Genesi ܒܪܝܬܐ 7

¹ ܘܶܐܡܰܪ ܐܰ‌ܠܳܗܳܐ ܠܢܽܘܚ: ܥܽܘܠ ܐܰܢ̱ܬ ܘܟܽܠܶܗ ܒܰܝܬܳܟ ܠܩܺܒܽܘܬܳܐ: ܡܶܛܽܠ ܕܠܳܟ ܚܙܺܝ݀ܬ ܕܙܰܕܺܝܩ ܐܰܢ̱ܬ ܩܕܳܡܰܝ ܒܕܳܪܳܐ ܗܳܢܳܐ.

² ܘܡܶܢ ܟܽܠܳܗ̇ ܒܥܺܝܪܳܐ ܕܟܺܝܬܳܐ ܣܰܒ ܠܳܟ ܫܰܒܥܳܐ ܫܰܒܥܳܐ: ܕܶܟܖ̈ܶܐ ܘܢܶܩ̈ܒܳܬܳܐ ܡܶܢ ܒܥܺܝܪܳܐ ܕܠܳܐ ܗܘܳܬ ܕܰܟܝܳܐ: ܬܪܶܝܢ ܬܪܶܝܢ ܕܶܟܖ̈ܶܐ ܘܢܶܩ̈ܒܳܬܳܐ.

³ ܘܳܐܦ ܡܶܢ ܦܳܪܰܚܬܳܐ ܕܟܺܝܬܳܐ ܫܰܒܥܳܐ ܫܰܒܥܳܐ: ܕܶܟܖ̈ܶܐ ܘܢܶܩ̈ܒܳܬܳܐ: ܠܡܰܚܳܝܽܘ ܙܰܪܥܳܐ ܥܰܠ ܐܰܦܰܝ̈ ܟܽܠܳܗ̇ ܐܰܪܥܳܐ.

⁴ ܡܶܛܽܠ ܕܡܶܟܳܐ ܠܫܰܒܥܳܐ ܝܰܘܡܺܝ̈ܢ ܡܰܚܶܬ ܐ̱ܢܳܐ ܡܶܛܪܳܐ ܥܰܠ ܐܰܪܥܳܐ: ܐܰܪܒܥܺܝܢ ܝܰܘܡܺܝ̈ܢ ܘܰܐܪܒܥܺܝܢ ܠܰܝ̈ܠܰܘܳܢ: ܘܥܳܛܶܐ ܐ̱ܢܳܐ ܟܽܠ ܕܩܳܐܶܡ ܕܥܶܒܕܶܬ ܡܶܢ ܐܰܦܰܝ̈ ܐܰܪܥܳܐ.

⁵ ܘܰܥܒܰܕ ܢܽܘܚ ܐܰܝܟ ܕܦܰܩܕܶܗ ܡܳܪܝܳܐ.

⁶ ܘܢܽܘܚ ܒܰܪ ܫܶܬܡܳܐܐ ܫܢܺܝ̈ܢ: ܘܛܰܘܦܳܢܳܐ ܗܘܳܐ ܡܰܝ̈ܳܐ ܥܰܠ ܐܰܪܥܳܐ.

⁷ ܘܥܰܠܘ ܢܽܘܚ ܘܰܒܢܰܘ̈ܗܝ: ܘܰܐܢ̱ܬܬܶܗ ܘܢܶܫ̈ܶܐ ܕܰܒܢܰܘ̈ܗܝ ܥܰܡܶܗ ܠܩܺܒܽܘܬܳܐ: ܡܶܢ ܩܕܳܡ ܡܰܝ̈ܳܐ ܕܛܰܘܦܳܢܳܐ.

⁸ ܘܡܶܢ ܒܥܺܝܪܳܐ ܕܟܺܝܬܳܐ: ܘܡܶܢ ܒܥܺܝܪܳܐ ܕܠܳܐ ܗܘܳܬ ܕܰܟܝܳܐ: ܘܡܶܢ ܦܳܪܰܚܬܳܐ: ܘܡܶܢ ܟܽܠ ܕܪܳܚܶܫ ܥܰܠ ܐܰܪܥܳܐ.

