܠܟܠ ܕܒܡܨܪܝܢ. ܘܠܡܐܬܐ ܥܕܡܐ ܠܬܚܘܡܐ ܕܬܪ̈ܝܗܘܢ ܝܡܡ̈ܐ

¹³ ܘܥ̇ܬܕ ܚܝܠܗ ܠܘܩܒܠ ܐܪܦܟܫܪ ܡ̇ܠܟܐ. ܒܫܢܬ ܫܒܥܣܪܐ̣̇. ܘܐܬܥܫܢ ܒܩܪܒܐ. ܘܐܗܦܟ ܠܟܠܗ ܚܝܠܗ ܕܐܪܦܟܫܪ. ܘܠܟܠܗܘܢ ܦܪ̈ܫܘܗܝ̣ ܘܠܟܠܗܝܢ ܡܪ̈ܟܒܬܗ

¹⁴ ܘܐܫܬܠܛ ܥܠ ܡܕܝܢ̈ܬܗ. ܘܡܛܝ ܥܕܡܐ ܠܩܦܛܢ. ܘܟ̣ܒܫ ܡܓܕ̈ܠܐ ܘܫ̣ܒܐ ܠܫܛܚܝ̈ܗܘܢ ܘܠܟܠܗ̇ ܝܐܝܘܬܗܘܢ̇ ܥ̣ܒܕܗ̇ ܠܚܣ̇ܕܐ

¹⁵ ܘܐܚܕܗ̇ ܠܐܪܦܟܫܪ ܒܛܘܪ̈ܝ ܪܓܘ. ܘܩܛܠܗ ܒܪܘܡܗ. ܘܐܘܒܕܗ̣ ܥܕܡܐ ܠܝܘܡܢܐ

¹⁶ ܘܗܦܟ ܠܢܝܢܘܐ ܗ̣ܘ ܘܚܝܠܗ. ܘܣܘܓܐܐ ܕܓܒܪ̈ܐ ܩܪ̈ܒ̇ܬܢܐ. ܘܗ̣ܘܐ ܡܬܓܐܐ ܬܡܢ ܘܡܬܒܣܡ. ܗ̣ܘ̣ ܘܟܠܗ ܚܝܠܗ. ܡܐܐ̣ ܘܥܣܪ̈ܝܢ ܝܘܡ̈ܝܢ