⁹ ܬܪܶܝܢ ܬܪܶܝܢ ܥ̣ܰܠܘ ܥܰܡ ܢܽܘܚ ܠܩܺܒܽܘܬܳܐ: ܕܶܟܖ̈ܶܐ ܘܢܶܩ̈ܒܳܬܳܐ: ܐܰܝܟ ܕܦܰܩܶܕ ܐܰ‌ܠܳܗܳܐ ܠܢܽܘܚ.

¹⁰ ܘܰܗܘܳܐ ܠܫܰܒܥܳܐ ܝܰܘܡܺܝ̈ܢ: ܘܡܰܝ̈ܳܐ ܕܛܰܘܦܳܢܳܐ ܗܘܰܘ ܥܰܠ ܐܰܪܥܳܐ.

¹¹ ܒܰܫܢܰܬ ܫܶܬܡܳܐܐ ܫܢܺܝ̈ܢ ܠܚܰܝܰܘ̈ܗܝ ܕܢܽܘܚ: ܒܝܰܪܚܳܐ ܕܰܬܪܶܝܢ: ܒܰܫܒܰܥܶܣܖ̈ܶܐ ܒܝܰܪܚܳܐ ܒܶܗ ܒܝܰܘܡܳܐ ܗܳܢܳܐ: ܐܶܬܬܪܰܥܘ ܟܽܠ ܡܰܒܽܘ̈ܥܰܝ ܬܗܽܘܡܳܐ ܪܰܒܳܐ: ܘܢܳܣ̈ܟܶܐ ܕܰܫܡܰܝܳܐ ܐܶܬܦܬܰܚܘ.

¹² ܘܰܗܘܳܐ ܡܶܛܪܳܐ ܥܰܠ ܐܰܪܥܳܐ: ܐܰܪܒܥܺܝܢ ܐܺܝܡܳܡܺܝ̈ܢ ܘܰܐܪܒܥܺܝܢ ܠܰܝ̈ܠܰܘܳܢ.

¹³ ܒܶܗ ܒܝܰܘܡܳܐ ܗܳܢܳܐ ܥܰܠ ܢܽܘܚ: ܘܫܺܝܡ: ܘܚܰܡ: ܘܝܰܦܬ: ܒܢܰܝ̈ ܢܽܘܚ ܘܰܐܢ̱ܬܬܶܗ ܕܢܽܘܚ: ܘܰܬܠܳܬ ܢܶܫ̈ܶܐ ܕܰܒܢܰܘ̈ܗܝ ܠܩܺܒܽܘܬܳܐ.

¹⁴ ܗܶܢܽܘܢ ܘܟܽܠܳܗ̇ ܚܰܝܽܘܬܳܐ ܠܓܶܢܣܳܗ̇: ܘܟܽܠܳܗ̇ ܒܥܺܝܪܳܐ ܠܓܶܢܣܳܗ̇: ܘܟܽܠ ܪܰܚܫܳܐ ܕܪܳܚܶܫ ܥܰܠ ܐܰܪܥܳܐ ܠܓܶܢܣܰܘ̈ܗܝ: ܘܟܽܠܳܗ̇ ܦܳܪܰܚܬܳܐ ܠܓܶܢܣܳܗ̇: ܘܟܽܠ ܨܦܰܪ ܘܟܽܠ ܓܶܦ.

¹⁵ ܥ̣ܰܠܘ ܥܰܡ ܢܽܘܚ ܠܩܺܒܽܘܬܳܐ: ܬܪܶܝܢ ܬܪܶܝܢ ܡܶܢ ܟܽܠ ܒܣܰܪ ܕܺܐܝܬ ܒܗܽܘܢ ܪܽܘܚܳܐ ܕܚܰܝ̈ܶܐ.

¹⁶ ܘܰܕܥ̣ܰܠܘ ܕܶܟܖ̈ܶܐ ܘܢܶܩ̈ܒܳܬܳܐ ܡܶܢ ܟܽܠ ܒܣܰܪ ܥ̣ܰܠܘ: ܐܰܝܟ ܕܦܰܩܕܶܗ ܐܰ‌ܠܳܗܳܐ. ܘܶܐܚܰܕ ܡܳܪܝܳܐ ܒܰܐܦܰܘ̈ܗܝ.

¹⁷ ܘܰܗܘܳܐ ܛܰܘܦܳܢܳܐ ܐܰܪܒܥܺܝܢ ܝܰܘܡܺܝ̈ܢ ܥܰܠ ܐܰܪܥܳܐ: ܘܰܣܓܺܝܘ ܡܰܝ̈ܳܐ ܘܫܰܩܠܽܘܗ̇ ܠܩܺܒܽܘܬܳܐ: ܘܶܐܬܬܪܺܝܡܰܬ ܡܶܢ ܐܰܪܥܳܐ.

¹⁸ ܘܰܥܫܶܢܘ ܡܰܝ̈ܳܐ ܘܰܣܓܺܝܘ ܛܳܒ ܥܰܠ ܐܰܪܥܳܐ: ܘܰܡܗܰܠܟܳܐ ܗܘܳܬ ܩܺܒܽܘܬܳܐ ܥܰܠ ܐܰܦܰܝ̈ ܡܰܝ̈ܳܐ.

¹⁹ ܘܡܰܝ̈ܳܐ ܥܫܶܢܘ ܛܳܒ ܛܳܒ ܥܰܠ ܐܰܪܥܳܐ: ܘܶܐܬܟܰܣܺܝܘ ܟܽܠܗܽܘܢ ܛܽܘܖ̈ܶܐ ܖ̈ܳܡܶܐ ܕܰܬܚܶܝܬ ܟܽܠ ܫܡܰܝܳܐ.

²⁰ ܚܰܡܫܰܥܶܣܖ̈ܶܐ ܐܰܡܺܝ̈ܢ ܡܶܢ ܠܥܶܠ ܥܫܶܢܘ ܡܰܝ̈ܳܐ: ܘܶܐܬܟܰܣܺܝܘ ܛܽܘܖ̈ܶܐ ܖ̈ܳܡܶܐ.

²¹ ܘܣܳܦ ܟܽܠ ܒܣܰܪ ܕܪܳܚܶܫ ܥܰܠ ܐܰܪܥܳܐ: ܦܳܪܰܚܬܳܐ: ܘܰܒܥܺܝܪܳܐ: ܘܚܰܝܽܘܬܳܐ: ܘܟܽܠܶܗ ܪܰܚܫܳܐ ܕܪܳܚܶܫ ܥܰܠ ܐܰܪܥܳܐ: ܘܟܽܠܗܽܘܢ ܒܢܰܝ̈ܢܳܫܳܐ.

²² ܟܽܠ ܕܰܢܫܰܡܬܳܐ ܕܪܽܘܚܳܐ ܕܚܰܝ̈ܶܐ ܒܰܐܦܰܘ̈ܗܝ: ܡܶܢ ܟܽܠ ܕܰܒܝܰܒܫܳܐ: ܡܺܝܬܘ.

²³ ܘܰܥܛܳܐ ܠܟܽܠ ܕܩܳܐܶܡ ܥܰܠ ܐܰܦܰܝ̈ ܐܰܪܥܳܐ: ܡܶܢ ܒܢܰܝ̈ܢܳܫܳܐ ܘܰܥܕܰܡܳܐ ܠܰܒܥܺܝܪܳܐ: ܘܰܥܕܰܡܳܐ ܠܪܰܚܫܳܐ: ܘܰܥܕܰܡܳܐ ܠܦܳܪܰܚܬܳܐ ܕܰܫܡܰܝܳܐ: ܐܶܬܥܛܺܝܘ ܡܶܢ ܐܰܪܥܳܐ. ܘܶܐܫܬܚܰܪ ܢܽܘܚ ܘܰܕܥܰܡܶܗ ܒܩܺܒܽܘܬܳܐ.

²⁴ ܘܰܥܫܶܢܘ ܡܰܝ̈ܳܐ ܥܰܠ ܐܰܪܥܳܐ: ܡܳܐܐ ܘܚܰܡܫܺܝܢ ܝܰܘܡܺܝ̈ܢ.